អាជ្ញាធរខេត្តសៀមរាប បង្ហាញនូវការគាំទ្រចំពោះគម្រោងជំនាញដើម្បីភាពជោគជ័យ ព្រោះនឹងធ្វើឲ្យជនងាយរងគ្រោះ ទទួលបានការងារសមរម្យ និងបង្កើននូវប្រាក់ចំណូល ឬ ការប្រកបមុខរបរដោយខ្លួនឯង
លោក នាក់ ណេរ៉ុន អភិបាលរងខេត្តសៀមរាប បានមានប្រសាសន៍ថា គម្រោងជំនាញដើម្បីភាពជោគជ័យ គឺជាគម្រោងល្អមួយ ព្រោះគម្រោងនេះ បានធ្វើការអប់រំបណ្តុះបណ្តាលបច្ចេកទេស និងវិជ្ជាជីវៈឱ្យកាន់តែប្រសើរឡើង និងបង្កើតឱកាសទទួលបានការងារសមរម្យ និងបង្កើនប្រាក់ចំណូលដល់យុវជនទាំងបុរសនិងស្ត្រី ដែលជាជនងាយរងគ្រោះ ពិសេសអ្នកដែលមានកម្រិតជំនាញនៅទាបនៅឡើយ ទទួលបានជំនាញស្នូល ជំនាញទន់ សហគ្រិនភាព ហើយភ្ជាប់ពួកគេទៅនឹងការងារដែលទទួលបានប្រាក់ឈ្នួល ឬ ប្រកបមុខរបរដោយខ្លួនឯង ដូច្នេះ ដើម្បីសម្រេចបាននូវគោលដៅនេះ ទាមទារត្រូវមានការអភិវឌ្ឍគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ប្រកបដោយកិច្ចសហការគ្រប់ភាគីពាក់ព័ន្ធ និង គ្រប់ជ្រុងជ្រោយ រួមទាំងការជំរុញវិធីសាស្រ្តនវានុវត្តន៍សម្រាប់ការអភិវឌ្ឍជំនាញ និង ស្វែងរកដំណោះស្រាយលើបញ្ហាជាមូលដ្ឋាននៅក្នុងទីផ្សារការងារ ។
លោក នាក់ ណេរ៉ុន មានប្រសាសន៍យ៉ាងដូច្នេះក្នុងពិធីបើកសិក្ខាសាលា ស្តីពីការផ្សព្វផ្សាយដាក់ឱ្យដំណើរការគម្រោងជំនាញដើម្បីភាពជោគជ័យ នៅសាលប្រជុំសាលាខេត្តសៀមរាប នាព្រឹកថ្ងៃទី១០ ខែវិច្ឆិកា ឆ្នាំ២០២០នេះ។
ក្នុងឱកាសនោះដែរ លោក នាក់ ណេរ៉ុន បានអំពាវនាវដល់អាជ្ញាធរមូលដ្ឋាន ទាំងនៅថ្នាក់ស្រុក ក្រុង ឃុំ សង្កាត់ និង ភូមិ ត្រូវចូលរួមសហការក្នុងការផ្សព្វផ្សាយ រួមទាំងការជ្រើសរើសក្រុមយុវជនឱ្យសមស្របតាមលក្ខណៈវិនិច្ឆ័យរបស់គម្រោង ហើយត្រូវពង្រីកកិច្ចសហការជាមួយវិស័យឯកជនក្នុងការបណ្តុះបណ្តាលសិក្ខាកាម ពិសេសគ្រប់ភាគីពាក់ពន្ធ័ទាំងអស់ ត្រូវរួមគ្នាសហការអនុវត្តគម្រោងជំនាញដើម្បីភាពជោគជ័យនេះ ឱ្យទទួលបានលទ្ឋផលល្អប្រសើរ ។
លោក យី គីមថាន នាយករងប្រចាំប្រទេសផ្នែកកម្មវិធី នៃអង្គការភ្លែនអន្តរជាតិកម្ពុជា មានប្រសាសន៍ថា ភាពខ្វះខាតនូវជំនាញកម្រិតទាប និងមធ្យមក្នុងប្រទេសកម្ពុជា មិនអាចឆ្លើយតបទៅនឹងតម្រូវការតាមវិស័យបានទេ ហើយអាចបង្កទៅជាការគំរាមកំហែងដល់វឌ្ឍនភាព និងការអភិវឌ្ឍ ដូច្នេះគម្រោងនេះ នឹងគាំទ្រដល់យុវជនងាយរងគ្រោះ ក្នុងនោះទៅលើអនីតិជនអាយុពី១៥ ទៅ១៧ឆ្នាំ និង យុវជនអាយុពី១៨ ទៅ២៤ឆ្នាំ ដើម្បីផ្តល់ជំនាញដែលឆ្លើយតបទៅនឹងតម្រូវការទីផ្សារការងារ ដើម្បីទទួលបានការងារសមប្រកប ព្រោះថា ពេញមួយគម្រោង យុវជនងាយរងគ្រោះ ជាពិសេស ស្ត្រីវ័យក្មេង ក្នុងខេត្តសៀមរាប និងរតនគិរី នឹងទទួលបានការបណ្តុះបណ្តាលជំនាញដែលឆ្លើយតបទៅនឹងទីផ្សារការងារ និងការងារកាន់តែសមប្រកប នៅក្នុងបរិយាកាសគាំទ្រពេញលេញ ប្រកបដោយសមភាពយេនឌ័រ ។
សូមបញ្ជាក់ថា ក្រោមជំនួយពីក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (BMZ) និងអង្គការភ្លែនអន្តរជាតិ អាល្លឺម៉ង់ គម្រោងជំនាញដើម្បីភាពជោគជ័យ ត្រូវបានចាប់ផ្តើមការអនុវត្តនៅថ្ងៃទី៥ ខែវិច្ឆិកា សម្រាប់ខេត្តរតនគិរី និងនៅថ្ងៃទី១០ ខែវិច្ឆិកា សម្រាប់ខេត្តសៀមរាប ក្រោមកិច្ចសហប្រតិបត្តិការរវាសមាគមបណ្តុះកុមារ (BK) , វិទ្យាស្ថានពហុបច្ចេកទេសភូមិភាគតេជោសែនខេត្តសៀមរាប និងមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគិរី ហើយត្រូវអនុវត្តក្នុងរយៈពេល៣ឆ្នាំ គឺឆ្នាំ២០២០-២០២៣ ដែលនឹងរួមចំណែកធ្វើឱ្យប្រសើរឡើងនូវផ្នែកសេដ្ឋកិច្ច និងលើកកម្ពស់សមភាពយេនឌ័រដល់យុវជនងាយរងគ្រោះក្នុងខេត្តទាំងពីរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
