នៅព្រឹកថ្ងៃទី២៤ ខែតុលា ឆ្នាំ២០២០នេះ ប្រជាពលរដ្ឋចំនួន ៣០០គ្រួសារ ដែលទទួលរងនូវផលប៉ះពាល់ដោយសារជំនន់ទឹកភ្លៀង មកពីភូមិចំនួន០៦ គឺ៖ ភូមិពាក់ស្លែងថ្មី ភូមិពាក់ស្នែងចាស់ ភូមិសណ្តាន់ ភូមិជប់សោម ភូមិលៀប និងភូមិខ្ទីង បានទទួលអំណោយពីក្រុមកាងារថ្នាក់ជាតិចុះជួយឃុំពាក់ស្លែង
ដោយពិធីនេះប្រព្រឹត្តិទៅក្នុងវត្ត សប្បុរិសារាម ហៅវត្តខ្នាច់ត្រាច ស្ថិតក្នុងឃុំពាក់ស្នែង ស្រុកនរគធំ ខេត្តសៀមរាប ក្រោមអធិបតីភាព ឯកឧត្តម ខៀវ ឆេន ប្រធានក្រុមកាងារថ្នាក់ជាតិចុះជួយឃុំពាក់ស្លែង ស្រុកអង្គរធំ ឯកឧត្តម ស ថាវី អនុរដ្ឋលេខាធិការក្រសួងការពារជាតិ ជាប្រធានកិត្តិយស ក្រុមកាងារថ្នាក់ជាតិចុះជួយ ឃុំពាក់ស្លែង ស្រុកអង្គរធំ ឯកឧត្តម ផៃ សុខខេង នាយករងខុទ្ទការល័យសម្តេចពិជ័យសេនា ទៀ បាញ់ និង ជាអនុប្រធានក្រុមការងាររាជរដាភិបាល ឧកញ៉ា ឡេង ចាន់ណា អគ្គនាយកក្រុមហ៊ុន បូរី សុកគា ស៊ីធី និងក្រុមការងារចុះមូលដ្ឋាន ជាច្រើននាក់បានអញ្ជើញចូលរួម។
ក្នុងឪកាសនោះដែរ ឯកឧត្តម ស ថាវី មានប្រសាសន៏ថា ក្នុងរយ:ពេលប៉ុន្មានថ្ងៃកន្លងមក ក្នុងខេត្តសៀមរាបក៏ដូចជានៅតាមបណ្តាខេត្តមួយចំនួននៃព្រះរាជាណាចក្រកម្ពុជា បានទទួលរងនូវបញ្ហាជំនន់ទឹកភ្លៀង ដោយក្នុងនោះដែលបងប្អូនប្រជាពលរដ្ឋច្រើនបានទទួលរងនូវផលប៉ះពាល់ដោយសារជំនន់ទឹកភ្លៀងនេះ។ ជាមួយគ្នានេះដែរប្រមុខនៃរាជរដ្ឋាភិបាលកម្ពុជា ក្រោមការដឹកនាំនាំដោយ សម្ដេចអគ្គមហាសេនាបតិតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ខ្ពស់លើបញ្ហាសុខភាពចំពោះបងប្អូនប្រជាពលរដ្ឋ ដែលកំពុងជួបប្រទះនៅផលប៉ះពាល់ដោយសារជំនន់ទឹកភ្លៀង ដោយមិនទុកឲ្យបងប្អូនណាម្នាក់ បានស្លាប់ដោយអាជ្ញាធរមិនអើពើនោះឡើយ។ ក្នុងនោះដែរឯកឧត្តម ក៏បានសំណូមពរដល់ក្រុមហ៊ុននានា សូមបន្តនូវប្រពៃណីចែករំលែកនេះ ទៅតាមបណ្តាខេត្តក្រុង ស្រុកផ្សេងៗទៀត ដែលរងផលប៉ះពាល់ ដើម្បីចូលរួមចំណែកកាត់បន្ថយនៅភាពខ្វះខាតរបស់បងប្អូនប្រជាពលរដ្ឋរងគ្រោះ និងងាយរងគ្រោះក្នុងពេលមានជំនន់ទឹកភ្លៀងនេះ។
ឯកឧត្តម ស ថាវី មានប្រសាសន៍បន្ថែមថា សម្រាប់បញ្ហាមួយទៀតនោះ គឺជំងឺកូវីត១៩ បើទោះបីជានៅកម្ពុជាមានស្ថានភាពល្អប្រសើរយ៉ាងណាក៏ដោយ ក៏ប៉ុន្តែពិភពលោកមិនទាន់ឆ្លងផុតគ្រោះថ្នាក់ នៃវិបត្តិរាតត្បាតដោយជម្ងឺកូវីត-១៩នៅឡើយនោះទេ ដោយក្នុងនោះស្ថាប័នជំនាញជាតិ និងអន្តរជាតិ បានក្រើនរំលឹក ឲ្យប្រជាពលរដ្ឋកម្ពុជា បន្តការយកចិត្តទុកដាក់អនុវត្តលើគ្រប់វិធានការទាំងឡាយ និងរួមគ្នាពង្រឹងបន្ថែមទៀតស្មារតីប្រយុទ្ធប្រឆាំងការចម្លងវារុសកូវីត-១៩ឲ្យខ្លាំងខ្លាបំផុត។ ក្នុងនោះតែសូមបងប្អូនប្រជាពលរដ្ឋយើង កុំមានការធ្វេសប្រហែសឲ្យសោះ គឺត្រូវចូលរួមក្នុងការទប់ស្កាត់ និងការពារចំពោះបញ្ហាជំងឺកូវីត១៩នេះឲ្យបានល្អ ដើម្បីកុំឲ្យប្រទេសកម្ពុជាយើង មានករណីឆ្លងថ្មីនៅក្នុងមូលដ្ឋាន។
សូមបញ្ជាកថា អំណោយមនុស្សដែលក្រុមការងារចែកជូនដល់ប្រជាពលរដ្ឋ ដែលរងគ្រោះដោយសារជំនន់ទឹកភ្លៀងទាំង៣០០គ្រួសារ នាឱកាសនោះ ដោយក្នុងមួយគ្រួសារៗ ទទួលអង្ក១០ គីឡូក្រាម ទឹកត្រី ទឹកស៊ីអ៊ីវ និងថវិកាចំនួន២ម៉ឺនរៀល ៕
អត្ថបទ និង រូបភាព៖ ខេង ឧត្តម
