សមាជិកាសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ មានមោទនភាព ដែលបានចូលរួមបន្តវេនជាទំពាំងស្នងឬស្សី នៃចលនាសមាគមនារីសង្គ្រោះជាតិកម្ពុជា ហើយអ្វីដែលកំពុងសកម្មអនុវត្ត គឺការលើកកម្ពស់តម្លៃស្រ្តី នៅក្នុងការងារនយោបាយ សេដ្ឋកិច្ច សង្គម និងមនុស្សធម៌។
សមាជិកាថ្នាក់កិត្តិយសចំនួន២៩រូប និងសមាជិកាប្រតិបត្តិចំនួន២៤រូបទៀត ត្រូវបានប្រកាសទទួលស្គាល់ ដើម្បីបំពេញបន្ថែមសមាសភាព ក្នុងរចនាសម្ព័ន្ធរបស់គណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តសៀមរាប នាព្រឹកថ្ងៃទី២៥ ខែតុលា ឆ្នាំ២០២០ ក្រោមវត្តមានឯកឧត្តម អុឹង ហឿន ប្រធានក្រុមប្រឹក្សាខេត្ត និងលោកជំទាវ ឯកឧត្តម ទៀ សីហា អភិបាលខេត្ត និងលោកជំទាវ រួមទាំងមន្រ្តីសំខាន់ៗជាច្រើនរូបទៀត។
សមាគមនារីកម្ពុជាដើម្បីសន្តិភាព និងអភិវឌ្ឍន៍ គឺជាអង្គការមហាជន ស្ថិតក្រោមការដឹកនាំរបស់រាជរដ្ឋាភិបាល ដែលបានបំពេញបេសកកម្មរបស់ខ្លួនបន្តវេនពីសមាគមនារីសង្គ្រោះជាតិកម្ពុជា។ នេះបើយោងតាមការលើកបង្ហាញនៅក្នុងសន្ទរកថារបស់លោកជំទាវ ស៊ិន ណម សមាជិកាក្រុមប្រឹក្សាខេត្ត ប្រធានគណៈកម្មការប្រតិបត្តិ នៃគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តសៀមរាប។ លោកជំទាវ ក៏បានបញ្ជាក់ឲ្យដឹងបន្ថែមថា ថ្ងៃ២ធ្នូ ឆ្នាំ១៩៧៨ គឺជាថ្ងៃចាប់បដិសន្ធិរបស់សមាគមដ៏សកម្មមួយនេះ ស្របគ្នាជាមួយនឹងថ្ងៃកំណើតរណសិរ្សសាមគ្គីសង្គ្រោះជាតិកម្ពុជា និងក្នុងកាលៈទេសៈដែលប្រទេសកម្ពុជាកំពុងរងគ្រោះ ដែលបង្កឡើងដោយរបបប្រល័យពូជសាសន៍។
សន្ទរកថានោះបានបញ្ជាក់បន្ថែមថា តួនាទី ភារកិច្ច និងសកម្មភាពរបស់សមាគមត្រូវបានវិវត្តន៍ ប្រែប្រួល ទៅតាមកាលៈទេសៈ និងស្ថានភាពនយោបាយរបស់ប្រទេសជាតិ និងមានរចនាសម្ព័ន្ធតាំងពីថ្នាក់កណ្តាល រាជធានី ខេត្ត ក្រុងស្រុក ឃុំសង្កាត់ និងមានសកម្មជននារីរាប់លាននាក់ ក្នុងនោះសមាគមនារីខេត្តសៀមរាប ត្រូវបានបង្កើតឡើងនៅក្នុងខែមករា ឆ្នាំ១៩៨០។ សមាគមនារីកម្ពុជាដើម្បីសន្តិភាពនិងអភិវឌ្ឍន៍ បានចុះបញ្ជីនៅក្រសួងមហាផ្ទៃ ថ្ងៃទី២៦ ខែឧសភា ឆ្នាំ២០០០។
លោកជំទាវ ទាង អេង ទៀ សីហា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តសៀមរាប បានបង្ហាញនូវក្តីមោទនភាពក្រៃលែង ដែលបានចូលរួមបន្តវេន និងបំពេញភារកិច្ចដ៏ឧត្តុងឧត្តម នៃសមាគមនារីដែលមានប្រវត្តិកាល បង្កប់ដោយចលនាតស៊ូដើម្បីជាតិនិងប្រជាជន។
