បើតាមតំណាងប្រជាកសិកររស់នៅក្នុងភូមិព្រលាន ឃុំជន្លាស់ដៃ ស្រុកក្រឡាញ់ បានអោយដឹងកាលពីថ្ងៃទី០៣ ខែវិច្ឆិកានេះថា ស្រូវប្រជាកសិករជាច្រើនពាន់ហិកតាបាននឹងកំពុងទទួលផលជាបណ្ដើរៗហើយ ដែលក្នុងមួយហិកតា អាចទទួលបានផលពី៣តោនទៅ៣តោនកន្លះ មានការកើនឡើងជាងឆ្នំាមុន ព្រោះតាមការសង្កេតឃើញជាក់ស្ដែង ស្រូវមានការលូតលាស់ល្អនិងចេញផ្លែផ្កាល្អ មានភាពល្អប្រសើរ។ ពួកគាត់បានបន្ដថា កាលពីឆ្នាំមុនៗស្រូវស្រែរបស់ពួកគាត់ មានការិចរិលដើមស្រូវដោយទទួលទិន្នផលប្រហែល២តោនទៅ២តោនកន្លះប៉ុណ្ណោះ។ជាក់ស្ដែងស្រូវនៅតំបន់ឃុំជន្លាស់ដៃ និងឃុំតាអាន ស្រុកក្រឡាញ់ បាននឹងកំពុងតែផ្ដល់ទិន្នផលល្អគួរអោយកត់សំគាល់ បើទោះបីស្រូវទាំងនោះ ធ្លាប់បានរងគ្រោះដោយគ្រោះរាំងស្ងួត និងទឹកជំនន់ក៍ដោយ។ ពួកគាត់ថ្លែងអំណរគុណដល់ក្រុមការងារក្រសួងធនធានទឹក និងឧតុនិយម និងអាជ្ញាធរស្រុក ដែលបានអន្ដរាគមន៍ជួយសង្គ្រោះស្រូវទាន់ពេលវេលា។ បើសិនគ្មានក្រសួងធនធនាទឹក និងឧតុនិយមជួយអន្ដរាគមន៍បូបទឹកដាក់ស្រែទាន់ពេលវេលានោះទេ ស្រូវវស្សាពួកគាត់មិនអាចទទួលកើនឡើងជាងឆ្នាំមុននោះដែរ។
លោក ស្រឹប សារៀម ប្រធានសហគមន៍ប្រើប្រាស់ទឹកស្ពានស្រែងត្រពាំងអំបិល បានអោយដឹងដែរថា កាលពីពាក់កណ្ដាលខែកក្កដាឆ្នាំ២០២០កន្លងមក ស្រូវវស្សារបស់ប្រជាកសិករជាង៥០០ហិកតា បានក្រៀមស្វិតហើយប្រឈមនឹងងាប់ ដោយសារខ្វះទឹកស្រោចស្រប់ ប៉ុន្ដែត្រូវបានក្រសួងធនធានទឹក និងឧតុនិយម ព្រមទាំងប្រធានមន្ទីរធនធានទឹកខេត្ដសៀមរាប ជួយសង្គ្រោះទាន់ពេលវេលា ទើបមកដល់ពេលនេះ ស្រូវពួកគាត់ នៅតំបន់នោះអាចទទួលបានទិន្នផលខ្ពស់គួរអោយកត់សំគាល់។ នាពេលបច្ចុប្បន្ននេះ ស្រូវប្រជាកសិករនៅឃុំជន្លាស់ដៃ និងឃុំតាអាន មានការលូតលាស់ល្អប្រសើរ ហើយបានទិន្នផលខ្លះហើយ បើទោះបីប៉ះពាល់ពីទឹកជំនន់ថែមទៀតក៍ដោយ។
លោក នួន គ្រីស្នា ប្រធានមន្ទីរធនធានទឹក និងឧតុនិយម ខេត្ដសៀមរាប មានប្រសាសន៍ថា អាជ្ញាធរតែងយកចិត្ដទុកដាក់ទៅលើស្រូវស្រែប្រជាកសិករជានិច្ច។ កាលពីពាក់កណ្ដាលខែកក្កដា កន្លងមកនោះ មន្ទីរធនធានទឹកនិងឧតុនិយម ក៍ដូចជាក្រសួងបានយកម៉ាស៊ីនបូបទឹក៥គ្រឿង ដើម្បីបូបទឹកដាក់ស្រូវស្រែប្រជាកសិករអោយរួចផុតពីហានីភ័យ។ លោកបន្ដថា ការបូបទឹកជួយសង្គ្រោះស្រូវ ដែលជួបគ្រោះរាំងស្ងួតនោះអាជ្ញាធរប្រើពេលប្រមាណ១សប្ដាហ៍ ដោយនាំទឹកមកពីស្រុកផ្សេងអោយចូលតាមស្ទឹកស្រុកក្រឡាញ់ ទើបបានចូលដល់ស្រែប្រជាកសិករនៅឃុំជន្លាស់ដៃនិងឃុំតាអានស្រុកក្រឡាញ់ខេត្ដសៀមរាប ។លោកសង្កេតឃើញថា ស្រូវដែលក្រុមការងារលោកជួយសង្គ្រោះជាច្រើនហិកតានោះបានរួចផុតពីក្រៀមស្វិតស្ងួតហើយបានទទួលទិន្នផលច្រើនលើសពីឆ្នាំមុនៗ៕
ព័ត៌មានជាតិ ថ្មីៗ
អត្ថបទ និង រូបភាព៖ ឈិត សាវី
