និន្នាការនៃការវិវត្តកសិកម្មសរីរាង្គនៅកម្ពុជា គឺជាការឆ្លើយតបទៅនឹងគោលនយោបាយនិងផែនការមេរបស់ក្រសួង ក្នុងការជំរុញកំណើនកសិកម្ម ប្រកបដោយការប្រកួតប្រជែងនិងបរិយាប័ន្ន ផលិតផលមានគុណភាពនិងអាហារូបត្ថម្ភ រួមជាមួយនឹងគោលដៅមុតស្រួចរបស់រាជរដ្ឋាភិបាល គឺការប្រែក្លាយវិបត្តិនៃជំងឺកូវីដ-១៩ រួមទាំងបញ្ហាប្រឈមននា ដែលបណ្តាលមកពីគ្រោះជំនន់ទឹកភ្លៀង ឱ្យទៅជាឱកាសនៃការវិនិយោគ និងអភិវឌ្ឍវិស័យកសិ-ឧស្សាហកម្មបន្ថែមទៀត។ នេះបើតាមប្រសាសន៍ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ក្នុងឱកាសបើកដំណើរការ អង្គសន្និសីទជាតិ និងវគ្គបណ្តុះបណ្តាល ស្តីពីកសិកម្មសរីរាង្គ-ការអភិវឌ្ឍផលិតផលសម្រាប់កសិករ និងផលិតករនៅក្នុងប្រទេសកម្ពុជា ដែលគាំទ្រដោយ អង្គការផលិតភាពអាស៊ី ( APO ) នៅខេត្តសៀមរាប នាព្រឹកថ្ងៃទី០៣ ខែវិច្ឆិកា ឆ្នាំ២០២០នេះ ដែល សិក្ខាសាលានេះ មានរយៈពេល៤ថ្ងៃ សហការរៀបចំដោយមជ្ឍមណ្ឌលផលិតភាពជាតិនៃក្រសួងកសិកម្ម ជាមួយក្រសួងឧស្សាហកម្ម វិទ្យាសាស្រ្ត បច្ចេកទេស នវានុវត្តន៍ គាំទ្រដោយអង្គការផលិតភាពអាស៊ី (APO ) និងមានសិក្ខាកាមចូលរួមមកពីខេត្តបាត់ដំបង សៀមរាប កំពង់ធំ និងរាជធានីភ្នំពេញ។
ឯកឧត្តម ហ៊ាន វណ្ណហន បានប្រសាសន៍បន្តថា ក្នុងកាលៈទេសៈដែលកម្ពុជា កំពុងទទួលរងនូវបញ្ហាប្រឈមពីវិបត្តិ នៃជំងឺកូវីដ-១៩ និងទទួលរងនូវផលប៉ះពាល់យ៉ាងធ្ងន់ធ្ងរដោយគ្រោះជំនន់ទឹកភ្លៀង ក្រសួងកសិកម្ម រុក្ខាប្រមាញ់ និងនេសាទ ដែលមានអង្គភាពជំទាញជាសេនាធិការ ក៏ដូចជាអន្តរស្ថាប័នពាក់ព័ន្ធត្រូវបានបំពេញកាតព្វកិច្ចចំពោះមុខ “ ប្រែក្លាយកសិកម្មកម្ពុជា ជាកសិកម្មទំនើប មានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តរភាពដើម្បីបង្កើនប្រាក់ចំណូលគ្រួសារកសិករ តាមរយៈការលើកកម្ពស់ពិពិធភាវូបនីយកម្មដំណាំ ដែលមានសក្តានុពល មានតម្រូវការទីផ្សារ រួមទាំងការចិញ្ចឹមសត្វ និងវារីវប្បកម្មជាលក្ខណៈពាណិជ្ជកម្ម ដោយមិនមើលរំលងអំពីការធ្វើកសិកម្មសរីរាង្គ ដែលត្រូវចូលរួមឱ្យបានសកម្មថែមទៀត ឆ្លើយតបទៅនឹងគោលដៅអភិវឌ្ឍន៍ដោយចីរភាព និងភាតរៈបរិស្ថាន ។ កម្ពុជាមានកាលានុវត្តភាពច្រើន ដើម្បីជំរុញការអភិវឌ្ឍកសិកម្មសរីរាង្គ ដើម្បីបំពេញតម្រូវការដែលចេះតែកើនឡើងជាលំដាប់នោះ ហើយក៏ឆ្លើយតបផងដែរ ចំពោះតម្រូវការលើកិច្ចការពារសុវត្ថិភាពម្ហូបអាហារ សុខភាព បរិស្ថាន ភាពស៊ីវិល័យ និង សុខុមាលភាពសង្គម ការប្រកួតប្រជែងដណ្តើមទីផ្សារ និងទំនុកចិត្តពីអតិថិជនដើម្បីរួមចំណែកអភិវឌ្ឍសង្គម សេដ្ឋកិច្ចជាតិ នាពេលបច្ចុប្បន្ន។
ឯកឧត្តមរដ្ឋលេខាធិការ មានប្រសាសន៍បញ្ជាក់ទៀតថា ក្នុងរយៈពេល៩ខែដើមឆ្នាំ២០២០នេះ គឺក្នុងអំឡុងពេលអន្តរកាលនៃវិបត្តិកូវីដ១៩ កម្ពុជាបាននាំចេញផលិតផលកសិកម្មផ្លូវការទៅកាន់ទីផ្សារអន្តរជាតិ សម្រេចបានជិត៦លានតោន ក្នុងនោះនាំចេញអង្ករបានជិត ៤៩ពាន់តោន ទៅកាន់គោលដៅ៥៩ប្រទេស កើនឡើង២២,៦៧% បើធៀបនឹងឆ្នាំ២០១៩។ មោទនភាពនេះ បានធ្វើឱ្យកម្ពុជា ស្ថិតនៅក្នុងចំណោមប្រទេសធំៗចំនួន១០នៅលើសកលលោក ដែលបាននាំចេញអង្ករទៅក្រៅប្រទេស ក្នុងនោះអង្ករក្រអូបប្រណិតរបស់កម្ពុជា (ពូជស្រូវផ្ការំដួល) ត្រូវបានទទួលស្គាល់ថា មានគុណភាពល្អ រស់ជាតិឆ្ងាញ់ជាងគេ។ ជាមួយគ្នានោះការនាំចេញអង្ករក្រៅផ្លូវការរបស់កម្ពុជា មានចំនួនជាង២,៦លានតោន ផងដែរ។ តាមការវាយតម្លៃរបស់ធនាគារពិភពលោក និងស្ថាប័នអន្តរជាតិធំៗបានព្យាករណ៍ថា នៅឆ្នាំ២០២០នេះ សេដ្ឋកិច្ចកម្ពុជាអាចធ្លាក់ចុះក្នុងរង្វង់ -២,០%។ ប៉ុន្តែមកដល់ពេលនេះ ស្ថានភាពសេដ្ឋកិច្ចកម្ពុជា នៅតែបង្ហាញសញ្ញាវិជ្ជមានចំពោះវិស័យមួយចំនួន ខណៈពេលវិស័យខ្លះទៀតនៅបន្តជួបការលំបាក៕
អត្ថបទ និង រូបភាព៖ ងិន គីមឡេង យូ វង្ស
