អាជ្ញាធរខេត្តសៀមរាប ណែនាំដល់អាជីវករ និង ពាណិជ្ជករ ត្រូវយកចិត្តទុកឲ្យបានខ្ពស់លើផលិតផលរបស់ខ្លួន ដោយធានាបានល្អទាំងគុណភាពនិងអនាម័យ
ផលិតផលជាអាហារសម្រាប់បរិភោគនេះ គឺនៅតែមានតម្រូវការខ្ពស់នៅឡើយ បើទោះបីជាពិភពលោកទាំងមូល កំពុងទទួលនូវការរាតត្បាតជាសកលនៃជំងឺកូវីត-១៩ក៏ដោយ ព្រោះថា គ្រប់ៗគ្នាត្រូវការបរិភោគជាប្រចាំថ្ងៃ ដែលមិនអាចខកខានបាននោះទេ ប៉ុន្តែបញ្ហាសំខាន់នោះ គឺ សុំឲ្យអាជីវករ និង ពាណិជ្ជករទាំងអស់ ត្រូវយកចិត្តទុកឲ្យបានខ្ពស់លើផលិតផលរបស់ខ្លួន ដោយធានាបានល្អទាំងគុណភាព និង អនាម័យ និយាយរួមគឺរាល់ផលិតផលទាំងអស់ មិនត្រូវប៉ះពាល់ដល់សុខភាពអ្នកប្រើប្រាស់ឡើយ ។ នេះបើតាមប្រសាសន៍លោក នាក់ ណេរ៉ុន អភិបាលរងខេត្តសៀមរាប ក្នុងឱកាសលោកអញ្ជើញជាអធិបតីក្នុងសិក្ខាសាលាស្តីពី ការផ្សព្វផ្សាយ និងការបញ្ជូនផលិតផលសក្តានុពលកម្ពុជា សម្រាប់ទីផ្សារក្នុង និងក្រៅប្រទេស នាព្រឹកថ្ងៃទី០៥ ខែវិច្ឆិកា ឆ្នាំ២០២០ នៅសាលប្រជុំនៃមន្ទីរពាណិជ្ជកម្មខេត្តសៀមរាប ។
លោក នាក់ ណេរ៉ុន មានប្រសាសន៍បន្ថែមថា តាមរយៈនៃសិក្ខាសាលានេះ នឹងធ្វើឲ្យផលិតករ អាជីវករ និងពាណិជ្ជករ នៃសហគ្រាសធុនតូច ទទួលបានចំណេះដឹងដែលទាក់ទងនឹងការពង្រឹងអាជីវកម្មរបស់ខ្លួន ការអភិវឌ្ឍន៍ចង្វាក់ផលិតកម្មរបស់សគ្រាសធុនតូច និងមធ្យមនៅក្នុងខេត្ត ជាពិសេសនឹងផ្តល់នូវគំនិត និងបទពិសោធន៍ថ្មីៗ ដើម្បីស្វែងរកឱកាសពង្រីកនូវអាជីវកម្មរបស់ខ្លួន ។
ពាក់ព័ន្ធនឹងបញ្ហានេះដែរ លោក អ៊ូច សារិន ប្រធាននាយកដ្ឋានអភិវឌ្ឍន៍ទីផ្សារ នៃអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម បានឲ្យដឹងថា សិក្ខាសាលានេះ មានគោលបំណងធ្វើការផ្សព្វផ្សាយ និងការបញ្ជូនផលិតផលសក្តានុពលកម្ពុជាសម្រាប់ទីផ្សារក្នុង និងក្រៅប្រទេស ហើយវាជាឱកាសដ៏មានសារៈសំខាន់ក្នុងការជំរុញ និងបង្កើនការផលិត ការច្នៃប្រឌិត បង្កើតឱកាសការងារ បង្កើនប្រាក់ចំណូល ជូនដល់បងប្អូនកសិករ ផលិតករ អាជីវករ ពាណិជ្ជករ សមាគម សហគ្រិនក្នុងមូលដ្ឋាន ជាពិសេសជួយទប់ស្កាត់ការធ្វើចំណាកស្រុកខុសច្បាប់ និងរួមចំណែកការកាត់បន្ថយភាពក្រីក្រ ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
