នៅថ្ងៃទី១២ ខែវិច្ឆិកា ឆ្នាំ២០២០ ក្រុមប្រឹក្សាសកម្មភាពជនពិការ សហការណ៍ជាមួយក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងមហាផ្ទៃ និងរដ្ឋបាលខេត្តសៀមរាប ក្រោមជំនួយឧបត្ថម្ភរបស់កម្មវិធី អភិវឌ្ឍនៃអង្គការសហប្រជាជាតិប្រចាំនៅកម្ពុជា (UNDP) បានរៀបចំសិក្ខាសាលា ផ្សព្វផ្សាយ និងជំរុញការអនុវត្តន៍ផែនការយុទ្ធសាស្ត្រជាតិ ស្តីពីពិការភាពឆ្នាំ២០១៩-២០២៣ និងផ្សព្វផ្សាយលិខិតបទដ្ឋានបច្ចេកទេស ហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព ក្នុងគោលបំណងធ្វើយ៉ាងណាបង្កើនការងារ និងសន្តិសុខសេដ្ឋកិច្ច ដើម្បីកាត់បន្ថយភាពក្រីក្រ តាមរយៈការលើកកម្ពស់កំណើនការងារសមស្រប ពង្រីងពង្រីកអាជីព និងមុខរបរ ព្រមទាំងបង្កើនជីវភាពរស់នៅបានសមរម្យជូនជនមានពិការភាព។
លោក នាក់ ណេរ៉ុន អភិបាលរងខេត្តសៀមរាប បានចាត់ទុកថា៖ ការងារពិការភាព គឺជាកិច្ចការងារពហុវិស័យដែលទាមទារឲ្យភាគីទាំងអស់យកចិត្តទុកដាក់។ ជាមួយនេះ អាជ្ញាធរខេត្ត បានផ្ដល់ជូនដល់ជនពិការ នូវសេវាសុខភាពប្រកបដោយគុណភាព និងសមភាព ព្រមទាំងការស្ដារលទ្ធភាពពលកម្មកាយសម្បទា និងសតិបញ្ញា រួមទាំងការបង្កើនកិច្ចអន្តរាគមន៍សេវាយុត្តិធម៌ ដើម្បីកាត់បន្ថយ និងឈានទៅរកការលុបបំបាត់ការរើសអើង ការរំលោភបំពាន ការប្រមាថ និងការកេងប្រវ័ញ្ចលើជនពិការ ។
បើតាមការឲ្យដឹងពី ឯកឧត្តម ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ៖ បច្ចុប្បន្ន ជនមានពិការភាព ត្រូវបានយកចិត្តទុកដាក់ពីគ្រប់មជ្ឈដ្ឋាន។ ក្នុងឆ្នាំ២០១៩កន្លងទៅ ជនមានពិការភាព ចំនួនជិត៣,០០០នាក់ បានចូលបម្រើការងារក្នុងក្រសួងស្ថាប័នរដ្ឋចំនួន៤០ស្ថាប័ន ក្នុងនោះស្រីជិត៨០០នាក់។ ដោយឡែក ក្នុងវិស័យឯកជន រួមមាន៖ ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ រោងចក្រ ស្ថិតិដែលក្រសួងសង្គមកិច្ច បានធ្វើការសាកល្បងនៅរាជធានីភ្នំពេញ ខេត្តកណ្តាល និងខេត្តសៀមរាប លើ១០២អង្គភាព មានជនមានពិការភាពចូលបម្រើការងារ ជិតចំនួនជិត៣,៨០០នាក់ ក្នុងនោះស្រ្តីជិត២,២០០នាក់។ សរុបជារួមទាំងស្ថាប័នរដ្ឋ និងឯកជនទូទាំងប្រទេស មានចំនួនជនមានពិការភាពជាង ៦,៦០០នាក់។
ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ និងជាអនុប្រធានក្រុមប្រឹក្សាសកម្មភាពជនពិការ គួសបញ្ជាក់ថា៖រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនូវគោលនយោបាយអភិវឌ្ឍជាតិ ដោយបន្តប្តេជ្ញាថែរក្សាសន្តិភាព ស្ថេរភាពនយោបាយ សន្តិសុខជាតិ កំណើនសេដ្ឋកិច្ចដោយឈរលើមូលដ្ឋានឯករាជ្យ អធិបតេយ្យ បូរណភាព ទឹកដី ប្រជាធិបតេយ្យ និងគោរពសិទ្ធិមនុស្ស។ សិទ្ធិ របស់ជនមានពិការភាព ក៏ត្រូវបានការពារដោយច្បាប់ជាតិនិងអន្តរជាតិ ក្នុងគោលបំណង ការពារសិទ្ធិសេរីភាព ការពារផលប្រយោជន៍ ទប់ស្កាត់ កាត់បន្ថយ និងឈានទៅលុបបំបាត់ការរើសអើង ចំពោះជនមានពិការភាព ដើម្បីធានា ដល់សិទ្ធិស្មើភាព គ្នានៃសកម្មភាពក្នុងសង្គមរវាងជនមានពិការភាព និងគ្មានពិការភាព។
ឯកឧត្តមរដ្ឋលេខាធិការ បញ្ជាក់បន្ថែមថា៖ ផែនការយុទ្ធសាស្ត្រជាតិស្តីពី ពិការភាពឆ្នាំ២០១៩-២០២៣ មានទិសដៅឈានទៅលុបបំបាត់ រាល់ទម្រង់កេងប្រវ័ញ្ច និងរើសអើងលើជនមានពិការភាព ដោយធ្វើយ៉ាងណា ឱ្យជនមានពិការភាពកាន់តែទទួលបានការគាំទ្រពីសង្គម បង្កើនគុណភាពជីវិតឱ្យកាន់តែប្រសើរឡើង ទទួលបានការយកចិត្តទុកដាក់ស្របតាម គោលដៅអភិវឌ្ឍន៍ប្រកបដោយចីរភាព«មិនមាននរណាម្នាក់ ត្រូវបានបំភ្លេច » ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
