យោធិនពិការ និងប្រជាពលរដ្ឋដែលរស់នៅក្នុងមជ្ឈមណ្ឌលអភិវឌ្ឍន៍យោធិនពិការជិត៣០០គ្រួសារទទួលបាន ប័ណ្ណកម្មសិទ្ធិដីធ្លីស្របច្បាប់
នៅព្រឹកថ្ងៃទី២៧ ខែតុលាឆ្នាំ២០២០នេះ មន្ត្រីយោធាពិការ និងប្រជាពលរដ្ឋ លោកគ្រូ អ្នកគ្រូ និងគ្រូពេទ្យ ដែលកំពុងរស់នៅដោយស្របច្បាប់នៅក្នុងមជ្ឈមណ្ឌលអភិវឌ្ឍន៍យោធិនពិការសម្តេចតេជោហ៊ុនសែន គូលេន ៣១៧ សៀមរាប ចំនួន២៧៩គ្រួសារ ពួកគាត់ទទួលបាននូវវិញ្ញាបនបត្រសម្គាល់ម្ចាស់អចលនវត្ថុ (ប្លង់កម្មសិទ្ធិដីធ្លី) ពីរដ្ឋបាលខេត្តសៀមរាប។ ពិធីនេះដែរប្រព្រឹត្តទៅក្រោមអធិបតិភាព ឯកឧត្តមនាយឧត្តមសេនីយ៍ មាស សាវ៉ន អគ្គនាយក នៃអគ្គនាយកដ្ឋានយុទ្ធសេវា ក្រសួងការពារជាតិ លោក លី សំរិទ្ធ អភិបាលរងខេត្តសៀមរាប ដោយមានការអញ្ជើញចូលរួមពីសំណាក់កងកម្លាំងគ្រប់លំដាប់ថ្នាក់ចូលរួមផងដែរ
លោកលី សំរិទ្ធ មានប្រសាសន៍ថា វិញ្ញាបនបត្រសម្គាល់ម្ចាស់អចលនវត្ថុ (ប្លង់កម្មសិទ្ធិដីធ្លី) ចំនួន២៧៩សន្លឹក ត្រូវបានចែកជូនដល់បងប្អូនជាយោធិនពិការ លោកគ្រូ អ្នកគ្រូ គ្រូពេទ្យ និងប្រជាពលរដ្ឋនៅពេលនេះដែរ គឺដើម្បីឲ្យបងប្អូនប្រជាពលរដ្ឋដែលកំពុងរស់នៅក្នុងមជ្ឈមណ្ឌលអភិវឌ្ឍន៍យោធិនពិការសម្តេចតេជោហ៊ុនសែន គូលេន ៣១៧ សៀមរាបទាំង២៧៩គ្រួសារនេះមានសិទ្ធដោយស្របច្បាប់រស់នៅកាន់កាប់ដោយផ្ទាល់។ ចំពោះប័ណ្ណកម្មសិទ្ធិនេះ មានប្រយោជន៍សំខាន់ណាស់ សម្រាប់បងប្អូន ដោយប័ណ្ណមួយសន្លឹកនេះ គឺជាការបញ្ជាក់អំពីភាពស្របច្បាប់ ភាពជាម្ចាស់លើដីធ្លីដែលបងប្អូនកំពុងកាន់កាប់ ។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តមនាយឧត្តមសេនីយ៍ មាស សាវ៉ន បានបញ្ជាក់ថា បច្ចុប្បន្នមជ្ឈមណ្ឌលអភិវឌ្ឍន៍យោធិនពិការសម្តេចតេជោហ៊ុនសែន គូលេន ៣១៧ មានកម្លាំងសរុប១ពាន់៣រយ៦នាក់ ស្មើនឹង៣រយ៤គ្រួសារ ក្នុងនោះមាន បងប្អូនដែលជាយោធិនពិការចំនួន២៧៧គ្រួសារ គ្រូបង្រៀនស្ម័គ្រចិត្ត២៥គ្រួសារ និងពេទ្យឆ្មបស្ម័គ្រចិត្ត២គ្រួសារ ។
ឯកឧត្តមនាយឧត្តមសេនីយ៍ មាស សាវ៉ន បានលើកឡើងទៀតថា ការប្រគល់នូវប័ណ្ណកម្មសិទ្ធិជូន មន្ត្រីយោធាពិការ និងប្រជាពលរដ្ឋ លោកគ្រូ អ្នកគ្រូ និងគ្រូពេទ្យ ទាំង២៧៩គ្រួសារនាឱកាសនេះ គឺជាការគិតគូបន្ថែមមួយទៀតពីសំណាក់រាជរដ្ឋាភិបាល ក្រសួងការពារជាតិ និងរដ្ឋបាលខេត្តសៀមរាប ចំពោះបងប្អូនដែលជាយោធិនពិការ បន្ទាប់ពីពួកគាត់ទទួលបានដីលំនៅដ្ឋាន និងដីអាស្រ័យផលកាលពីពេលកន្លងទៅ។ ដីនេះជាកេរដំណែលដ៏ថ្លៃថ្លារបស់ប្រមុខរាជរដ្ឋាភិបាលកម្ពុជា ជូនចំពោះបងប្អូនជាយោធិន ក៏ន័យលើកតម្កើងជីវភាព សេចក្តីថ្នៃថ្នូរបស់កងទ័ព បើទោះជាធ្លាក់ខ្លួនពិការក្តី។ ចំពោះគ្រួសារដែលមិនទាន់ទទួលបានប័ណ្ណកម្មសិទ្ធិនោះ ពួកគាត់នឹងទទួលបាននាពេលឆាប់ៗខាងមុខបន្តទៀត៕
អត្ថបទ និង រូបភាព៖ ខេង ឧត្តម
