នាព្រឹកថ្ងៃទី២៦ ខែតុលា ឆ្នាំ២០២០នេះ អង្គការក្រុមការងារ ដើម្បីដោះស្រាយទំនាស់ ( ACT ) សហការរៀបចំដោយរដ្ឋបាលខេត្តសៀមរាប និងមន្ទីរព័ត៌មានខេត្តសៀមរាប បានបើកវគ្គបណ្ដុះបណ្ដាល ស្ដីពី ការបំប្លែងទំនាស់ និងការយល់ដឹងពីសារព័ត៌មានបែបសន្តិភាព “ក្រោមវត្តមានឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្ត កញ្ញា ស្រី សុធាវី នាយកាអង្គការក្រុមការងារ ដើម្បីដោះស្រាយទំនាស់(ACT) និងក្រុមការងាររបស់អង្គការជាវាគ្មិន។ វគ្គបណ្ដុះបណ្ដាលនេះ មានរយ:ពេល ២ថ្ងៃពេញ ចាបពីថ្ងៃទី២៦-២៧ ខែតុលា ឆ្នាំ២០២០ គឺមានសិក្ខាកាមជាអ្នកសារព័ត៌មានរដ្ឋ និងឯកជនក្នុងខេត្តចំនួន ៤០នាក់ បានចូលរួមផងដែរ។
មានប្រសាសន៏ក្នុងឱកាសនោះ ឯកឧត្តម លីវ សុខុន បានបញ្ជាក់ថា “វិស័យព័ត៌មាន” គឺជាវិស័យមួយដ៏មានសារៈសំខាន់ ក្នុងការទំនាក់ទំនងរវាងប្រជាពលរដ្ឋ ជាមួយសង្គម និងសេដ្ឋកិច្ចជាតិ និងអន្តរជាតិ តាមរយៈការមើល ការអាន ការស្តាប់ ពីបណ្តាញផ្សព្វផ្សាយនានា ទាំងក្នុងប្រទេស និងក្រៅប្រទេស។ បច្ចុប្បន្ននេះ យើងឃើញថា វិស័យព័ត៌មាននៅក្នុងព្រះ រាជាណាចក្រកម្ពុជា មានសន្ទុះរីកចម្រើនគួជាទីមោទនៈ។ ដូចនេះ ការបញ្ចេញផ្សព្វផ្សាយព័ត៌មានត្រូវមានលក្ខណៈច្បាស់លាស់ មានតម្លាភាព និយាយការពិត មិនបំភ្លើស ឬបោកបញ្ឆោតដល់សាធារណៈជនឡើយ។
ឯកឧត្តម លីវ សុខុន បញ្ជាក់បន្ថែមថា ក្នុងនោះដែរអ្នកសារព័ត៌មាន ត្រូវផ្សព្វផ្សាយឱ្យបានទៀងទាត់ពេលវេលា និងបម្រើផលប្រយោជន៍ដល់មនុស្សទូរទៅ និងមិនបំរើសផលប្រយោយន៍គណបក្សនយោបាយណាមួយឡើយ។ ម្យ៉ាង វិញទៀត មិនត្រូវជេរប្រមាថ ឬធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់បុគ្គល ឬញុះញង់បង្កអំពើ ហិង្សា ឬបាតុភាពផ្សេងៗដែលធ្វើអោយបាត់បង់ស្ថិរភាពសន្តិសុខសង្គមជាតិឡើយ។
ក្នុងឱកាសនោះដែរ ឯកឧត្តម ក៏បានសម្ដែងនូវសេចក្ដីសោមនស្សរីករាយក្រៃលែង ដែលបានចូលរួមក្នុងវគ្គបណ្តុះបណ្តាលនេះ។ ទន្ទឹមនោះឯកឧត្តមសូមថ្លែងអំណរគុណយ៉ាងជ្រាលជ្រៅ ចំពោះ លោកស្រី អស់លោក ដែលបានចំណាយពេលវេលាដ៏មានតម្លៃ អញ្ជើញចូលរួមវគ្គបណ្តុះបណ្តាល ដ៏មានសារសំខាន់នេះ។ ក្នុងនោះដែរ ឯកឧត្តម ក៏បានកោតសសើរ និងវាយតម្លៃខ្ពស់ចំពោះអង្គការក្រុម ការងារដើម្បីដោះស្រាយទំនាស់ (ACT) ដែលបានសហការជាមួយរដ្ឋបាលសាលាខេត្ត មន្ទីរព័ត៌មានខេត្តសៀមរាប បានរៀបចំវគ្គបណ្តុះបណ្តាលនេះឡើង ដែលជាឱកាសសម្រាប់អ្នកសារព័ត៌មានក្នុងខេត្ត បានសិក្សា ផ្លាស់ប្តូរយោបល់ និងបទពិសោធន៍ ដើម្បីលើកកម្ពស់វិស័យព័ត៌មានឱ្យកាន់តែមានភាពប្រសើរឡើងថែមទៀត។ ជាពិសេស ការបំប្លែងទំនាស់ និង ការយល់ដឹងពីសារព័ត៌មានសន្តិភាព៕
អត្ថបទ និង រូបភាព៖ ស៊ាន សុផាត