ជាការពិតចំនួននារីជាង៥០ភាគរយ ជាកម្លាំងចលករដ៏ខ្លាំងក្លាមួយក្នុងការរួមចំណែកអភិវឌ្ឍន៍សង្គមជាតិទាំងមូល ដែលចំាបាច់ត្រូវតែយកចិត្តទុកដាក់ជួយគ្រប់គ្រងថែរក្សាការពារនិងលើកស្ទួយ រួមសុខទុក្ខជាមួយគ្នា។ ច្បាស់ណាស់ថា រហូតមកបច្ចុប្បន្ននេះ សមាគមនារីកម្ពុជាដើម្បីសន្តិភាព និងអភវឌ្ឃន៍ នៅតែរក្សាបាននូវការដឹកនាំ ម្ចាស់ការ ពង្រឹងចិញ្ចឹមចលនារបស់ខ្លួន និងសហការជាមួយដៃគូអភិវឌ្ឍន៍ គាំទ្រយ៉ាងមុតមាំលើការអនុវត្តកម្មវិធីនយោបាយរបស់រាជរដ្ឋាភិបាល ដែលបាននាំមកយ៉ាងពិតប្រាកដនូវសន្តិភាព ស្ថិរភាពនយោបាយ និងធ្វើឲ្យស្ថានភាពជីវភាព ឋានៈ និងតួនាទីរបស់ស្រ្តីកាន់តែប្រសើរឡើង។
ឯកឧត្តម ទៀ សីហា អភិបាលខេត្តសៀមរាប បង្ហាញនូវការវាយតម្លៃថា៖ ឆ្លងកាត់ការដឹកនាំ និងជម្រុញសកម្មភាពនៅតាមបណ្តាមូលដ្ឋានកន្លងមក សង្កេតឃើញថា ស្ត្រីបានចូលរួមទាំងលើការងារនយោបាយ សេដ្ឋកិច្ចសង្គម និងកិច្ចសហការជាមួយអជ្ញាធរមូលដ្ឋាន អង្គការដៃគូរអភិវឌ្ឍន៍នានា ដើម្បីរួមចំណែកលើការថែរក្សាសមិទ្ធផលរបស់សង្គមជាតិ និងបានចូលរួមអភិវឌ្ឍន៍សេដ្ឋកិច្ចគ្រួសារ និងសង្គម បង្កើនបាននូវចំណេះដឹង ស្ដីពីតួនាទី សិទ្ធិរបស់ស្ត្រី ទាំងមានចំណេះដឹងក្នុងការថែទាំសុខភាព ដែលទាំងអស់នោះ គឺសុទ្ធតែបានចូលរួមចំណែកយ៉ាងសកម្ម ឆ្លើយតបទៅនឹង សេចក្តីត្រូវការក្នុងជីវភាពរស់នៅរបស់បងប្អូនប្រជាពលរដ្ឋ ជាពិសេសផលប្រយោជន៍របស់ស្រី្ត និងកុមារ ជាមួយនឹងអ្វី ដែលកំពុងសកម្មអនុវត្តន៍ បច្ចុប្បន្ននេះ គឺចលនាសប្បុរសធម៌ គាំទ្រយ៉ាងពេញទំហឹង បេសកកម្មមនុស្សធម៌ នៃចលនាកាកបាទក្រហមកម្ពុជា។
យ៉ាងណាក៏ដោយ ក៏ត្រូវតែបង្កើនកម្លាំងមហាសាមគ្គី ចូលរួមអនុវត្តកម្មវិធីនយោបាយរាជរដ្ឋាភិបាល ឲ្យកាន់តែមានប្រៀបឈ្នះជានិច្ចនិរន្តន៍ ហើយដើម្បីសម្រេចបាននូវកិច្ចការខាងទាំងនេះ គឺត្រូវផ្សព្វផ្សាយឲ្យបានទូលំទូលាយ គោលនយោបាយរបស់រាជរដ្ឋាភិបាលចំពោះស្រ្តី និងព័ត៍មានសំខាន់ៗ ដែលពាក់ព័ន្ធដល់ជីវភាព សុខភាព និងការត្រៀមបង្កាផ្សេងៗ។ ក៏ជាការចាំផងដែរ គឺការច្នៃប្រឌិត គៀងគរប្រមូលផ្តុំកម្លាំងគំាទ្រថែមទៀត ដើម្បីទ្រទ្រង់ដល់ចលនា សកម្មភាពនានារបស់សាខាសមាគម ហើយអ្វីដែលមិនអាចមើលរំលងបាននោះគឺ ការតាមដាននិងប្រមូលព័ត៍មានអំពីស្ថានភាពស្ត្រីងាយរងគ្រោះស្រ្តីដែលជួបវិបត្តិផ្សេងៗ លើកទឹកចិត្ត និងជួយដោះស្រាយឱ្យបានទាន់ពេលវេលា។
អត្ថបទ និងរូបភាព : លោក ងិន គឹមឡេង
