ប្រជាពលរដ្ឋមានជីវភាពខ្វះខាត ចាស់ជរាគ្មានទីពឹង ស្រ្តីមេម៉ាយចំនួន ១៥០គ្រួសារ មកពីភូមិចំនួន៨ ក្នុងសង្កាត់សៀមរាប ក្រុងសៀមរាប នៅថ្ងៃទី១៧ ខែវិច្ឆិកា ឆ្នាំ២០២៥ បានទទួលអំណោយជាគ្រឿងឧបភោគបរិភោគពីសប្បុរសជនមកពីប្រទេសអូស្ត្រាលី ផ្ដល់តាមរយៈ លោក ទូច ដារិទ្ធ ប្រធានក្រុមយុវជនចុះជួយសង្កាត់សៀមរាប និងជាប្រធានអង្គការសប្បុរសធម៌កម្ពុជា ខេត្តសៀមរាប (Pod Projects)។
លោក ទូច ដារិទ្ឋ មានប្រសាសន៍ថា ក្នុងជីវិតយើងម្នាក់ៗរមែងជួបនូវទុក្ខលំបាក និងសេចក្ដីសុខ មិនអាចជៀសរួចឡើយគ្រាន់តែទំហំទុក្ខ និងសេចក្ដីសុខនោះវាខុសគ្នា ហើយស្បៀងអាហារផ្ដល់ជូននៅពេលនេះគ្រាន់តែជាការជួយសម្រាលការលំបាកបានមួយគ្រាៗប៉ុណ្ណោះ។ ហេតុនេះយើងត្រូវខំប្រឹងព្យាយាម ធ្វើស្រែចម្ការ ដាំដុះ ប្រកបរបរផ្សេងៗ និងកែខៃមុខរបរអាជីវកម្មឱ្យស្របតាមសមត្ថភាពរបស់ខ្លួន។
លោកស្រី Melinda តំណាងសប្បុរសជនមកពីអូស្ត្រាលី បានសម្ដែងនូវនូវការកោតសរសើរ និងសង្កេតឃើញពីភាពប្រែប្រួលរីកចម្រើនយ៉ាងឆាប់រហ័សក្នុងមូលដ្ឋាន និងភាពអភិវឌ្ឍឥតឈប់ឈរលើគ្រប់វិស័យក្នុងខេត្តសៀមរាប ក៏ដូចជាក្នុងប្រទេសកម្ពុជាទាំងមូល។ អស់រយៈពេល១២ឆ្នាំមកហើយ ដែលក្រុមសប្បុរសជនអូស្ត្រាលីបានគៀងគរមូលនិធិមកចូលរួមចែករំលែកការលំបាកដល់ប្រជាពលរដ្ឋមានជីវភាពខ្វះខាតក្នុងសង្កាត់សៀមរាប តាមរយៈការអំពាវនាវរបស់អង្គការសប្បុរសធម៌កម្ពុជា និងអាជ្ញាធរមូលដ្ឋាន។
លោកស្រីមានប្រសាសន៍ថា កម្ពុជាពិតជាមានការរីកចម្រើននិងប្រែប្រួលឆាប់រហ័សយ៉ាងពិតប្រាកដ តែអ្វីដែលមិនប្រែប្រួលនោះ គឺស្នាមញញឹម និងភាពរួសរាយរាក់ទាក់ និងសាមគ្គីភាពរបស់ប្រជាសហគមន៍តាមមូលដ្ឋាន កត្តាទាំងនេះបានស្រូបទាញបេះដូង និងផ្ដល់ភាពកក់ក្ដៅចំពោះរូបគាត់ ពោលគឺកម្ពុជាជាផ្ទះទី២ របស់គាត់ គាត់ស្រឡាញ់កម្ពុជា។
ក្នុងនាមអាជ្ញាធរមូលដ្ឋាន លោកស្រី ចក់ ដារី សមាជិកាសង្កាត់ បានថ្លែងអំណរព្រះគុណដល់ព្រះចៅអធិការវត្តអធ្វា និងអង្គការសប្បុរសធម៌កម្ពុជាខេត្តសៀមរាប រួមនឹងសប្បុរសជន ដែលបានលះបង់ធានធានថវិកា និងពេលវេលានាំយកអំណោយជាគ្រឿងឧបភោគបរិភោគ មកជូនដល់បងប្អូនប្រជាពលរដ្ឋ ដែលនេះវាពិតជាការងារមនុស្សធម៌ និងរួមចំណែកជួយសម្រាលជីវភាពដល់គ្រួសារទីទ័លក្រ អាចជួយសម្រាលនូវភាពខ្វះខាតបានមួយរយៈពេល។
លោកស្រី ក៏បានអំពាវនាវដល់សប្បុរសជនដ៏ទៃទៀត មេត្តាបន្តផ្ដល់អំណោយជាមនុស្សធម៌ឱ្យបានច្រើនបន្តទៀត ដើម្បីអាជ្ញាធរសង្កាត់មានលទ្ធភាពផ្គត់ផ្គង់ និងចែកជូនដល់ប្រជាពលរដ្ឋ ដែលមានការខ្វះខាតជីវភាព ព្រោះថាភាពទីទ័លលំបាករមែងតែងមានគ្រប់ទីតំបន់មិនថាតែប្រទេសជឿនលឿន ឬកំពុងអភិវឌ្ឍដូចជាកម្ពុជាយើងនោះទេ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
