នៅព្រឺកថ្ងៃទី០២ ខែវិច្ឆិកា ឆ្នាំ២០២០នេះ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានអញ្ជើញពិនិត្យ រថយន្តផ្សាយចល័ត (OB) ថ្មីចំនួន១គ្រឿង របស់ទូរទស្សន៍ជាតិកម្ពុជា ដែលត្រូវត្រៀមទុក សម្រាប់ថត និងផ្សាយផ្ទាល់ក្នុងពិធីបុណ្យឯករាជ្យជាតិ ៩ វិច្ឆិកា នាពេលខាងមុខ។
តាមសេចក្ដីរាយការណ៍ជូន ឯកឧត្តមរដ្ឋមន្ត្រី ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា បង្ហាញថា រថយន្តផ្សាយចល័តថ្មីមួយគ្រឿងនេះ ជាអំណោយរបស់លោកជំទាវ ហ៊ុន ម៉ាណា អគ្គនាយិកាវិទ្យុ និងទូរទស្សន៍ បាយ័ន។ រថយន្តទំនើបនេះដែរ មានបំពាក់ប្រព័ន្ធបញ្ជារូបភាព និងបំពាក់កាមេរ៉ាចំនួន ៨គ្រឿង ប្រព័ន្ធបញ្ជាសំឡេង ម៉ាស៊ីនទំនាក់ទំនង ម៉ាស៊ីនតម្លើងអក្សរ ម៉ាស៊ីនបញ្ហារូបភាពយឺតសម្រាប់កីឡា ម៉ាស៊ីនត្រជាក់ និងម៉ាស៊ីនភ្លើងកម្លាំង ២៥KVA ព្រមទាំង ប្រព័ន្ធភ្លើងស្វ័យប្រវត្តិផងដែរ។ ក្នុងពិធីបុណ្យឯករាជ្យជាតិ ៩ វិច្ឆិកាខាងមុខ រថយន្តផ្សាយចល័តនេះ អាចថតបានទិដ្ឋភាព ចំនួន ១៣ កន្លែង ចាប់ពីមុខព្រះបរមរាជវាំង រហូតដល់វិមានឯករាជ្យ។ បន្ថែមពីនោះ លោកជំទាវ ហ៊ុន ម៉ាណា ក៏បានប្រគល់កាមេរ៉ា ចំនួន ៣ឈុត ដើម្បីបំពាក់នៅក្នុងរថយន្តចល័តតូច និងបានប្រើប្រាស់ចាប់ពីចុងខែតុលា ឆ្នាំ២០១៩ផងដែរ។
ឯកឧត្តម ឃឹម វុទ្ធី និងមន្ត្រីក្រោមឱវាទ នៃអគ្គនាយកទូរទស្សន៍ជាតិកម្ពុជា សូមគោរពថ្លែងអំណរគុណយ៉ាង ជ្រាលជ្រៅ ចំពោះ លោកជំទាវអគ្គនាយិកាវិទ្យុ និងទូរទស្សន៍ បាយ័ន ដែលតែងតែយកចិត្តទុកដាក់ គាំទ្រដល់ អគ្គនាយកដ្ឋាន ទូរទស្សន៍ជាតិកម្ពុជា ដែលជាការរួមចំណែកដ៏សំខាន់ពីវិស័យឯកជន។ បន្ថែមពីនេះ ឯកឧត្តម ឃឹម វុទ្ធី បានថ្លែងអំណរគុណ យ៉ាងជ្រាលជ្រៅបំផុត ចំពោះ សម្តេចតេជោ ហ៊ុន សែន ដែលតែងតែ បានផ្តល់ការ ណែនាំដោយផ្ទាល់ ក៏ដូចជា តាមរយៈ លោកជំទាវ ហ៊ុន ម៉ាណា ដើម្បីយ៉ាងណាឱ្យអគ្គនាយកដ្ឋានទូរទស្សន៍ជាតិកម្ពុជា មានភាពរីក ចម្រើនឈានឆ្ពោះទៅមុខជានិច្ច៕
អត្ថបទ និង រូបភាព៖ ក្រសួងព័ត៌មាន
