នៅក្នុងកិច្ចប្រជុំសាមញ្ញប្រចាំសប្ដាហ៍ នាព្រឹកថ្ងៃទី០២ ខែវិច្ឆិកា ឆ្នាំ២០២០នេះ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានថ្លែងកោតសរសើរ ដល់ថ្នាក់ដឹកនាំ មន្រ្តីគ្រប់ផ្នែកនៃក្រសួងព័ត៌មាន ដែលបានប្រឹងប្រែង បំពេញកិច្ចការងារ អំឡុងថ្ងៃឈប់សម្រាក នៃពិធីបុណ្យជាតិ ដោយមិនមានការរាំងស្ទះ ក្នុងការផ្សព្វផ្សាយ ព័ត៌មាន កម្មវិធីកម្សាន្តផ្សេងៗ។
ជាមួយនេះ ឯកឧត្តមរដ្ឋមន្ត្រី ក៏បានកោតសរសើរ ដល់មន្ទីរព័ត៌មាន តាមបណ្តារាជធានី-ខេត្តនានា ដែលបានផ្ញើនូវព័ត៌មាន រូបភាពជាច្រើន អំពីទិដ្ឋភាព និងកន្លែងកម្សាន្ត របស់ប្រជាពលរដ្ឋនៅទូទាំងប្រទេស។ ទាំងនេះ បានបញ្ជាក់ថា ប្រពន្ធ័ផ្សព្វផ្សាយរបស់ជាតិ ទាំងវិទ្យុ ទូរទស្សន៍ ទីភ្នាក់ងារសារព័ត៌មានកម្ពុជា បានដំណើរការទៅមុខ កាន់តែល្អប្រសើរ ដើម្បីទទួលបានការគាំទ្រ និងមានអ្នកទស្សនាកាន់តែច្រើនឡើងថែមទៀត។
ក្នុងកិច្ចប្រជុំនោះ ឯកឧត្តម ខៀវ កាញារីទ្ធ បានលើកឡើងពីកិច្ចការងារសំខាន់ៗ ដែលក្រសួងព័ត៌មាន បន្តធ្វើ ក្នុងនោះដូចជាការត្រៀមចូលរួម វេទិកានិពន្ធនាយកប្រចាំឆ្នាំ ការរៀបចំកិច្ចប្រជុំជាមួយសមាគមកាសែត វិទ្យុ ទូរទស្សន៍ ដើម្បីចង់ដឹង និងទទួលយកនូវសំណូមពរជារួម ហើយដាក់ជូនសម្តេចតេជោ នាយករដ្ឋមន្រ្តី ធ្វើការឆ្លើយតប និងដោះស្រាយនូវរាល់សំណូមពរ ទាំងឡាយ ដែលអ្នកសារព័ត៌មានបានលើកឡើង។ ឯកឧត្តម បានគួសបញ្ជាក់ដែរថា កន្លងមកក្រសួងព័ត៌មាន មិនដែលធ្លាប់ទទួលបាននូវ ពាក្យប្តឹង ពីអ្នកសារព័ត៌មានជាស្រ្តី ទាក់ទងទៅការបៀតបៀន នៅពេលបំពេញកិច្ចការងាររបស់ខ្លួននោះទេ តែបើសិនជាកើតមានលើអ្នកសារព័ត៌មាន ជាស្រ្តីណាម្នាក់ ត្រូវដាក់ពាក្យប្តឹង មកក្រសួងព័ត៌មាន ឬក៏ប្តឹងផ្ទាល់ទៅតុលាការ និងក្រសួងកិច្ចការនារី ដើម្បីមានវិធានការ ដោះស្រាយ។
ក្នុងឱកាសនោះ ឯកឧត្តម លោកជំទាវ ជាអគ្គនាយក អគ្គនាយិកា ទាំង ៥ ចំណុះឲ្យក្រសួងព័ត៌មាន រដ្ឋលេខាធិការ អនុរដ្ឋលេខាធិការ ទទួលបន្ទុកតាម ផ្នែក និងជំនាញនីមួយៗ ក៏បានធ្វើរបាយការណ៍ បូកសរុបរួមពីការងារសំខាន់ ៗ ដែលសម្រេចបានក្នុងរយៈពេលកន្លងមក និងលើកទិសដៅផែនការសម្មភាពការងារបន្ត ពិសេសកិច្ចការផ្សព្វផ្សាយ និងការ ផលិតកម្មវិធីថ្មីៗ ដែលផ្តល់នូវសារៈសំខាន់ដល់ទស្សនិកជនទូទៅ។
អត្ថបទ និង រូបភាព៖ ក្រសួងព័ត៌មាន
