លើកឡើងនៅក្នុងអង្គសិក្ខាសាលា ស្តីពីការណែនាំ និងពង្រឹងសមត្ថភាពដល់មន្រ្តីជំនាញថ្នាក់ក្រោមជាតិ សម្រាប់តាមដានត្រូតពិនិត្យ និងវាយតម្លៃការអនុវត្ត គោលនយោបាយជាតិប្រជាជន ឆ្នាំ២០១៦-២០៣០ នាព្រឹកថ្ងៃទី០៤ ខែវិច្ឆិកា ឆ្នាំ២០២០ នៅសាលាខេត្តសៀមរាប ឯកឧត្តម ជា ចាន់ទុំ អគ្គលេខាធិការ នៃអគ្គលេខាធិការដ្ឋានប្រជាជន និងការអភិវឌ្ឍន៍ មានប្រសាសន៍ថា៖ ក្នុងដំណើរការនៃការអនុវត្តគោលនយោបាយរយៈពេលវែងដ៏មានសារសំខាន់មួយនេះរាជរដ្ឋាភិបាល បានអំពាវនាវឲ្យមានការអនុវត្តតាមបែបវិមជ្ឍការ និងមានការចូលរួមជាពហុវិស័យ ប្រកបដោយប្រសិទ្ធភាព ។
គោលនយោបាយនេះ ផ្តោតទៅលើអាទិភាពចម្បងៗចំនួន៤ គឺទី១ ការពង្រីកនិងការអភិវឌ្ឍហេដ្ឋរចនាសម្ព័ន្ធ ទី២ ការគ្រង់គ្រងការធ្វើទេសន្តរប្រវេសន៍និងនគររូបនីយកម្ម ទី៣ ការពង្រីកវិស័យកសិកម្មនិងសកម្មភាពពាក់ព័ន្ធ និងទី៤ គឺ ការវិនិយោគលើវិស័យសង្គមកិច្ច។ នៅថ្នាក់ជាតិ គោលនយោបាយនេះ ត្រូវបានបំបែកជា៥ដំណាក់កាល ដែលក្នុងមួយដំណាក់កាលមានរយៈពេល៣ឆ្នាំ ហើយបច្ចុប្បន្ននេះ កំពុងស្ថិតនៅក្នុងការអនុវត្តផែនការសកម្មភាពដំណាក់កាលទី២ ( ២០១៩-២០២១ )។
ឯកឧត្តម ទួន ថាវរៈ រដ្ឋលេខាធិការក្រសួងផែនការ មានប្រសាសន៍ថា៖ ដោយផ្តោតការគិតគូរដល់ផលប៉ះពាល់នៃការប្រែប្រួលយ៉ាងលឿនផ្នែកប្រជាសាស្រ្ត មកលើប្រជាជនគ្រប់មជ្ឍដ្ឋាន ដូច្នេះការបញ្ចូលកត្តាឌីណាមិកប្រជាសាស្រ្តទៅក្នុងដំណើរការនៃការធ្វើផែនការអភិវឌ្ឍ គឺជាការងារដ៏ចាំបាច់ សំដៅធ្វើឲ្យកម្ពុជាបានត្រៀមខ្លួនសមស្រប ក្នុងការទាញយកអត្ថប្រយោជន៍ពីកាលានុវត្តភាពប្រជាសាស្រ្ត ដែលកំពុងឆ្លងកាត់ និងកាលានុវត្តភាពដទៃទៀត ដែលកំពុងកើតមានសម្រាប់ការអភិវឌ្ឍ រួមទាំងបានដោះស្រាយបញ្ហាប្រឈមទាំងឡាយផងដែរ ដែលបានជួបកន្លងមក និងកំពុងជួបប្រទះនៅក្នុងបរិការណ៍នេះ។ ឌីណាមិកប្រជាសាស្រ្ត គឺជាទស្សនៈស្នូល សម្រាប់ការពិភាគ្សាគ្នានៅក្នុងអង្គសិក្ខាសាលានេះ ដែលជាសិក្ខាសាលាសម្រាប់ការណែនាំអំពីមូលដ្ឋាន និងរបៀបនៃការបង្កើតផែនការសកម្មភាព នៃការអនុវត្តគោលនយោបាយជាតិប្រជាជន ២០១៦-២០៣០នៅថ្នាក់ខេត្តជាលើកដំបូង ដោយការជ្រើសរើសយកខេត្តសៀមរាប ដើម្បីចាប់ផ្តើមអនុវត្តសាកល្បង ដែលកន្លងមកគោលនយោបាយនេះ ទាំងផែនការសកម្មភាព គឺផ្តោតនៅតែថ្នាក់ជាតិប៉ុណ្ណោះ ដែលនោះគឺជាចំណុចខ្វះចន្លោះ ត្រូវតែបានបំពេញជាចាំបាច់។
ឯកឧត្តម ទួន ថាវរៈ មានប្រសាសន៍ទៀតថា លទ្ធផលនៃការរំពឹងទុក របស់គោលនយោបាយជាតិប្រជាជនដ៏ល្អមួយនេះ គឺឆ្លុះបង្ហាញអំពីការលើកកម្ពស់កំណើនសេដ្ឋកិច្ចឆាប់រហ័សប្រកបដោយចិរភាព និងការអភិវឌ្ឍប្រទេសជាតិ ដែលការអភិវឌ្ឍនេះ បានជួយផ្តល់សេវាសង្គមជាមូលដ្ឋាន ដល់ប្រជាពលរដ្ឋ។ ក្នុងហេតុផលទាំងនេះ បានបង្ហាញឲ្យឃើញដែរថា គោលនយោបាយជាតិប្រជាជន និងការអភិវឌ្ឍសេដ្ឋកិច្ច-សង្គមកិច្ច គឺមិនអាចញែកចេញពីគ្នាបាននោះឡើយ និងត្រូវបានពង្រឹងឲ្យគ្នាទៅវិញទៅមកផងដែរ៕
អត្ថបទ និង រូបភាព៖ ងិន គីមឡេង
