កាលពីរសៀលថ្ងៃទី០៣ ខែវិច្ឆិកា ឆ្នាំ២០២០ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប និងសហការី បានចុះពិនិត្យ ចូលរួមរៀបចំដី ព្រួស គ្រាប់ពូជស្រូវចុងរដូវវស្សា និងស្តារឡើងវិញក្រោយការប៉ះពាល់ខូចខាត ដោយជំនន់ទឹកភ្លៀង នៅឃុំកែវពណ៌ និងឃុំសំរោងយា ស្រុកពួកខេត្តសៀមរាប និងបានចុះពិនិត្យសុខភាពសត្វ ព្រមទាំងដាក់ផែនការចាក់ថ្នាំការពារជម្ងឺ នៅតាមទីទួលសុវត្ថិភាព នៅឃុំល្វា ស្រុកពួក ខេត្តសៀមរាបផងដែរ។
ក្នុងឱកាសនោះលោក ទា គឹមសុទ្ឋ បានជំរុញនិងណែនាំដល់កសិករក្នុងការរៀបចំដីស្រែឱ្យបានត្រឹមត្រូវតាមបច្ចេកទេស ដើម្បីបង្កលក្ខណៈងាយស្រួលដល់ការដាំដុះ ការគ្រប់គ្រងទឹក និងដីឲ្យបានល្អប្រសើរ ការគ្រប់គ្រងជី និងការកម្ចាត់សមាសភាពចង្រៃ ធ្វើឱ្យដំណាំស្រូវលូតលាស់ល្អ និងផ្តល់ទិន្នផលខ្ពស់។ ជាមួយគ្នានោះសូមឲ្យប្រជាកសិករ មិនត្រូវឱ្យផ្លាស់ប្តូរទម្លាប់របស់កសិករពីការប្រើប្រាស់ពូជប្រពៃណី មកជ្រើសរើសប្រភេទពូជស្រូវទំនើប ដែលផ្តល់ទិន្នផលខ្ពស់ មានរយៈពេលខ្លី ដែលសមស្របនឹងក្សេត្របរិស្ថាន ធន់នឹងការប្រែប្រួលអាកាសធាតុ ឆ្លើយតបនឹងតម្រូវការទីផ្សារ ផងដែរ។
លោកប្រធានមន្ទីរកសិកម្ម បានបញ្ចាក់ថា នៅពាក់កណ្តាលខែតុលាថ្មីៗនេះស្រុកមួយចំនួនក្នុងខេត្តសៀមរាប ទទួលរងផលប៉ះពាល់ដោយសារជំនន់ទឹកភ្លៀងបានបណ្តាលឱ្យផលដំណាំនិងស្រូវមួយចំនួនរងការជន់លិចនិងខូចខាតជាច្រើនផងដែរ មន្ទីរកសិកម្ម រុក្ខាប្រមាញ់ និងនេសាទខេត្ត ដោយទទួលបានពូជស្រូវ និងពូជបន្លែ ក្នុងគម្រោងគ្រោះមហន្តរាយ ពីក្រសួងកសិកម្ម រុក្ខាប្រមាញ់ និងនេសាទ ចំនួន៣លើក ទទួលបានស្រូវពូជចំនួន ៨០ ៥០០ គ.ក្រ (ប៉ែតសិបពាន់ប្រាំរយគីឡូក្រាម) និងពូជបន្លែ៤មុខ ចំនួន៦០០កញ្ចប់ ក្នុងនោះ លើកទី១ ពូជស្រូវ ចំនួន ២៩ ៥០០ គ.ក្រ និងពូជបន្លែ៥មុខ ៣០០កញ្ចប់ លើកទី២ ពូជស្រូវចំនួន ២៨ ០០០ គ.ក្រ និង ពូជបន្លែ៥មុខ ៣០០កញ្ចប់ និងលើកទី៣ ពូជស្រូវចំនួន ២៣ ០០០ គ.ក្រ សម្រាប់ចែកជូនកសិកររងគ្រោះ។ មន្ទីរកសិកម្មបាន រៀបចំបែងចែកបានចំនួន២លើក (លើកទី១ នៅថ្ងៃទី១៦ ខែតុលា ឆ្នាំ២០២០ ក្នុងឪកាសទិវាស្បៀង អាហារពិភពលោក ដល់កសិករចំនួន ២២០នាក់ ស្រូវពូជចំនួន ៥ ៥០០គ.