ព្រឹកថ្ងៃទី០៥ ខែវិច្ឆិកា ឆ្នាំ២០២០ មន្ត្រីសង្ឃខេត្តសៀមរាបដែលនិមន្តមកពីទីអារាមផ្សេងៗគ្នាក្នុងខេត្តសៀមរាប ដឹកនាំដោយព្រះវិន័យធរគណខេត្ត ព្រះនាម ព្រះបវរវិជ្ជា ទេព ភឿន បាននាំយកស្បៀងអាហារនិងថវិកាមួយចំនួន ដើម្បីឧបត្ថម្ភ និងសួរសុខទុក្ខ ដល់គ្រួសារក្រីក្រមួយគ្រួសារ នៅភូមិសាលាកន្សែង សង្គាត់ស្វាយដង្គំ ដែលកំពុងជួបប្រឈមខ្លាំងក្នុងជីវភាពរស់នៅប្រចាំថ្ងៃ ដោយសារតែស្រ្តីទទួលអំណោយ ឈ្មោះ គឹម ស្រីថេង អាយុ២៤ឆ្នាំ ជាជនងាយរងគ្រោះ ត្រូវប្តីទទួលអនិច្ចកម្មក្នុងខណៈពេលដែលខ្លួនពរពោះ និងត្រូវសម្រាលកូនក្នុងកាលៈទេសៈនៃបាត់បង់ការងារធ្វើ ដោយវិបត្តិកូវីដ១៩ និងត្រូវបានប្រើជីវិតរស់នៅជាមួយជីដូនចាស់ជរា ព្រមជាមួយនោះ នៅក្នុងបន្ទុកមានកូនតូច២នាក់ និងក្មួយកំព្រា២នាក់ផ្សេងទៀត ហើយឱពុកម្តាយក៏ស្ថិតក្នុងជីវភាពខ្វះខាតផងដែរ។
ព្រះបវរវិជ្ជា ទេព ភឿន មានថេរដីកាដែរថា នេះជាលើកទី២ហើយ ដែលប្រតិភូសង្ឍនៃខេត្តសៀមរាប បានផ្តល់អំណោយសម្រាប់គ្រួសារងាយរងគ្រោះមួយនេះ ស្របគ្នាផងដែរ នឹងការនាំយកថវិកាសប្បុរសធម៌ របស់លោក ហឿន សំនៀង និងភរិយា ជាជំនួយការផ្ទាល់ឯកឧត្តមទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ដែលព្រមជួយសម្រាលការលំបាក ដោយទឹកចិត្តអាណិតអាសូរ ជួយឧបត្ថម្ភក្នុង១ខែ ជាថវិកា១០០ដុល្លា រយៈពេល៣ខែ បន្ទាប់ពីបានជួបផ្ទាល់ ស្រ្តីងាយរងគ្រោះរូបនេះ ក្នុងអំឡុងពេលសំរាកសម្រាលកូននៅក្នុងមន្ទីរពេទ្យកុមារជ័យវរ្ម័នទី៧ ដោយវះកាត់ កាលពីចុងខែសីហាកន្លងទៅ។ ដោយអំណោយទាំងនោះ សារុបរួមមាន ថវិកា ៨៥ម៉ឺនរៀល អង្ករ១០០គីឡូក្រាម មី៦កេះ ទឹកត្រី១យួរ ទឺកស៊ីអ៊ីវ២យួរ ត្រីខ ១ឡូត៌ និង នំ១ធុង ។ អ្វីដែលអំណោយសំខាន់បន្ថែមនោះ គឺធម្មទានអប់រំផ្លូវចិត្ត គាំពារឲ្យគ្រួសារងាយរងគ្រោះមួយនេះ មានការតស៊ូជំនះការលំបាកទាំងឡាយ ដើម្បីអនាគតដ៏វែងឆ្ងាយខាងមុខ។
ព្រះបវរវិជ្ជា ទេព ភឿន មានថេរដីកាទៀតថា សាសនាព្រះសមណគោត្តម ព្រះបរមគ្រូនៃយើង រីកចម្រើនរុងរឿងមកដល់បច្ចុប្បន្នកាល និងទៅអនាគតគម្រប់៥០០០ព្រះវស្សា គឺអាស្រ័យដោយពុទ្ធមាមកជន ដូចនេះហើយ ទុក្ខលំបាករបស់ប្រជាពុទ្ធស័ទ និងជនរងគ្រោះជាទូទៅ គឺជាហេតុផល ដែលព្រះសង្ឃត្រូវមានធុរកិច្ច ជួយគ្នាតាមប្រការដែលអាចធ្វើទៅបាន។ ពិតណាស់ថា អំណោយទាំងនេះ គឺបានមកពីសទ្ធារបស់ពុទ្ធបរិស័ទ ដូច្នេះការចែករំលែកចេញពីព្រះសង្ឃ សម្រាប់ជាបច្ច័យទាន ជួយសម្រាលកាលំបាករបស់ប្រជាពលរដ្ឋ គឺជាការប្រតិបត្តិដោយប្រពៃបំផុត៕
អត្ថបទ និង រូបភាព៖ យូ វង្ស
