នារសៀលថ្ងៃទី២៥ ខែតុលា ឆ្នាំ២០២០នេះ អង្គកឋិនសាមគ្គី ដែលបានមូលមតិផ្តួចផ្តើមឡើងដោយ ឯកឧត្តម ទៀ សីហា អភិបាលខេត្តសៀមរាប ឯកឧត្តម លន់ សុធី អនុប្រធានក្រុមការងារថ្នាក់ជាតិចុះជួយឃុំស្លែងស្ពាន ស្រុកស្រីស្នំ ខេត្តសៀមរាប លោកជំទាវ សេង ដាលីន លោកជំទាវឧកញ៉ា សេង វូចលាង លោក អភិបាលស្រុក ព្រមទាំងមន្ត្រីរដ្ឋបាលស្រុក គណ:កម្មការអាចារ្យវត្ត និងពុទ្ធបរិស័ទចំណុះជើងជិតឆ្ងាយជាច្រើនរូបទៀត ដោយប្រមូលបានថវិការសរុបរួមចំនួន ៦៦លាន ៦សែន ៨ម៉ឺនរៀល ដើម្បីវេរប្រគេនចំពោះព្រះភិក្ខុសង្ឃគង់ក្នុងវត្តសុវណ្ណគិរីកេសធ្លក ដែលគង់ចាំវស្សាអស់រយៈពេលបីខែនាពេលកន្លងមក។
បើតាមការប្រកាសឱ្យដឹងក្នុងពិធីវេរប្រគេនដល់ព្រះសង្ឃ របស់ គណៈកម្មការអាចារ្យវត្តថា៖ អង្គកឋិនទានសម្រាប់វត្តឆ្នាំនេះ កើតឡើងដោយហេតុ៤យ៉ាង: ហេតុទី១ ដោយសារដូនជីតាជីប្រជាពុទ្ឋបរិស័ទបានស្តាប់ព្រះធម៌ ព្រះវិន័យ ព្រះពុទ្ឋសាសនា បានដឹងថា កឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជាបដិគ្គាហកៈ អ្នកទទួលក្រាលគ្រងផង អ្នកអនុមោទនាផង និងបានឃើញព្រះសង្ឃគង់ចាំវស្សាក្នុងវត្តនេះបានបដិបត្តិ រៀនសូត្រព្រះធម៌វិន័យ ត្រឹមត្រូវតាមគន្លងព្រះពុទ្ឋសាសនាជាដើម។
មានប្រសាសន៏សំណេះសំណាលក្នុងឪកាសនោះ ឯកឧត្តម លន់ សុធី អនុប្រធានក្រុមការងារថ្នាក់ជាតិចុះជួយឃុំស្លែងស្ពានថា៖ នៅកម្ពុជាយើង វិស័យពុទ្ឋចក្រ និងវិស័យអាណាចក្រ គឺតែងតែដើរទន្ទឹមគ្នាមិនអាចខ្វះមួយណាបានឡើយ។ អាស្រ័យដោយប្រទេសយើងទទួលបានសុខសន្តិភាពពេញលេញ សង្គមជាតិទាំងមូល មានការអភិវឌ្ឍរីកចម្រើនយ៉ាងឆាប់រហ័ស ក្រោមកិច្ចដឹកនាំដ៍ឈ្លាសវៃនិងប៉ិនប្រសព្វ និងក្រោមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាយើងទទួលបានការអភិវឌ្ឍរីកចម្រើនលើគ្រប់វិស័យ ទាំងវិស័យហេដ្ឋារចនាសម្ព័ន្ឋ សេដ្ឋកិច្ច និងសង្គមកិច្ច។ ជាមួយគ្នានេះ វិស័យពុទ្ធចក្រ ត្រូវបានកំណត់ដោយរដ្ឋធម្មនុញ្ញនៃព្រះរាជាណាចក្រកម្ពុជាយើង ដែលចែងថា ព្រះពុទ្ឋសាសនាជាសាសនារបស់រដ្ឋផងដែរ។
ព័ត៌មានជាតិ ថ្មីៗ
ឯកឧត្តម បានសម្តែងនៅការអរគុណ នឹងកោតសរសើរចំពោះព្រះចៅអធិការ ព្រះសង្ឃ គណៈកម្មការ អាចារ្យវត្ត និងបងប្អូនប្រជាពុទ្ធបរិស័ទគ្រប់មជ្ឈដ្ឋានដែលបានសាមគ្គីគ្នា ចូលរួមទាំងកម្លាំងកាយ កម្លាំងចិត្ត និងលះបង់ទ្រព្យធន នាំគ្នារៀបចំជាអង្គកឋិនទាននេះឡើង ដើម្បីរួមចំណែកយ៉ាងសំខាន់ ក្នុងការជួយឱ្យវិស័យពុទ្ឋសាសនាឲ្យកាន់តែរីកចំរើនតទៅទៀត។
ព្រះគ្រូចៅអធិការវត្តសុវណ្ណគិរីកេសធ្លក មានថេរៈដិការថា៖ បច្ច័យអមត្រៃដែលទទួលបានពីអង្គកឋិនទានចំនួន ៦៦លាន ៦សែន ៨ម៉ឺនរៀលនេះ នឹងយកទៅប្រើប្រាស់ក្នុងការសាងសងព្រះវិហារថ្មី ដែលកំពុងដំណើរការសាងសងមិនទាន់រួចរាលទេ នៅខ្វះថវិកាច្រើនទៀត ដូច្នេះព្រះសង្ឃ គណៈកម្មការ អាចារ្យវត្ត បងប្អូនប្រជាពលរដ្ឋ និងពុទ្ធបរិស័ទ នឹងប្រឹងប្រែងជាបន្តបន្ទាប់ទៀត ដើម្បីស្វះស្វែងរកថវិការ ៕
អត្ថបទ និង រូបភាព៖ ស៊ាន សុផាត
