កាលពីល្ងាចថ្ងៃទី០២ ខែវិច្ឆិកា ឆ្នាំ២០២០នេះ ឯកឧត្ដម ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បានដឹកនាំក្រុមការងារ គ្រោះមហន្ដរាយនៃក្រសួងអភិវឌ្ឍន៍ជនបទ បន្ដចុះពិនិត្យ និងសិក្សាស្វែងយល់ផ្លូវមួយចំនួននៅតាមជនបទ នៃខេត្ដសៀមរាប ដែលរងប៉ះពាល់ដល់ដោយសារទឹកជំនន់ ដើម្បីត្រៀមជួសជុលឡើងវិញ សម្រាប់បំរើផលប្រយោជន៍ដល់ប្រជាកសិករ ក្នុងការប្រកប្រកបរបរកសិកម្ម ក៍ដូចជាដើម្បីអោយប្រជាពលរដ្ឋធ្វើចរាចរណ៍មានភាពងាយស្រួល។
ឯកឧត្ដម ជ្រុន ថេរ៉ាវ៉ាត បានបញ្ជាក់ថា ការចុះពិនិត្យនេះ ធ្វើឡើងតាមអនុរសាស្ដ្ររបស់ប្រមុខរាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជណាចក្រកម្ពុជា អោយមានការសិក្សាអោយបានច្បាស់លាស់សម្រាប់ផ្លូវថ្នល់នៅតាមជនបទ ដែលបានរងការខូចខាតដោយសារទឹកជំនន់កន្លងមក ដើម្បីត្រៀជួសជុលនិងស្ដារឡើងវិញ សម្រាប់បំរើអោយប្រជាពលរដ្ឋក្នុងការធ្វើដំណើរនិងដឹកជញ្ជូនដំណាំកសិកម្ម ខណៈដែលប្រជាពលរដ្ឋចាប់ផ្ដើមប្រមូលផលស្រូវវស្សាជាបណ្ដើរៗ។ ជាលទ្ធផល ក្រោយការចុះពិនិត្យ ក្រុមការងារបានរកឃើញផ្លូវតាមតំបន់មួយចំនួននៅក្នុងស្រុកអង្គរធំ ស្រុកអង្គរជុំ និងស្រុកពួក បានរងការខូចខាតខ្លាំងដោយសារទឹកជំនន់បានវាយលុកកន្លងមក។
ឯកឧត្ដម បញ្ជាក់ទៀតថា ផ្លូវទាំងអស់នេះជាផ្លូវយុទ្ធសាស្ដ្រសំខាន់ៗ ដែលរាជរដ្ឋាភិបាល ជាពិសេសក្រសួងអភិវឌ្ឍន៍ជនបទ នឹងត្រូវជួសជុលអោយទាន់ពេលវេលា។ ក្នុងនោះបើសិនផ្លូវថ្នល់មានការពិបាក ធ្វើអោយទំនិញស្រូវប្រជាកសិករ មានតម្លៃទាប ដែលធ្វើអោយប៉ះពាល់ដល់មុខរបរ និងជីវភាពប្រចាំថ្ងៃរបស់ពួកគាត់ ប៉ុន្ដែបើសិនស្ដារផ្លូវ យុទ្ធសាស្ដ្រសំខាន់ៗទាំងនោះអោយទាន់ពេលវេលា គឺនឹងធ្វើប្រជាកសិករមានក្ដីសង្ឃឹមទំនិញពួកគាត់ឡើងថ្លៃ។ ក្រៅពីផ្លូវដែលបានចុះពិនិត្យនេះ នៅមានផ្លូវមួយចំនួន រងកខារខូចខាត ប៉ុន្ដែមិនទាន់អាចជួសជុលបាននៅឡើយទេ ដោយសារទឹកមិនទាន់ស្រកនៅឡើយ។ ឯកឧត្តមក៏សូមអំពាវដល់ប្រជាពលរដ្ឋ សូមមានការយោគយល់ ក្នុងការស្ដារផ្លូវថ្នល់នៅតាមជនបទនេះ ក្នុងនោះដែរ រាជរដ្ឋាភិបាលបានយល់ពីក្ដីទុកលំបាករបស់ប្រជាកសិករហើយ នឹងចាប់ផ្ដើមកែលំអរឡើងវិញ ក្រោយពីទឹកស្រកអស់ ព្រោះការជួសផ្លូវដែលមានទឹកជំនន់គ្មានគុណភាព។
ព័ត៌មានជាតិ ថ្មីៗ
សូមបញ្ចាក់ថា បើតាមលោក ខេង ញ៉ុល ប្រធានមន្ទីរអភិវឌ្ឍន៍ជនបទខេត្ដសៀមរាប បានឲ្យដឹងថា ចាប់ពីថ្ងៃទី១៦ ដល់ថ្ងៃទី២១ ខែតុលា ឆ្នាំ២០២០ មានខ្សែផ្លូវប្រវែងជាង៤រយគីឡូម៉ែត្រ(៤១៩,៥០០ម៉ែត្រ) បានរងផលប៉ះពាល់ដោយទឹកលិចលើផ្លូវ រួមមាន នៅស្រុកអង្គរជុំ ស្រុកវ៉ារិន ស្រុកស្រីស្នំ ស្រុកពួក ស្រុកក្រឡាញ់ ស្រុកសូទ្រនិគម ស្រុកជីក្រែង ស្រុកប្រាសាទបាគង ស្រុកបន្ទាយស្រី និងស្រុក អង្គរធំ។ដោយឡែក ផ្លូវដែលត្រូវជួសជុលបន្ទាន់និងចាំបាច់បំផុត មានចំនួន២១ខ្សែ ស្មើរនឹងជិត២០០គីឡូម៉ែត្រ(១៩៦,៨០០ម៉ែត្រ) ៕
អត្ថបទ និង រូបភាព៖ ឈិត សាវី
