បន្ទាប់ពីដំណើរការអស់រយៈពេលមួយថ្ងៃពេញនៃសិក្ខាសាលាបូកសរុបលទ្ធផលការងារឆ្នាំ២០២០ និងលើកទិសដៅឆ្នាំ២០២១ របស់អាជ្ញាធរកម្ពុជា គ្រប់គ្រងសកម្មភាពកំចាត់មីនដែលបានរៀបចំឡើងនៅខេត្តសៀមរាប អង្គសិក្ខាសាលា បានបិទបញ្ចប់នារសៀល ថ្ងៃទី២៧ ខែតុលា ឆ្នាំ២០២០ ។ ក្រោមអធិបតិយភាពឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអញ្ជើញជាអធិបតីក្នុងពិធីបិទសិក្ខាសាលាបូកសរុបលទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ ក្នុងក្របខណ្ឌអាជ្ញាធរមីន។
ថ្លែងសំណេះសំណាល ក្នុងពិធីបិទអង្គសិក្ខាសាលា ឯកឧត្តម ទេសរដ្ឋមន្រ្តី លី ធុជ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្រ្តីបុគ្គលិកអាជ្ញាធរមីន និងលទ្ធផលដែលអគ្គលេខាធិការដ្ឋានអាជ្ញាធរមីន សម្រេចបាននាពេលកន្លងមក ក្នុងការដឹកនាំ និងរុញច្រានការងារវិស័យសកម្មភាពមីន ឲ្យទទួលបាននូវកេរ្តិ៍ឈ្មោះល្អទាំងថ្នាក់ជាតិ តំបន់ និងអន្តរជាតិ រហូតមកដល់បច្ចុប្បន្ន ព្រមទាំងបានថ្លែងនូវអំណរគុណចំពោះបណ្តាប្រទេសជាមិត្ត ម្ចាស់ជំនួយ ដៃគូអភិវឌ្ឍន៍ និងប្រតិបត្តិករជាតិ-អន្តរជាតិទាំងអស់ ដែលបានចូលរួមផ្តល់នូវកិច្ចសហការយ៉ាងជិតស្និទ្ធ និងជួយឧបត្ថម្ភគាំទ្រទាំងផ្នែកបច្ចេកទេស សម្ភារ និងថវិកា ដល់ការងារសកម្មភាពមីនមនុស្សធម៌នៅកម្ពុជា។
ឯកឧត្តមទេសរដ្ឋមន្រ្តី ក៏បានសម្តែងនូវការដឹងគុណ និងកតញ្ញូតាធម៌ដ៏ខ្ពង់ខ្ពស់ជូនចំពោះវីរភាពដ៏អស្ចារ្យរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលសម្តេច គឺជាស្ថាបនិក ជាមគ្គុទេសក៍ឯក និងជាប្រតិបត្តិករ ដែលនាំមកនូវសន្តិភាព និងការឯកភាពជាតិពេញលេញ ជូនប្រជាជនកម្ពុជា និងប្រទេសជាតិទាំងមូល ចាប់តាំងពីការប្រយុទ្ធប្រឆាំងទប់ស្កាត់ចលនាមិនឲ្យរបបប្រល័យពូជសាសន៍ ប៉ុល ពល វិលមកវិញ ការស្វែងរកសុខសន្តិភាពដោយខ្មែរនិងខ្មែរខ្លួនឯង តាមរយៈ កិច្ចព្រមព្រៀងស្តីពីដំណោះស្រាយនយោបាយរួមមួយនៃជំលោះកម្ពុជា (កិច្ចព្រមព្រៀងទីក្រុងប៉ារីស ២៣តុលា១៩៩១) ជាពិសេសការបញ្ចប់សង្រ្គាមទាំងស្រុងនៅលើទឹកដីកម្ពុជា ក្រោមគោលនយោបាយឈ្នះ ឈ្នះ របស់សម្តេចតេជោ នៅចុងឆ្នាំ១៩៩៨។ ជាមួយនឹងលទ្ធផលនៃសន្តិភាព រាជរដ្ឋាភិបាលកម្ពុជា បានចាត់ទុកការងារបោសសម្អាតមីន ជាផ្នែកមួយយ៉ាងសំខាន់ចូលរួមដល់កិច្ចគាំពារសន្តិភាព។ បន្ថែមលើសពីនេះទៀត ជាមួយនឹងកិច្ចខិតខំប្រឹងប្រែង របស់រាជរដ្ឋាភិបាលកម្ពុជា និងការគាំទ្រដ៏សប្បុរសពីប្រទេសជាមិត្ត ម្ចាស់ជំនួយ និងដៃគូ លើវិស័យមីននៅកម្ពុជា ទេសរដ្ឋមន្រ្តី លី ធុជ បានជម្រុញឲ្យមន្រ្តីបុគ្គលិកទាំងអស់ បន្តយកចិត្តទុកដាក់ខ្ពស់ និងអនុវត្តន៍ឲ្យខ្ជាប់ខ្ជួននូវ “បុព្វសិទ្ធិ តួនាទី និងការទទួលខុសត្រូវ” របស់ខ្លួន ដែលថ្នាក់ដឹកនាំ ឬស្ថាប័ន ប្រគល់ជូន ដែលគោលដៅ និងបេសកកម្មចម្បងរបស់មន្រ្តីរាជការ គឺត្រូវចូលរួមចំណែក និងបម្រើដល់ផលប្រយោជន៍ជាតិ និងប្រជាពលរដ្ឋ។
ឯកឧត្តមទេសរដ្ឋមន្រ្តី បានបញ្ជាក់ថា យើងទាំងអស់គ្នា មិនត្រូវភ្លេចទេថា បុព្វសិទ្ធិដែលថ្នាក់ដឹកនាំប្រគល់ជូន គឺបានផ្តល់ទៅឲ្យតួនាទីរបស់យើងប៉ុណ្ណោះ មិនមែនផ្តល់ឲ្យយើងនោះទេ។ បុព្វសិទ្ធិ ត្រូវផ្តល់ទៅឲ្យអ្នកមានតួនាទី ដើម្បីឲ្យពួកគេធ្វើការងារប្រកបដោយប្រសិទ្ធភាព និងធ្វើអ្វីដែលសំខាន់ពិតប្រាកដ។
ដើម្បីអនុវត្តន៍នូវសេចក្តីថ្លែងការជាចក្ខុវិស័យ និងសេចក្តីថ្លែងការបេសកកម្ម សម្រាប់វិស័យមីននៅកម្ពុជា ឲ្យទទួលបាននូវជោគជ័យបន្ថែមទៀត ក្នុងនាមសម្តេចតេជោប្រធានអាជ្ញាធរមីន លោកទេសរដ្ឋមន្រ្តី បានណែនាំនូវគោលការណ៍ចំនួន ១០ចំណុច នៃការងារចំពោះមុខ ជូនចំពោះថ្នាក់ដឹកនាំ មន្រ្តីរាជការ បុគ្គលិក នៃអគ្គលេខាធិការដ្ឋានអាជ្ញាធរមីន ទាំងអស់ ដូចខាងក្រោម៖ ទី១.បន្តអនុវត្តឲ្យបាននូវផែនការយុទ្ធសាស្ត្រជាតិសកម្មភាពមីន ២០១៨-២០២៥ ឈានទៅសម្រេចបានជោគជ័យនូវយុទ្ធសាស្រ្តចតុកោណរបស់រាជរដ្ឋាភិបាល និងសម្រេចនូវគោលដៅអភិវឌ្ឍន៍ប្រកបដោយចិរភាព ឈានឆ្ពោះទៅរកកម្ពុជាមួយដែលគ្មានមីន ឆ្នាំ២០២៥។ ទី២.