ព្រឹកថ្ងៃទី៣១ ខែតុលា ឆ្នាំ២០២០នេះ លោកជំទាវ ទាងអេង-ទៀសីហា អនុប្រធានគណៈកម្មាធិការ សាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំក្រុមការងារ និងប្រតិភូសាខាសមាគមនារីកម្ពុជាដើម្បីសន្តិភាព និងអភិវឌ្ឍខេត្តសៀមរាប រួមទាំងសប្បុរសជនផងដែរ ចុះទៅភូមិកំបោរ ឃុំមោង ស្រុកស្រីស្នំ ដើម្បីប្រគល់ផ្ទះមនុស្សធម៌ទី៧៥ ដល់គ្រួសារជនពិការ ដែលបុរសជាប្តីនិងជាឪពុក ស្លាប់មួយកំណាត់ខ្លួន ដោយគ្រោះថ្នាក់ដើមឈើរលំសង្កត់លើ កាលពី៣ឆ្នាំមុន រួមជាមួយអំណាយជាស្បៀងអាហារ សម្ភារប្រើប្រាស់មួយចំនួន និងថវិកា ២លាន ៦សែនរៀល និងបានជួបសំណេះសំណាល ផ្តល់អំណោយជូនដល់ជនចាស់ជរាគ្មានទីពឹង និងគ្រួសារងាយរងគ្រោះចំនួន២០គ្រួសារទៀតផងដែរ។
មានប្រសាសន៍ក្នុងឱកាសនោះ លោកជំទាវ ទាង អេងទៀ សីហា បាននាំមកនូវការផ្តាំផ្ញើសាកសួរសុខទុក្ខនៃសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដោយសង្កត់ធ្ងន់ថា ទុក្ខលំបាករបស់ប្រជាពលរដ្ឋរងគ្រោះ និងងាយរងគ្រោះដោយឧបទ្ទវហេតុផ្សេងៗ គឺជាក្តីកង្វល់របស់កាកបាទក្រហមកម្ពុជា ដូច្នេះហើយទើបនៅទីណាដែលប្រជាពលរដ្ឋជួបភ័យវិបត្តិ គ្រប់ទីកន្លែងទាំងនោះ ត្រូវតែមានវត្តមានកាកបាទក្រហមកម្ពុជា តាមរយៈនៃចលនាបណ្តាញបេសកកម្មមនុស្សធម៌មួយនេះ ចាប់ពីថ្នាក់កណ្តាលរហូតដល់ថ្នាក់សហគមន៍នៅមូលដ្ឋាន។
លោកជំទាវ តាំងហ្គិចលៀង-អ៊ឹងលីហេង ក្នុងនាមជាម្ចាស់អំណោយផ្ទះមនុ្សធម៌ទី៧៥ មានចំណាប់អារម្មណ៍ថា លោកជំទាវ ពិតរំភើបខ្លាំងណាស់ ដែលការបរិច្ចាគនេះ បង្កើតបាននូវភាពកក់ក្តៅមួយចំណែក សម្រាប់គ្រួសារមួយដែលកំពុងប្រឈមនឹងភាពរងគ្រោះ។ សម្រាប់ការព្យបាលផ្លូវចិត្តចំពោះបុរសពិការជាស្វាមី លោកជំទាវបានបង្ហាញថា ភាពរងគ្រោះជាជនពិការវាហាក់ដូចជាជីវិតមួយដែលត្រូវបាត់បង់អ្វីៗទាំងអស់ ក៏ប៉ុន្តែមិនត្រូវគិតរំលងបានទេ គឺវត្តមានភរិយាជាទ្រព្យដ៏សំខាន់ ជាស្រ្តីដ៏រឹងពឹងហ៊ានពុះពារប្រឈមនឹងការលំបាកគ្រប់បែបយ៉ាង ដែលមិនត្រឹមដើរតួនាទីជំនួសស្វាមី តែនៅមើលថែស្វាមី និងតស៊ូបញ្ជូនកូនទាំង៣នាក់ក្នុងបន្ទុក បានរៀសសូត្រទៀតផង។
បើតាម លោកស្រី ឡិញ ផា ដែលជាភរិយាជនពិការ ខាងលើបានបញ្ជាក់ថា ប្តីរបស់គាត់ឈ្មោះ សេ ចន អាយុ៣១ឆ្នាំ មានកូន៣នាក់ក្នុងបន្ទុក ( ប្រុស២ ស្រី១ )។ កាលមិនទាន់ថ្លាក់ខ្លួនពិការ បុរសជាប្តីមានមុខរបរជាអ្នកកាប់អុស ជាអកុសលត្រូវដើមឈើរលំសង្កត់លើកាលពី៣ឆ្នាំមុន។ ដើម្បីព្យាបាលប្តី ស្ត្រីជាប្រពន្ធបានសម្រេចចិត្តលក់ដី លក់ផ្ទះ ហើយទីបំផុតបុរសជាប្តីបានត្រឹមតែរួចផុតពីសេចក្តីស្លាប់ តែត្រូវក្លាយខ្លួនជាជនពិការស្លាប់មួយកំណាត់ខ្លួនដល់សព្វថ្ងៃ។ បច្ចប្បន្ននេះ គ្រួសារជនពិការមួយនេះ រស់នៅលើដីរបស់បងដែលផ្តល់ឲ្យស្នាក់អាស្រ័យ ជីវភាពគ្រួសារដែលរ៉ាប់រងដោយស្រ្តីជាភរិយា សង្ឃឹមទៅលើការងារស៊ីឈ្នួលដកដំឡូង ច្រូតស្រូវជាដើម ក្រៅពីនោះមានពេលខ្លះត្រូវបានទៅបំរើការងារ ជាបុគ្គលិកអនាម័យនៅមណ្ឌលសុខភាព៕
អត្ថបទ និង រូបភាព : ងិន គីមឡេង ស៊ាន សុផាត
