លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍ថា ឆ្នាំ២០២០នេះ ជាឆ្នាំដែលពិភពលោកទាំងមូលកំពុងរងគ្រោះដោយសារជំងឺកូវីដ-១៩ ដែលមកដល់បច្ចុប្បន្ន ស្ថានភាពនៃជំងឺកូវីដ-១៩នេះ នៅតែមានសភាពស្រួចស្រាវ ដែលធ្វើចំនួនអ្នកឆ្លង និងស្លាប់ថ្មីនៅតែមានចំនួនច្រើន ហើយបើយោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ជាង៥១លាននាក់ ក្នុងនោះអ្នកស្លាប់មានចំនួនជាង ១លាន២សែននាក់ ខណៈអ្នកជាសះស្បើយឡើងវិញជាង ៣៦លាននាក់ ដូច្នេះតួលេខទាំងអស់នេះ ក៏បានរាប់ទាំងប្រទេសកម្ពុជាយើងផងដែរ ។
លោក ពៅ ពិសិដ្ឋ មានប្រសាសន៍បន្ថែមថា ដោយសារការរាតត្បាតជាសកលនៃជំងឺកូវីដ-១៩នេះ បានធ្វើឱ្យប្រជាពលរដ្ឋយើងមួយចំនួនបាត់បង់ការងារធ្វើ និងប៉ះពាល់ដល់សេដ្ឋកិច្ចជីវភាពរស់នៅប្រចាំថ្ងៃរបស់ពួកគាត់ ដូច្នេះស្ថិតក្នុងដំណាក់កាលនេះ សូមប្រជាពលរដ្ឋទាំងអស់ រៀនរស់នៅដោយបន្សាំខ្លួនទៅក្នុងបរិបទនៃវិបត្តិកូវីដ-១៩នេះ ដោយអនុវត្តតាមគោលការណ៍ណែនាំរបស់ក្រសួងសុខាភិបាល ដូចជាការលាងសម្អាតដៃឱ្យបានស្អាតជាប្រចាំ , ពេលចេញដើរខាងក្រៅ ឬទៅតាមទីប្រជុំជនត្រូវពាក់ម៉ាស់ និង រក្សាគម្លាតសុវត្ថិភាព ជាដើម ព្រោះថា យើងអាចភ្លេចកូវីដបាន តែកូវីដមិនដែលភ្លេចយើងទេ ជាពិសេសសម្រាប់បងប្អូនដែលចង់ធ្វើការចំណាកស្រុកទៅប្រទេសក្រៅ គួរបឈ្ឈប់សិនទៅ ហើយងាកមកធ្វើកសិកម្មនៅតាមភូមិស្រុករបស់យើងវិញ ព្រោះស្ថិតនៅក្នុងបរិបទនៃកូវីដនេះ មានតែវិស័យកសិកម្មទេដែលអាចទ្រទ្រង់ជីវភាពរបស់បងប្អូនបាន ។
លោក ពៅ ពិសិដ្ឋ អភិបាលរងខេត្តសៀមរាប បានមានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីចែកគ្រឿងឧបភោគបរិភោគដែលជាអំណោយរបស់សាលាវេស្ទើន ជូនប្រជាពលរដ្ឋចំនួន៩០គ្រួសារ ដែលរងផលប៉ះពាល់ដោយទឹកជំនន់ នៅស្រុកអង្គរជុំ កាលពីថ្ងៃទី០៩ ខែវិច្ឆិកា ឆ្នាំ២០២០ ម្សិលមិញនេះ ។
ជាមួយគ្នានោះដែរលោកអភិបាលរងខេត្តសៀមរាប បានថ្លែងនូវការអរគុណចំពោះសាលាវេស្ទើនដែលបានជួយឧបត្ថម្ភជាស្បៀងអាហារជូនដល់ប្រជាពលរដ្ឋដែលរងផលប៉ះពាល់ដោយទឹកជំនន់នៅស្រុកអង្គរជុំនាពេលនេះ ដែលសកម្មភាពនេះ បង្ហាញឲ្យឃើញពីទឹកចិត្តសប្បុរសធម៌ និង ការចូលរួមចំណែកជាមួយរាជរដ្ឋាភិបាល ក្នុងការជួយសម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋ ដែលរងផលប៉ះពាល់ដោយទឹកជំនន់ ព្រោះថា ក្រៅពីការរងគ្រោះដោយសារជំងឺកូវីដ-១៩ ខេត្តសៀមរាបយើងក៏បានរងគ្រោះដោយសារជំនន់ទឹកភ្លៀងផងដែរ ហើយបើតាមរបាយការណ៍របស់មន្ទីរកសិកម្មខេត្តបានឲ្យដឹងថា ជំនន់ទឹកភ្លៀង បានធ្វើឲ្យខូចខាតស្រូវស្រែ លើផ្ទៃដីដែលរងការខូចខាតធ្ងន់ធ្ងរ និងត្រូវស្តារឡើងវិញ មានទំហំប្រមាណជាង៨០០ហិកតា ក្នុងចំណោមផ្ទៃដីដែលទទួលរងផលប៉ះពាល់ប្រមាណជាង១ម៉ឺនហិកតា ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
