អាជ្ញាធរខេត្តសៀមរាប ព្រមានចាត់វិធានការច្បាប់ដល់មណ្ឌលកម្សាន្តនានា ដែលពុំទាន់បិទតាមសេចក្ដីជូនដំណឹងរបស់ក្រសួងសុខាភិបាល
នៅយប់ថ្ងៃទី០៩ ខែវិច្ឆិកា ឆ្នាំ២០២០ លោក ពៅ ពិសិដ្ឋ អភិបាលរងខេត្តសៀមរាប បានដឹកនាំក្រុមការងារចម្រុះចុះពិនិត្យស្ថានភាព មណ្ឌលកម្សាន្តរួមមាន ក្លឹបកំសាន្ត ខារ៉ាអូខេ រង្គសាល ឌីស្តូតែក និងបៀរហ្គាឌិន ក្នុងក្រុង ដើម្បីណែនាំជាលើកចុងក្រោយ និងធ្វើការផ្អាកដំណើរការ ឬដកអាជ្ញាបណ្ណមណ្ឌលកម្សាន្តទាំងនោះ ក្នុងករណី មិនអនុវត្តន៍ តាមសេចក្ដីជូនដំណឹងរបស់ក្រសួងសុខាភិបាល ស្ដីពី ការបិទ KTV ក្លឹបកម្សាន្ត រោងភាពយន្ត និងសារមន្ទីរ នៅទូទាំងប្រទេស ក្នុងស្ថានភាពជំងឺកូវីដ១៩ កំពុងរីករាលដាលជាសកល កាលពីថ្ងៃទី០៨ ខែវិច្ឆិកា ឆ្នាំ២០២០។
លោកអភិបាលរងខេត្ត បញ្ជាក់ថា ចាប់ពីថ្ងៃទី១០ ខែវិច្ឆិកា ឆ្នាំ២០២០ មណ្ឌលកម្សាន្តខាងលើត្រូវបិទជាបណ្ដោះអាសន្ន រហូតដល់មានសេចក្ដីជូនដំណឹង ពីការអនុញ្ញាតឲ្យបើកដំណើរការជាថ្មី ពីរាជរដ្ឋាភិបាលកម្ពុជា។ ចំពោះ មណ្ឌលកម្សាន្ត ក្នុងខេត្តសៀមរាប ដែលពុំអនុវត្តតាមសេចក្ដីជូនដំណឹងខាងលើ អាជ្ញាធរ នឹងនឹងចុះបិទ ឬដកអាជ្ញាបណ្ណតែម្ដង។
ព័ត៌មានជាតិ ថ្មីៗ
គួររំលឹកថា សេចក្ដីជូនដំណឹង ស្ដីពី ការបិទ KTV ក្លឹបកម្សាន្ត រោងភាពយន្ត និងសារមន្ទីរ នៅទូទាំងប្រទេសនេះ បន្ទាប់ពី រកឃើញវិជ្ជមានជំងឺកូវីដ-១៩ លើរដ្ឋមន្រ្តីក្រសួងការបរទេស និងពាណិជ្ជកម្មហុងគ្រី ខណៈឯកឧត្តម បានទៅទស្សនកិច្ចនៅប្រទេសថៃ នៅថ្ងៃទី០៤ ខែវិច្ឆិកា កន្លងទៅ។
អត្ថបទ និង រូបភាព: ឃុត សៅ
កែសម្រួលអត្ថបទ: សេង ផល្លី