បន្តស្វែងរកការគាំទ្រ និងកិច្ចសហការជាមួយអង្គការ GICHD អង្គការ NPA ក៏ដូចជាអ្នកពាក់ព័ន្ធដ៏ទៃទៀតដើម្បីធានាឲ្យប្រព័ន្ធទិន្នន័យមីន មានលក្ខណៈពេញលេញ ឆ្លើយតបទៅនឹងតម្រូវការប្រើប្រាស់ និងការវិភាគនានា និងត្រូវរៀបចំសេចក្តីណែនាំដល់ប្រតិបត្តិករ ដោយបញ្ជាក់អំពីតម្រូវការចាំបាច់នូវការបញ្ជូនទិន្នន័យឲ្យទាន់ពេលវេលា និងធានាបាននូវគុណភាពនៃទិន្នន័យទាំងនោះ។ ទី៣.បន្តជំរុញ និងលើកកម្ពស់នូវការងារបញ្ជ្រាបយេនឌ័រក្នុងវិស័យសកម្មភាពមីន ក៏ដូចជាកិច្ចការងារជួយសង្គ្រោះជនពិការដោយសារមីន ឲ្យបានខ្លាំងក្លាបន្ថែមទៀត ស្របតាមផែនការយុទ្ធសាស្រ្តរបស់រាជរដ្ឋាភិបាល, ទី៤បន្តអនុវត្តឲ្យបានជាប់លាប់នូវសារាចរណែនាំនានាដែលមានស្រាប់ ដូចជាសារាចរលេខ០៥ ស្តីពីការពង្រឹងការងារគ្រប់គ្រងវិស័យសកម្មភាពមីន និងសារាចរលេខ០៤ ស្តីពីការពង្រឹងបន្ថែមលើការងារគ្រប់គ្រងវិស័យសកម្មភាពមីន។ ទី៥ ត្រូវរៀបចំផែនការសកម្មភាពវិស័យមីន រយៈពេល៣ឆ្នាំ ២០២១-២០២៣ ដើម្បីជម្រុញការអនុវត្តផែនការយុទ្ធសាស្រ្តជាតិវិស័យសកម្មភាពមីន ២០១៨-២០២៥ បានសម្រេចជោគជ័យដូចការរំពឹងទុក។ ទី៦ ត្រូវបន្តខិតខំរិះរកវិធីសាស្រ្ត ដើម្បីពន្លឿនការងារជម្រុញឲ្យមានការចូលរួមរបស់កងយោធពលខេមរភូមិន្ទ ជាកម្លាំងអ្នកដោះមីនបន្ថែមលើការងារបោសសម្អាតមីនមនុស្សធម៌។ ទី៧ ត្រូវស្វែងរកកិច្ចសហការបន្ថែមទៀតជាមួយកងយោធពលខេមរភូមិន្ទ ដើម្បីដោះស្រាយការងារបោសសម្អាតមីនតាមព្រំដែនអោយបានឆាប់រហ័ស។ ទី៨ ត្រូវស្វែងរកការគាំទ្រទាំងថវិកានិងបច្ចេកទេសពីម្ចាស់ជំនួយនានា ដើម្បីអនុវត្តឲ្យបានជោគជ័យលើគម្រោងផ្ទៀងផ្ទាត់ទិន្នន័យ និងការស្រាវជ្រាវឡើងវិញ (Data Verification and Resurvey)។ ទី៩ ត្រូវជម្រុញការបង្កើតបណ្ណាល័យនៅអាជ្ញាធរមីនឲ្យបានឆាប់រួចរាល់ ដើម្បីដាក់ឲ្យមន្ត្រី បុគ្គលិកបានសិក្សា និងទទួលបានចំណេះដឹងទូលំទូលាយបន្ថែមទៀត លើវិស័យសកម្មភាពមីន និងទី១០ ត្រូវរៀបចំឲ្យមានជាសៀវភៅណែនាំស្តីពីកិច្ចការរដ្ឋបាល ដើម្បីផ្តល់ភាពងាយស្រួលដល់ការបំពេញការងារប្រចាំថ្ងៃ។
អត្ថបទ និង រូបភាព៖ យូ វង្ស ធន់ ពូថេ
