នៅព្រឹកថ្ងៃទី១២ ខែវិច្ឆិកា ឆ្នាំ២០២០នេះ នៅលើហ្វេសប៊ុកផ្លូវការរបស់ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានបញ្ជាក់ថា មិនមានការបិទប្រទេស ឬរាជធានីខេត្ត ឬតំបន់ណាមួយនោះទេ។ បញ្ហាសំខាន់ក្នុងការប្រយុទ្ធជាមួយជំងឺកូវីដ-១៩ នៅពេលនេះគឺ ប្រជាជនគ្រប់រូបការពារខ្លួនតាមការណែនាំរបស់ក្រសួងសុខាភិបាល ពិសេសការពាក់ម៉ាស់ ការលាងដៃ ការមិនជួបជុំប្រមូលផ្តុំ ការរក្សាគម្លាតសុវត្ថិភាព។ល។
សម្ដេចតេជោ លើកឡើងថា ការឃោសនាអកុសលរបស់ពួកអាក្រក់ទាំងនេះ សំដៅធ្វើឱ្យប្រទេសមានចលាចល ទំនិញឡើងថ្លៃ ប្រជាជនរស់នៅមិនបានស្ងប់ចិត្តដើម្បីពួកគេគេងចំណេញខាងនយោបាយតែប៉ុណ្ណោះ។
កាលពីម្សិលមិញនេះ សម្តេចតេជោ បានបញ្ជា ឱ្យបញ្ចេញម៉ាស់ក្រណាត់ចំនួន២លានម៉ាស់ ជូនទៅសាលារាជធានីភ្នំពេញ ដើម្បីចែកជូនប្រជាជនក្រីក្រ ក្នុងគោលដៅថែរក្សាសុវត្ថិភាពសុខភាពប្រជាពលរដ្ឋ។ ជាមួយគ្នានេះ នគរបាលចរាចរណ៍ ក៏នឹងជូនម៉ាស់សម្រាប់អ្នកជិះកង់ ជិះម៉ូតូដែលមិនបានពាក់ម៉ាស់ផងដែរ។
ស្របពេល ដែលប្រមុខរាជរដ្ឋាភិបាល បានណែនាំដល់ប្រជាពលរដ្ឋពាក់ម៉ាសទាំងអស់គ្នា ដើម្បីបញ្ចប់ព្រឹត្តិការណ៍៣វិច្ឆិកាឱ្យបានឆាប់។ ជាមួយនោះអាជ្ញាធរមូលដ្ឋានក្នុងក្រុងសៀមរាប ក៏បានធ្វើការណែនាំដល់ប្រជាពលរដ្ឋ អ្នកលក់ដូរក្នុងផ្សារ និងអ្នកធ្វើដំណើរនៅតាមទីសាធារណៈនានា ត្រូវពាក់ម៉ាសឲ្យបានគ្រប់ៗគ្នា និងរក្សាគម្លាតសុវត្ថិភាពឲ្យខ្ជាប់ខ្ជួន។
លោក អាំ សឿម តំណាងគណៈកម្មការផ្សារសម្ដេចតេជោ ហ៊ុន សែន ដើមក្រឡាញ់ ស្ថិតក្នុងសង្កាត់គោកចក ក្រុងសៀមរាប បញ្ជាក់ថា អាជីវករ ឬប្រជាពលរដ្ឋ ដែលចូលក្នុងផ្សារ គឺត្រូវពាក់ម៉ាស់ និងលាងដៃជាមួយទឹកអាកុល ដែលម្ចាស់ផ្សារបានរៀបចំទុកជាស្រេច។
ដោយឡែក លោក កុយ សែម ប្រធានភូមិធ្លកអណ្ដូង សង្កាត់ស្លក្រាម ក្រុងសៀមរាប ក៏បានបញ្ជាក់ផងដែរថា លោកបានដាក់កម្លាំងប្រជាការពារ ណែនាំដល់ប្រជាពលរដ្ឋ តាមរយៈការចាក់មេក្រូ ស្ដីពីសារណែនាំរបស់ក្រសួងសុខាភិបាលក្នុងប្រយុទ្ធនឹងជំងឺឆ្លងកូវីដ១៩ និងណែនាំដល់អាជីករនៅតាមផ្សារក្នុងមូលដ្ឋានរបស់លោកស្ទើរ១០០ភាគរយហើយ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
