នៅថ្ងៃទី០៨ ខែវិច្ចិកា ឆ្នាំ២០២០នេះ ឯកឧត្តមបណ្ឌិត ហុង សុខជា ទីប្រឹក្សាក្រសួងព័ត៌មាន តំណាងឯកឧត្តម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាល ចុះជួយស្រុកក្រឡាញ់ បានចុះពិនិត្យមើលស្ថានភាព ប្រមូលផលគម្រោងសាកល្បងចិញ្ចឹមកង្កែប និងដាំឫស្សីទំពាំងផ្អែម ជំហានទី១ ដែលជាគម្រោងលើកកម្ពស់ជីវភាពគ្រួសារក្រីក្រ ប្រភេទក្រ១ និងក្រ២ ស្ថិតក្នុង ឃុំតាអាន ស្រុកក្រឡាញ់ ខេត្តសៀមរាប។
ឯកឧត្តមបណ្ឌិត ហុង សុខជា លើកឡើងថា បន្ទាប់ពីផ្ដួចផ្ដើមឲ្យមានគម្រោងសាកល្បងនេះគឺ ឯកឧត្តម ជា ច័ន្ទបរិបូរណ៍ តែងតែយកចិត្តទុកដាក់ខ្ពស់ និងណែនាំដល់ក្រុមការងារចុះមកពិនិត្យស្ថានភាព ការអនុវត្តគម្រោងរបស់ប្រជាពលរដ្ឋ ដើម្បីធានាបានថា នៅពេលបញ្ចប់គម្រោង ប្រជាពលរដ្ឋ នឹងទទួលបានប្រាក់ចំណូល និងចំណេះដឹង។
លោក សុខ ណារ៉េត អភិបាលរងស្រុក តំណាងលោកស្រីអភិបាលស្រុកក្រឡាញ់ បានថ្លៃងអំណរគុណដល់ ឯកឧត្តម ជា ច័ន្ទបរិបូណ៌ និងក្រុមការងារ ដែលបានបង្កើត គម្រោងចិញ្ចឹមកង្កែប និងដាំឫស្សីទំពាំងផ្អែម សម្រាប់ជួយលើកកម្ពស់គ្រួសារក្រីក្រក្នុងស្រុកក្រឡាញ់។
តាមការបញ្ជាក់របស់លោកអភិបាលរង បច្ចុប្បន្ន គម្រោងចិញ្ចឹមកង្កែបសម្រាប់ ១០គ្រួសារនេះ បានប្រមូលផល និងលក់បាន ចំនួនប្រាំគ្រួសាររួចមកហើយ រីឯប្រាំគ្រួសារទៀត កំពុងតែប្រមូលផលជាបន្តបន្ទាប់។ ក្នុងនោះដៃគូ ដែលទទួលទិញ អាជីវករផ្សារលើ ក្រុងសៀមរាប និងហាងមួយចំនួនទៀត។ ដោយឡែក ការដាំឫស្សីទំពាំងផ្អែម កំពុងលូតលាស់ល្អ ហើយវាត្រូវការរយ:ពេលប្រមាណ៨ខែទើបទទួលបានផលទំពាំង។
អត្ថបទ និង រូបភាព៖ ធន់ ពូថេ
