ថ្ងៃទី២៨ ខែតុលា ឆ្នាំ២០២០នេះ ប្រជាពលរដ្ឋក្រីក្រនិងរងផលប៉ះពាល់ពី ជំនន់ទឹកភ្លៀងនៅស្រុកស្រីស្នំ ខេត្ដសៀមរាប ចំនួន៤១៦គ្រួសារ បានទទួលអំណោយពីសប្បុរសជន ដោយអំណោយទាំងនោះរួមមានអង្ករ ត្រីខ ទឹកស៊ីអ៊ីវ ភួយ ថ្នាំពេទ្យ។ ពិធីនេះដែរប្រព្រិត្តិទៅក្រោមវត្តមានដ៏ខ្ពង់ខ្ពស់ ឯកឧត្តម បណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្រីស្នំ រួមជាមួយឯកឧត្តមលោកជំទាវលោកលោកស្រីជាគណៈប្រតិភូអមដំណើរ ឯកឧត្តមលោកជំទាវជាថ្នាក់ដឹកនាំមន្ទីរអង្គភាពជុំវិញខេត្ត និងអាជ្ញាធរមូលដ្ឋានជាច្រើនរូបចូលរួមផងដែរ។
ក្នុងឪកាសនោះដែរ ឯកឧត្តម បណ្ឌិត ស៊ាន បូរ៉ាត មានប្រសាសន៏ថា ក្នុងរយ:ពេលប៉ុន្មានថ្ងៃកន្លងមក ក្នុងខេត្តសៀមរាបក៏ដូចជានៅតាមបណ្តាខេត្តមួយចំនួននៃព្រះរាជាណាចក្រកម្ពុជា បានទទួលរងនូវបញ្ហាជំនន់ទឹកភ្លៀង ដោយក្នុងនោះដែលបងប្អូនប្រជាពលរដ្ឋច្រើនបានទទួលរងនូវផលប៉ះពាល់ដោយសារជំនន់ទឹកភ្លៀងនេះ។ ជាមួយគ្នានេះដែរប្រមុខនៃរាជរដ្ឋាភិបាលកម្ពុជា ក្រោមការដឹកនាំនាំដោយ សម្ដេចអគ្គមហាសេនាបតិតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ខ្ពស់លើបញ្ហាសុខភាពចំពោះបងប្អូនប្រជាពលរដ្ឋ ដែលកំពុងជួបប្រទះនៅផលប៉ះពាល់ដោយសារជំនន់ទឹកភ្លៀង ដោយមិនទុកឲ្យបងប្អូនណាម្នាក់ បានស្លាប់ដោយអាជ្ញាធរមិនអើពើនោះឡើយ។ ក្នុងនោះដែរឯកឧត្តម ក៏បានសំណូមពរដល់ក្រុមហ៊ុននានា សូមបន្តនូវប្រពៃណីចែករំលែកនេះ ទៅតាមបណ្តាខេត្តក្រុង ស្រុកផ្សេងៗទៀត ដែលរងផលប៉ះពាល់ ដើម្បីចូលរួមចំណែកកាត់បន្ថយនៅភាពខ្វះខាតរបស់បងប្អូនប្រជាពលរដ្ឋរងគ្រោះ និងងាយរងគ្រោះក្នុងពេលមានជំនន់ទឹកភ្លៀងនេះ។
ឯកឧត្តមបណ្ឌិត មានប្រសាសន៍បន្ថែមថា សម្រាប់បញ្ហាមួយទៀតនោះ គឺជំងឺកូវីត១៩ បើទោះបីជានៅកម្ពុជាមានស្ថានភាពល្អប្រសើរយ៉ាងណាក៏ដោយ ក៏ប៉ុន្តែពិភពលោកមិនទាន់ឆ្លងផុតគ្រោះថ្នាក់ នៃវិបត្តិរាតត្បាតដោយជម្ងឺកូវីត-១៩នៅឡើយនោះទេ ដោយក្នុងនោះស្ថាប័នជំនាញជាតិ និងអន្តរជាតិ បានក្រើនរំលឹក ឲ្យប្រជាពលរដ្ឋកម្ពុជា បន្តការយកចិត្តទុកដាក់អនុវត្តលើគ្រប់វិធានការទាំងឡាយ និងរួមគ្នាពង្រឹងបន្ថែមទៀតស្មារតីប្រយុទ្ធប្រឆាំងការចម្លងវារុសកូវីត-១៩ឲ្យខ្លាំងខ្លាបំផុត។ ក្នុងនោះតែសូមបងប្អូនប្រជាពលរដ្ឋយើង កុំមានការធ្វេសប្រហែសឲ្យសោះ គឺត្រូវចូលរួមក្នុងការទប់ស្កាត់ និងការពារចំពោះបញ្ហាជំងឺកូវីត១៩នេះឲ្យបានល្អ ដើម្បីកុំឲ្យប្រទេសកម្ពុជាយើង មានករណីឆ្លងថ្មីនៅក្នុងមូលដ្ឋាន។
បើតាម លោក ហ៊ន់ ឬទ្ធិ អភិ អភិបាលស្រុកស្រីស្នំ បានឲ្យដឹងថា គិតចាប់ពីថ្ងៃ ទី០៩ ដល់ថ្ងៃទី២៨ ខែតុលា ឆ្នាំ២០២០នេះ ស្រុកស្រីស្នំ មានភូមិចំនួន៣១ភូមិ សរុប៥០៧៩ខ្នងផ្ទះ ជង្រុកស្រូវចំនួន៤៨៤ខ្នង បានរងផលប៉ះពាល់ដោយសារជំនន់ទឹកភ្លៀង។ ក្នុងនោះលិច ផ្ទះកំរិតស្រាលចំនួន៦៣៤ខ្នងផ្ទះ លិចទីធ្លាសាលារៀន៥ លិចទីធ្លាវត្ត២ លិចទីធ្លាសាលាឃុំ២ លិចទីធ្លាមណ្ឌលសុខភាព១ និងប៉ះពាល់ស្រូវចំនួន៤៦៧៥ហិតា ដំឡូងមីចំនួន៤១៩៩ហិតា៕
អត្ថបទនិងរូបភាព៖លោកបូសាវី
