នារសៀលថ្ងៃទី០៣ ខែវិច្ឆិកា ឆ្នាំ២០២០នេះ ឯកឧត្តម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានសម្របសម្រួលគម្រោងថ្នាក់ជាតិ បានអញ្ជើញជាអធិបតីក្នុងកិច្ចប្រជុំបើកបេសកកម្មវាយ តម្លៃពាក់កណ្ដាលអាណត្តិនៃការអនុវត្ត គម្រោងលើកកម្ពស់ជីវភាពប្រជាជនក្រីក្ររបស់ធនាគារពិភពលោក ដោយពិធិនេះដែរគ៏មានអញ្ជើញចូលរួមពីសំណាក់ឯកឧត្តម អស់លោក លោកស្រី ព្រមទាំងតំណាងក្រសួងសេដ្ឋកិច្ចនិងហិរញ្ញវត្ថុ តំណាងក្រសួងការងារនិងបណ្តុះបណ្តាលវិជ្ជាជីវៈ តំណាងក្រសួងអភិវឌ្ឍន៍ជនបទ ក្រសួងកសិម្ម រុក្ខាប្រមាញ់ និងនេសាទ រដ្ឋបាលរាជធានីភ្នំពេញ និងរដ្ឋបាលខេត្តសៀមរាបជាច្រើននាក់ផងដែរ។
មានប្រសាសន៏ក្នុងឪកាសនោះ ឯកឧត្តម ងី ច័ន្ទ្រផល បានជម្រុញដល់ក្រុមការងារទាំងអស់ ត្រូវប្រតិបត្តិការណ៏ចំពោះការងារដែលបានអនុវត្តកន្លងមក យើងធ្វើយ៉ាងណាឱ្យដល់គោលដៅនៃគម្រោងរបស់យើង ដោយរក្សាផែនការ និងការអនុវត្តការងារឲ្យបានល្អប្រសើរ យើងត្រូវជំរុញល្បឿនការងារឱ្យបានលឿនជាងមុន យើងត្រូវចុះទៅពិនិត្យមើលដល់ទីតាំង និងគោលដៅរបស់ប្រជាពលរដ្ឋជាក់ស្តែង និងច្បាស់លាស់មិនអាចធ្វេសប្រហែសបានឡើយ ដែលប្រជាពលរដ្ឋក្រីក្របានជួបប្រទះនៅវិបត្តិកូវីដ១៩ និងគ្រោះទឹកជំនន់។ ម្យ៉ាងវិញទៀត ចំពោះបញ្ហាដែលបានរកឃើញ និងលើកឡើងនេះជាឱកាសសម្រាប់ថ្ងៃក្រោយ ក្នុងការកែលម្អឱ្យបានល្អឡើងវិញព្រោះថាគម្រោងនេះ ជាគម្រោងមួយជួយដល់ប្រជាពលរដ្ឋក្រីក្រនៅកម្ពុជា។
ឯកឧត្តម មានប្រសាសន៏បន្តថា យើងត្រូវអនុវត្តការងារគម្រោងលាភនេះឱ្យបានពី៧០% ទៅ ៨០% ហើយត្រូវគិតថាគម្រោងទាំងនេះ ក៏ជាការងារដ៏សំខាន់មួយដែលរាជរដ្ឋាភិបាលបានដាក់ឱ្យអនុវត្ត ជាពិសេស គឺយើងជួយដល់ប្រជាពលរដ្ឋក្រីក្រ ដើម្បីកាត់បន្ថយប្រជាពលរដ្ឋចេញពីបន្ទាត់ភាពក្រីក្រផងដែរ។ ដូច្នេះសមាសភាគពាក់ព័ន្ធទាំងអស់ ត្រូវអនុវត្តការងារគម្រោងឱ្យមានប្រសិទ្ធភាពខ្ពស់ និងបានផលល្អប្រសើរទៅថ្ងៃអនាគត។
សូមជម្រាបថា ក្នុងបេសកកម្មវាយតម្លៃពាក់កណ្ដាលអាណត្តិនៃការអនុវត្ត គម្រោងលើកកម្ពស់ជីវភាពប្រជាជនក្រីក្ររបស់ធនាគារពិភពលោកនេះ យើងត្រូវតែចុះទៅត្រួតពិនិត្យទីតាំងលទ្ធផលអនុគម្រោង ដែលស្ថិតនៅក្នុងភូមិទទា ភូមិសំរោង និងភូមិត្រពាំងវែង ឃុំស្ពានត្នោត ស្រុកជីក្រែង ខេត្តសៀមរាប និងទីតាំងក្រុមហ៊ុន ង៉ោ ឈុត ដែលមានតម្លៃកិច្ចសន្យាចំនួន ២៦,០០០ ដុល្លា ក្នុងរយៈពេលនៃការអនុវត្តកិច្ចសន្យាសម្រាប់២ខែ ០៤ថ្ងៃ ដែលជាពេលវេលាចាប់ផ្តើមអនុវត្តកិច្ចសន្យា គឺចាប់ផ្តើមពីថ្ងៃទី២៦ ខែមេសា ឆ្នាំ២០២០ ហើយត្រូវបញ្ចប់នៅថ្ងៃទី៣០ ខែមិថុនា ឆ្នាំ២០២០ ដោយឡែក លទ្ធផលអនុគម្រោង សម្រាប់ការស្តារប្រឡាយដីប្រវែង២,១០០ ម៉ែត្រ និងសាងសង់លូមូលមានទ្វារទឹក៦ កន្លែង គម្រោងបានអនុវត្តចប់១០០%ហើយ ស្ថិតនៅក្នុងរយៈពេលធានា៦ ខែ ដែលប្រជាពលរដ្ឋទទួលផលផ្ទាល់ចំនួន៣ ភូមិក្នុងនោះរួមមាន៖ ភូមិទទា ប្រជាពលរដ្ឋសរុបចំនួន៩៣ គ្រួសារ ក្រ១ ចំនួន២១ គ្រួសារ និងក្រ២ ចំនួន៣១ គ្រួសារ ភូមិសំរោង ប្រជាពលរដ្ឋសរុបចំនួន១០៦ គ្រួសារ ក្រ១ ចំនួន៣១ គ្រួសារ ក្រ២ ចំនួន២១ គ្រួសារ ០ ភូមិត្រពាំងវែង ប្រជាពលរដ្ឋសរុបចំនួន៧២ គ្រួសារ ក្រ១ ចំនួន០៧ គ្រួសារ ក្រ២ ចំនួន១០ គ្រួសារផងដែរ៕
អត្ថបទ និង រូបភាព៖ ស៊ាន សុផាត
