ក្នុងរយៈពេលឈប់សម្រាក ៤ថ្ងៃ ចាប់ពីថ្ងៃទី២៩ ខែតុលា ដល់ថ្ងៃទី០១ ខែវិច្ឆិកា ឆ្នាំ២០២០ ដែលជាថ្ងៃព្រះរាជពិធីគ្រងព្រះបរមរាជសម្បត្តិ ព្រះបាទសម្ដេចព្រះករុណា ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង ព្រះរាជពិធីបុណ្យអុំទុក បណ្ដែតប្រទីប និងសំពះព្រះខែ អកអំបុក ខេត្តសៀមរាបទទួលបានភ្ញៀវទេសចរច្រើនជាងគេ ក្នុងចំណោមបណ្ដារាជធានី-ខេត្តទាំង២៥ មានចំនួនសរុបជិត១៧ម៉ឺននាក់ នេះបើតាមរបាយការណ៍ របស់ក្រសួងទេសចរណ៍។
ចំណែកខេត្តកំពត ជាខេត្តលំដាប់ទី២ ដែលមានភ្ញៀវទេសចរទៅទស្សនាជាង៧ម៉ឺននាក់ និងលំដាប់ទី៣ គឺខេត្តព្រះសីហនុ មានភ្ញៀវទេសចរទៅទស្សនាជាង៥ម៉ឺននាក់ ខណៈភ្ញៀវទេសចរធ្វើដំណើរកម្សាន្តនៅទូទាំងប្រទេស មានចំនួនសរុបជាង៦៤ម៉ឺននាក់ ។
គួរជម្រាបដែរថា ភ្ញៀវទេសចរ ដែលមកកម្សាន្តក្នុងខេត្តសៀមរាបភាគច្រើន បានទៅទស្សនាតំបន់រមណីយដ្ឋាន និងសហគមន៍នានា ក្នុងខេត្តដូចជា តំបន់ប្រាសាទអង្គរវត្ត , ឧទ្យានជាតិភ្នំគូលែន , សហគមន៍ព្រៃទឹកជប់ខ្នារពោធិ៍ , សហគមន៍ត្រាវកុដិ, សហគមន៍បឹងឈូកបន្ទាយស្រី និង រមណីយដ្ឋានភូមិវប្បធម៌កម្ពុជាជាដើម។
អត្ថបទ និង រូបភាព៖ មន្ទីរព័ត៌មានខេត្តសៀមរាប
