ប្រព័ន្ធធារាសាស្រ្តរាជធានីខេត្តចំនួន៩ សរុប ៣៧ទីតាំង ដែលរួមមានខេត្តសៀមរាបផងនោះ នឹងត្រូវធ្វើការជួសជុលឡើងវិញ នេះបើតាមការឲ្យដឹងពីលោក មាស តារា អនុប្រធាននាយកដ្ឋានធារាសាស្ត្រកសិកម្មនៃក្រសួងធនធានទឹកនិងឧតុនិយម កាលពីពេលថ្មីៗនេះ។
លោក បញ្ជាក់ថា សម្រាប់ប្រព័ន្ធធារាសាស្រ្ត ស្ថិតក្នុងខេត្តសៀមរាប មានចំនួន ៨ទីតាំង ការជួសជុលនេះដែរ នឹងជួយដល់សម្រួលឡើងវិញ ដល់ការធ្វើកសិកម្ម នារដូវប្រាំងខាងមុខ និងពង្រឹងខ្នងទំនប់ឱ្យបានរឹងមាំ សម្រាប់សម្រួលដល់ការធ្វើដំណើរ របស់ប្រជាពលរដ្ឋក្នុងមូលដ្ឋានផងដែរ។
គួរបញ្ជាក់ថា ប្រព័ន្ធធារាសាស្ត្រទាំងចំនួន៣៧ទីតាំង ដែលខូចខាតដោយជំនន់ទឹកភ្លៀងនៅរាជធានីខេត្តចំនួន៩នេះរួមមាន នៅខេត្តបន្ទាយមានជ័យ ចំនួន ១០ទីតាំង ខេត្តសៀមរាបចំនួន ៨ទីតាំង ខេត្តបាត់ដំបងចំនួន ៦ទីតាំង ខេត្តឧត្តរមានជ័យ ចំនួន ៣ទីតាំង ខេត្តពោធិ៍សាត់ចំនួន ៣ទីតាំង ខេត្តកំពង់ស្ពឺចំនួន ៣ទីតាំង ខេត្តកណ្តាលចំនួន ២ទីតាំង រាជធានីភ្នំពេញចំនួន ១ទីតាំង និងខេត្តកំពង់ឆ្នាំងចំនួន១ទីតាំង។ ការខូចខាតនោះមាន ទំនប់បាក់ដាច់ មានប្រវែង៥៥៦៣ម៉ែត្រ និងទំនប់ហូរច្រោះអស់ប្រវែងជាង១ម៉ឺនម៉ែត្រ និងសំណង់ទំនប់មានចំនួន៧កន្លែង ប្រឡាយបាក់ដាច់សរុបប្រវែងជាង២ម៉ឺនម៉ែត្រ និងប្រឡាយហូរច្រោះមានប្រវែងជាង៣ម៉ឺនម៉ែត្រ និងសំណង់ប្រឡាយមានចំនួន១២កន្លែង ៕
