នៅព្រឹកថ្ងៃទី០៤ ខែ វិច្ឆិកា ឆ្នាំ២០២០នេះ ក្រសួងការងារ និងបណ្តុះបណ្តាលវិជ្ជាជីវៈ និងអង្គការចក្ខុវិស័យកម្ពុជា សហការជាមួយមូលនិធិ អាស៊ា អិកវានសិងឡៃ នាំយកគ្រឿងឧបភោគបរិភោគរួមមានមានអង្ករ ទឹកត្រី ត្រីខ មី អំបិល ស្ករស និងទឹកដោះគោខាប់ ចែកជូនបងប្អូនជាកម្មករឡឥដ្ឋ ចំនួន ១៧៥គ្រួសារ នៃឡឥដ្ឋ៥កន្លែងក្នុងស្រុកក្រឡាញ់ ក្នុងពេលជួបរងគ្រោះដោយសារជំនន់ទឹកភ្លៀង នៅបរិវេណវត្តភ្នំទ្រង់បាត្រ ឃុំ កំពង់ថ្កូវ ស្រុកក្រឡាញ់ ខេត្តសៀមរាប ក្រោមវត្តមានរបស់លោកស្រី ម៉ន នីរងី្ស អភិបាលនៃគណៈអភិបាលស្រុកក្រឡាញ់ និង លោក ស៊ត់ ចន្ថា នាយកប្រតិបត្តិ អង្គការ ចក្ខុវិស័យកម្ពុជា ដោយមានការចូលរួមពីអាជ្ញាធរស្រុក សហភាពសហព័ន្ធយុវជនកម្ពុជាស្រុក អាជ្ញាធរឃុំ ភូមិបុគ្គលិកអង្គការផងដែរ។
លោក ស៊ត់ ចន្ថា បានបញ្ជាក់ថា អង្គការចក្ខុវិស័យកម្ពុជា បានកើតឡើងក្នុងឆ្នាំ២០១៣ គឺដើមី្បបម្រើការងារមនុស្សធម៌ នៅខេត្តសៀមរាបក៏ដូចទូទាំងព្រះរាជាណសចក្រកម្ពុជា ហើយកន្លងមកសកម្មភាពរបស់អង្គការ បានធ្វើនៅខេត្តសៀមរាប និង ខេត្តឧត្តរមានជ័យ ដោយបានផ្តល់អណ្តូងទឹកស្អាតបាន ចំនួន ៩៨៦អណ្តូង សាងសង់សាលារៀន ៥ខ្នង និងជួសជុលសាលារៀន ៤ខ្នង និង សាងសង់បន្ទប់ទឹកអនាម័យនៅតាមមន្ទីរពេទ្យ ២កន្លែង និងឧបត្ថម្ភអ្នកសម្រាលកូនខ្វះខាត សម្រាកនៅតាមមណ្ឌលសុខភាព ចំនួន៧០០នាក់ ព្រមទាំងបានផ្តល់នូវស្បៀងអាហារដល់គ្រួសារក្រីក្រនៅតាមឡឥដ្ឋ និង ងាយរងគ្រោះទៀតផង។ ម៉្យាងទៀតក្នុងសកម្មភាពទាំងនេះ ក៏ជាសិល្បះប្រពៃណី វប្បធម៌ចែករំលែករបស់អង្គការ ក្នុងពេលដែលប្រជាពលរដ្ឋយើងជួបនូវទុក្ខលំបាកដោយគ្រោះធម្មជាតិ ។
មានប្រសាសន៍ក្នុងឱកាសនោះលោកស្រី ម៉ន នីរងី្ស ក្នុងនាមតំណាងប្រជាពលរដ្ឋក្នុងស្រុក ក៏ដូចបងប្អូនកម្មករ នៅតាមសិប្បកម្មឡឥដ្ឋទាំង៥ក្នុងស្រុកក្រឡាញ់ សម្តែងពីទឹកចិត្តដ៏សប្បុរសធម៌របស់អង្គការ ចក្ខុវិស័យកម្ពុជា និង មូលនិធិ អាស៊ា អិកវានសិងឡៃ ដែលបានយកចិត្តទុកដាក់ក្នុងការចូលរួមជាមួយរាជរដ្ឋាភិបាល ក្នុងពេលដែលប្រជាពលរដ្ឋខ្មែរយើង បានកំពុងជួប នូវទុក្ខលំបាក ដោយគ្រោះធម្មជាតិ និង អំពីទុក្ខលំបាករបស់បងប្អូន សំខាន់ចំពោះកុមារៗនៅក្នុងវិស័យសិប្បកម្មផលិតឥដ្ឋ ចំការដំណាំកសិកម្ម។ ក្នុងនោះដែរក៏សូមណែនាំដល់បងប្អូនកម្មករដែលស្នាក់អាស្រ័យនៅនឹងសិប្បកម្មឡឥដ្ឋ ត្រូវឲ្យមានការប្រុងប្រយ័ត្នខ្ពស់ចំពោះកូនៗរបស់ខ្លួន ដោយកុមារតូចៗនេះហើយងាយរងនូវហានីភ័យផ្សេងៗ។ ក្នុងនោះលើកស្រីបានធ្វើការណែនាំ និង ក្រើនរំលឹកបងប្អូន សូមកុំភ្លេចកូវិដ ពីព្រោះថា កូវិដមិនភ្លេចយើងទេ មានតែយើងទេភ្លេចកូវិដ ដូច្នេះយើងត្រូវអនុវត្តឲ្យបានជាប្រចាំតាមការណែនាំរបស់ ក្រសួងសុខាភិបាល ។ ម៉្យាងទៀតនៅពេលទឹកស្រក សូមបងប្អូនត្រូវធ្វើអនាម័យជុំវិញលំនៅដ្ឋាន និង លប់បំបាត់នូវទី ជម្រកសត្វមូសខ្លា ដែលជាភ្នាក់ងារចម្លងជម្ងឺគ្រុនឈាម និង គ្រុនឈិក ដែលកើតលើមនុស្សគ្រប់វ័យ និង សូមឲ្យបងប្អូនត្រូវយកចិត្តធ្វើការស្តារឡើងវិញនូវជីវភាពក្រុមគ្រួសារ ត្រូវធ្វើការដាំដុះដំណាំរួមផ្សំ ព្រមទាំងធ្វើការប្រមូលភោគផលស្រូវ ដែលនៅសេសសល់ពីទឹកជំនន់នេះ
ក្នុងនោះដែរ លោកស្រី ក៏បានជំរុញឲ្យអាណាព្យាបាលត្រូវបញ្ជូនកូនៗរបស់ខ្លួនឲ្យបានចូលសិក្សារៀនសូត្រ ដោយកុមារទាំងអស់ គឺជាសរសស្តម្ភនៃគ្រឹះរឹងមាំរបស់ ប្រទេសជាតិ និង ជាធនធាមនុស្សដ៏សំខាន់នៅក្នុងមូលដ្ឋាន។
ជាមួយគ្នានោះក៏សូមឲ្យបងប្អូនកម្មករទាំងអស់ ដែលគ្មានអត្តសញ្ញាណបណ្ណ័ ត្រូវទៅធ្វើនៅសាលាស្រុក ហើយបងប្អូនដែលមិនទាន់បានចំឈ្មោះបោះឆ្នោត ក៏ត្រូវទៅចុះឈ្មោះឲ្យបានគ្រប់ៗគ្នា៕
អត្ថបទ និង រូបភាព៖ គឿន វ៉េត
