ដើមី្បចូលរួមនូវទុក្ខលំបាករបស់រាជរដ្ឋាភិបាលកម្ពុជា ក្នុងពេលប្រជាពលរដ្ឋនៅតាមបណ្តារាជធានី ខេត្ត ជួបនូវគ្រោះជំនន់ទឹកភ្លៀងក្នុងរយៈពេលកន្លងមកនេះ បានធ្វើឲ្យខូចខាតនូវហេដ្ឋរចនាសម្ព័ន្ធផ្លូវថ្នល់ លិចលង់លំនៅដ្ឋានរបស់ប្រជាពលរដ្ឋ ដែលធ្វើឲ្យបងប្អូនជួបនូវការខ្វះខាត ជាស្បៀងអាហារប្រចាំថ្ងៃ ដូច្នេះរដ្ឋបាលខេត្តបានយកចិត្តទុកដាក់ និងខិតខំរកជំនួយសប្បុរស ដើម្បីជួយដល់ពួកគាត់ ជាក់ស្ដែងនៅរសៀលថ្ងៃទី២៦ ខែតុលា ឆ្នាំ២០២០នេះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ទទួលអំណោយពីក្រុមហ៊ុនទឹករ៉ែធម្មជាតិ អូ គូលែន (EAU KULEN) ដោយអំណោយទាំងនោះរួមមាន ថវិកាចំនួន៤,០០០,០០០រ (បួនលានរៀល) ,អង្កចំនួន៧តោន ,មីម៉ាម៉ា ចំនួន៣៥០កេស ,ទឹកស៊ីអ៊ីវចំនួន៣៥០កេស ,ទឹកត្រីចំនួន៣៥០កេស ,ត្រីខកំប៉ុងចំនួន៣៥០កេស និងទឹកបរិសុទ្ធអូគូលែនចំនួន៥០កេស ។
បើតាមតំណាងក្រុមហ៊ុនទឹករ៉ែធម្មជាតិ អូ គូលែន (EAU KULEN) បានបញ្ជាក់ថា ក្រោមការអំពាវនាវរបស់ប្រមុខរាជរដ្ឋាភិបាលកម្ពុជា ក៏ដូចអាជ្ញាធរខេត្តសៀមរាប ក្នុងការចូលរួមឧបត្ថម្ភជាស្បៀងអាហារ សម្ភារក្នុងការជួយដល់ប្រជាពលរដ្ឋរង គ្រោះដោយជំនន់ទឹកភ្លៀង សំខាន់ប្រជាពលរដ្ឋដែលរស់នៅក្នុងខេត្តសៀមរាប ដែលមានស្រុកមួយចំនួនទទួលរងផលប៉ះពាល់ទឹកជន់លិច បានធ្វើឲ្យប៉ះពាល់ដល់ជីវភាពរស់នៅប្រចាំថ្ងៃប្រជាពលរដ្ឋ ។
មានប្រសាសន៍នាឱកាសនេះដែរ ឯកឧត្តម ទៀ សីហា ក៏បានធ្វើការថ្លែងអំណរគុណ ដល់ទឹកចិត្តដ៏សប្បុរសធម៌របស់ក្រុមហ៊ុនទឹករ៉ែធម្មជាតិ អូ គូលែន (EAU KULEN) ដែលបានផ្តល់អំណោយ ជាថវិកា និងគ្រឿងឧបភោគបរិភោគដល់រដ្ឋបាលខេត្តសៀមរាប ក្នុងពេលដែលមានស្រុកមួយចំនួនបានទទួលរងផលប៉ះពាល់ដោយទឹកជំនន់ទឹកភ្លៀង ហើយប្រជាពលរដ្ឋជាច្រើនគ្រួសារក៏កំពុងទទួលរងនូវផលប៉ះពាល់ដោយសារជំនន់ទឹកភ្លៀង។ ជាមួយគ្នានោះដែរ អាជ្ញាធខេត្ត គឺតែងយកចិត្តទុកដាក់ខ្ពស់ជាប្រចាំ ក្នុងការចុះទៅដល់មូលដ្ឋានស្រុកមួយចំនួនដែល ទទួលរងគ្រោះធម្មជាតិដោយជំនន់ទឹកភ្លៀង បានធ្វើឲ្យប៉ះពាល់លំនៅដ្ឋាន និង ផលដំណាំប្រជាពលរដ្ឋយ៉ាងធ្ងន់ធ្ងរហើយមកដល់ថ្ងៃនេះ បើស្ថានភាពភ្លៀងនៅតែបន្តធ្លាក់មកទៀត ក៏នឹងធ្វើឲ្យកាន់តែប៉ះពាល់កាន់តែធ្ងន់ឡើង ។
ឯកឧត្តម ទៀ សីហា មានប្រសាសន៍បន្តទៀតថា ក្នុងនាមជាគណៈបញ្ជាការឯកភាពរដ្ឋបាលខេត្ត បានដាក់នូវវិធានការមួយចំនួនដល់គណៈ បញ្ជាការឯកភាពរដ្ឋបាលស្រុក ដើមី្បត្រៀមបង្ក ក្នុងការសង្រ្គោះប្រជាពលរដ្ឋ និងសត្វពាហនៈរបស់បងប្អូនទៅកាន់ទីទួលសុវត្ថិភាព ព្រមទាំងឲ្យយកចិត្តទុកដាក់ខ្ពស់លើបញ្ហាសុខភាពបងប្អូន និងមិនទុកឲ្យបងប្អូនណាម្នាក់ស្លាប់ដោយអាជ្ញាធរមិនដឹងនោះឡើយ។ ក្នុងនោះដែរឯកឧត្តមក៏បានសំណូមពរដល់ក្រុមហ៊ុន បន្តនូវប្រពៃណីចែករំលែកនេះ ទៅតាមបណ្តាខេត្ត ក្រុង ស្រុកផ្សេងទៀតដែលរងផលប៉ះពាល់ ហើយអំណោយទាំងនេះឯកឧត្តម នឹងយកទៅចែកជូនដល់បងប្អូនប្រជាពលរដ្ឋរងគ្រោះ និងងាយរងគ្រោះក្នុងពេលមានជំនន់ទឹកភ្លៀងនេះផងដែរ៕
អត្ថបទ និង រូបភាព៖ ខេង ឧត្តម
