គិតត្រឹមព្រឹកថ្ងៃទី១៣ វិច្ឆកានេះ យុទ្ធនាការរត់ដើម្បីមនុស្សធម៌ជាមួយសាយ សម្រាប់មន្ទីរពេទ្យកុមាអង្គរ ទទួលបានថវិកាជាង៣១ម៉ឺនដុល្លារ
“យុទ្ធនាការរត់ ដើម្បីមនុស្សធម៌ជាមួយសាយ” មានគោលបំណងចម្បង ជួយទ្រទ្រង់ដល់ដំណើររបស់មន្ទីរពេទ្យកុមាអង្គរ ក្នុងក្រុងសៀមរាប ដែលកំពុងខ្វះថវិកាប្រចាំ ដើម្បីថែរក្សា និងព្យាបាលសុខភាពកុមារកម្ពុជា។ គិតត្រឹមម៉ោង១១:០០ព្រឹក ថ្ងៃទី១៣ ខែវិច្ឆិកា ឆ្នាំ២០២០ យុទ្ធនាការសប្បុរសធម៌មួយនេះ ទទួលបានថវិកាជាង៣១ម៉ឺនដុល្លារអាមេរិច នេះបើតាមការបញ្ជាក់របស់ អ្នកស្រី ស៊ិនកេត អរុណ ប្រធានការិយាល័យទំនាក់ទំងសាធារណៈនៃមន្ទីរពេទ្យកុមារអង្គរ ប្រចាំប្រទេសកម្ពុជា នៅព្រឹកថ្ងៃទី១៣ ខែវិច្ឆិកា ឆ្នាំ២០២០។
អ្នកស្រី ស៊ិនកេត អរុណ បញ្ជាក់បន្ថែមថា សម្រាប់គម្រោងចំណាយឆ្នាំ២០២១ របស់មន្ទីរពេទ្យកុមារអង្គរ មានចំនួនចន្លោះពី ៦លាន ៣០ម៉ឺន ទៅ ៦លាន ៥០ម៉ឺនដុល្លារអាមេរិច។ កម្មវិធី” រត់ដើម្បីសប្បុរសធម៌ជាមួយសាយ”នេះ ជាផ្នែកមួយនៃការរៃអង្គាសថវិកាសប្បុរសធម៌ចំនួន១ដុល្លារ ជូនមន្ទីរពេទ្យកុមារអង្គរ ដោយមានកិច្ចសហការរវាងមន្ទីរពេទ្យកុមារអង្គរ និងលោក សាយ ជាសិល្បករខ្មែរ។ ក្នុងយុទ្ធនាការនេះ លោក សាយ នឹងរត់មកដល់ខេត្តសៀមរាប នៅថ្ងៃទី២២ វិច្ឆិកា និងបញ្ចប់ការរត់មនុស្សធម៌២១រាជធានី-ខេត្ត របស់ខ្លួន នៅរាជធានីភ្នំពេញ នៅថ្ងៃទី១៣ ខែមករា ឆ្នាំ២០២១ សរុបរយៈពេលរត់គឺ ៩៩ថ្ងៃ។
ទោះជាយុទ្ធនាការនេះ នឹងបញ្ចប់ក្ដី ក៏សប្បុរសជនទាំងអស់នៅតែអាចបន្តបរិច្ចាគថវិកា១ដុល្លារ ឬលើសពីនេះ ជូនមន្ទីរពេទ្យកុមាអង្គរ ដោយមិនមានការបញ្ចប់ឡើយ។
((សំឡេង អ្នកស្រី ស៊ិនកេត អរុណ))
((កថាខណ្ឌនេះ មិនបាច់អានទេ)) សូមបញ្ជាក់ថា ដើម្បីបរិច្ចាគថវិកា ជូនដល់មន្ទីរពេទ្យកុមារអង្គរ សប្បុរសជន អាចធ្វើការផ្ញើថវិកា តាមរយៈ៖ ទី១ លេខគណនីធនាគារ ABA: 000 320 555 Angkor Hospital for Children Limited សម្រាប់ប្រើក្នុងយុទ្ធនាការរត់ជាមួយសាយ ឬក៏លេខគណនីធនាគារ ABA ទី២ 000 853 843 Angkor Hospital for Children – AHC និងគណនី Wing: 0320 6872 AHC Patient Contribution ថវិកាដែលបានផ្ញើចូលក្នុងគណនីទាំង៣នេះ នឹងត្រូវប្រគល់ជូនដល់មន្ទីរពេទ្យកុមារអង្គរ ដែលកំពុងបំពេញបេសកកម្មរបស់ខ្លួន ក្នុងការថែរក្សាសុខភាព និងជួយសង្គ្រោះជីវិតកុមារកម្ពុជាយ៉ាងហោចណាស់ ៤០០នាក់ក្នុងមួយថ្ងៃ ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
