សម្តេចតេជោនាយករដ្ឋមន្ត្រីនឹងអញ្ជើញជាអធិបតីក្នុងពិធីបើកការដ្ឋានស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្នុងក្រុងសៀមរាប នៅថ្ងៃទី៣០ ខែវិច្ឆិកាខាងមុខនេះ
ក្នុងឱកាសដឹកនាំប្រតិភូក្រុមការងារបច្ចេកទេសចុះពិនិត្យគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្នុងក្រុងសៀមរាប កាលពីថ្ងៃទី១៥ ខែវិច្ឆិកា ឆ្នាំ២០២០ម្សិលមិញនេះ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប នឹងគ្រោងបើកការដ្ឋានសាងសង់នៅថ្ងៃទី៣០ ខែវិច្ឆិកា ឆ្នាំ២០២០ខាងមុខនេះ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពីត្រូវបានលើកពេលម្ដងរួចមក ដោយសារព្រឹត្តិការណ៍ «០៣ វិច្ឆិកា » ហើយការចុះពិនិត្យនេះ ធ្វើឡើងក្នុងគោលបំណងដើម្បីពិនិត្យអំពីវឌ្ឍនភាពការសាងសង់ , ការឈូសឆាយផ្លូវ , បញ្ហាគ្រឿងចក្រ , ទីតាំងដាក់ប្រព័ន្ធលូ និង មន្ទីរពិសោធន៍ក្នុងការស្ថាបនាផ្លូវ អំពីបញ្ហាប្រឈម សំណូមពរ និងដំណោះស្រាយ ព្រមទាំងមតិយោបល់ ដែលទាក់ទងនឹងការស្ថាបនានៃខ្សែផ្លូវទាំង ៣៨ខ្សែនោះ ឱ្យប្រព្រឹត្តទៅដោយរលូន ខណៈដែលការស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នឹងត្រូវបញ្ចប់នៅចុងឆ្នាំ២០២១ ។
ឯកឧត្ដម ស៊ុន ចាន់ថុល មានប្រសាសន៍ទៀតថា ហេដ្ឋារចនាសម្ព័ន្ធផ្លូវទាំង៣៨ខ្សែនេះ នឹងត្រូវសាងសង់ឡើងដោយអង្គភាពចំនួន៦ គឺ ៖ ១. កងវិស្វកម្មសម្តេចតេជោខេត្តសៀមរាប , ២. កងវិស្វកម្ម១០៨ , ៣. នាយកដ្ឋានគ្រឿងចក្រ និងស្ថាបនាផ្លូវ , ៤. នាយកដ្ឋានជួសជុល និងថែទាំផ្លូវ , ៥. អគ្គនាយកដ្ឋានប្រព័ន្ធចម្រោះទឹកកខ្វក់ និង ៦. មន្ទីរសាធារណការ និងដឹកជញ្ជូនខេត្តសៀមរាប ហើយត្រូវបានបែងចែកជាបួនប្រភេទ ក្នុងនោះ៖ ប្រភេទទី០១. ចាក់បេតុងកម្រាស់ ២៥សង់ទីម៉ែត្រ ដូចជាផ្លូវវាងក្រុង ដោយកន្លែងខ្លះចាក់បេតុង តែមិនអ៊ុតបេតុងកៅស៊ូ (AC)ពីលើទេ , ប្រភេទទី០២. ចាក់បេតុងកម្រាស់ ២០សង់ទីម៉ែត្រ និងកន្លែងខ្លះកម្រាស់ ៧សង់ទីម៉ែត្រ យោងទៅតាមស្ថានភាពភូមិសាស្ត្រ ស្ថានភាពចរាចរាណ៍ និងការដឹកជញ្ជូន , ប្រភេទទី០៣. ជួសជុលគ្រឹះ មិនចាំបាច់ចាក់បេតុងហើយអ៊ុតកៅស៊ូបេតុងតែម្ដង និងប្រភេទទី០៤. អ៊ុតកៅស៊ូបេតុងកម្រាស់ ១៥សង់ទីម៉ែត្រ ពីលើតែម្ដងដោយសារគ្រឹះផ្លូវនោះនៅមានភាពរឹងមាំស្រាប់ទៅហើយ ស្របតាមទំហំចរាចរណ៍ និងការដឹកទំនិញធ្ងន់ ឬស្រាល ដោយផ្ដោតជាសំខាន់លើគុណភាព និង ប្រសិទ្ធភាព ។
ឯកឧត្ដមទេសរដ្ឋមន្ត្រី ស៊ុន ចាន់ថុល មានប្រសាសន៍បន្ថែមទៀតថា ដោយឡែក ចំពោះការបើកការដ្ឋានជួសជុលពង្រីកផ្លូវលេខ៦ ចាប់ពីរាជដំណាក់ រហូតទៅរង្វង់មូលព្រះបាទជ័យវរ្ម័នទី៧ ផ្លូវបត់ចូលព្រលានយន្តហោះ ប្រវែងជិត ៦គីឡូម៉ែត្រ ក៏ត្រូវបានប្រកាសបើកការដ្ឋានសាងសង់នៅថ្ងៃទី៣០ ខែវិច្ឆិកានេះដែរ ដែលផ្លូវនេះពង្រីកជា ៦គន្លង ក្នុងនោះ៣គន្លងទៅ និង៣គន្លងមក , ទ្រូងផ្លូវ ២ម៉ែត្រ និងចិញ្ចើមផ្លូវ ៣ម៉ែត្រសងខាង ជាថវិកាកម្ចីពីធនាគារអភិវឌ្ឍន៍អាស៊ី ជាដំណាក់កាលទី២ ប្រើពេលសាងសង់រយៈមួយឆ្នាំ ខណៈដំណាក់កាលទី១. បានស្ថាបនារួចហើយដោយក្រាលបេតុងកៅស៊ូ (AC) ឡើងវិញ ពីរង្វង់មូលព្រះបាទជ័យវរ្ម័នទី៧ ទៅស្រុកក្រឡាញ់ និង ដំណាក់កាលទី៣ ចាប់ពីស្រុកក្រឡាញ់ ទៅក្រុងសិរីសោភណ្ឌ ប្រភេទបេតុងកៅស៊ូ (AC) ដែលបានចុះហត្ថលេខារួចហើយជាមួយក្រុមហ៊ុនសាងសង់ ៕
អត្ថបទ និង រូបថត ៖ លោក យូ វង្ស និង លោក ឈិត សាវី
កែសម្រួលអត្ថបទ ៖ លោក លីវ សាន្ត