ក្រ និងពូជបន្លែចំនួន២២០ កញ្ចប់ លើកទី២នៅថ្ងៃទី២៦ ខែតុលា ឆ្នាំ២០២០ កសិករចំនួន ៥០០នាក់ បានចែកពូជចំនួន ៣០ ០០០គ.ក្រ និងពូជបន្លែចំនួន ២០០កញ្ចប់) ដូចនេះ ពូជស្រូវនៅសល់ចំនួន ៤៥ ០០០គ.ក្រនិងពូជ បន្លែចំនួន១៨០កញ្ចប់។
លោកបន្ថែមថា ដើម្បីអនុវត្តបន្តមន្ទីរកសិកម្ម បានស្នើសុំគោលការណ៍ទៅគណៈកម្មាការគ្រប់គ្រងគ្រោះមហន្តរាយខេត្ត ដើម្បីយកពូជស្រូវនិងពូជបន្លែដែលនៅសល់ បន្តបែងចែក ជូនទៅដល់កសិករនៅស្រុកគោលដៅចំនួន៥ស្រុក ដូចជា ស្រុកសូទ្រនិគម កសិករចំនួន១២០គ្រួសារ (មកពី៣ឃុំ) ។ ស្រុកជីក្រែង កសិករចំនួន១២០ គ្រួសារ (មកពី២ឃុំ) ស្រុកប្រាសាទបាគង ចែកកសិករ ចំនួន១១០គ្រួសារ មកពីឃុំចំនួន៤ ស្រុកក្រឡាញ់ ចែកកសិករ ចំនួន១០០គ្រួសារ មកពី៣ឃុំ និងស្រុកអង្គរធំ ចែកពូជបន្លែកសិករចំនួន ១៨០គ្រួសារ មកពីឃុំចំនួន១ កសិករម្នាក់ៗ ទទួលបានពូជបន្លែ ១កញ្ចប់ស្មើនិង១៨០កញ្ចប់ ។
ក្នុងនោះដែរបើតាមរបាយការណ៍ពីការិយាល័យក្សេត្រសាស្ត្រ និងផលិតភាពកសិកម្មនៃមន្ទីរកសិកម្មខេត្តបានបង្ហាញថា៖ ដោយសារឥទ្ធិពលនៃព្យុះដែលមានកន្លងមកនេះ បានធ្វើអោយមានភ្លៀងធ្លាក់ជាបន្តបន្ទាប់ពីមធ្យម ទៅច្រើន នៅទូទាំងខេត្តសៀមរាប ដែលជាហេតុនាំអោយមានទឹកជំនន់បានហូរកាត់វាលស្រែ និងចំការនៅស្រុកមួយចំនួន ដែលធ្វើអោយប៉ះពាល់ និងខូចខាតស្រូវពង្រោះបង្កើនរដូវ(វស្សា)ជាពិសេសគឺខូចដោយសារទឹកជំនន់ទឹកទន្លេឡើងលិចតែម្តង រួមមានក្រុងសៀមរាប ស្រុកពួក សូទ្រនិគម ជីក្រែង អង្គជុំ វ៉ារិន អង្គរធំ ក្រឡាញ់ ស្រីស្នំ និងស្រុកប្រាសាទបាគង ។ សរុបផ្ទៃដីប៉ះពាល់ដំណាំស្រូវចំនួន ១៣ ៤០៨ហ.ត និង ផ្ទៃដីខូចខាតសរុបចំនួន ៧៦៤ហ.ត។ ដំណាំបន្លែចម្រុះប៉ះពាល់ផ្ទៃដីចំនួន ៦០ហ.ត និងខូចខាតអស់ ១៥ហ.ត។ ដំណាំដំឡូងមីប៉ះពាល់ផ្ទៃដីចំនួន ២ ៤០៧ហ.ត។ សម្រាប់ការងារបង្កបង្កើនផលដំណាំស្រូវរដូវប្រាំង២០២០-២០២១ ឃើញថាការភ្ជួររាស់ដីនារដូវប្រាំងធ្វើបាន សរុបចំនួន៤ ៤២៥ហ.ត ក្នុងនោះដោយគ្រឿងយន្ត៤ ៤២៥ហ.ត ៕
អត្ថបទ និង រូបភាព៖ យូ វង្ស
