សម្តេចតេជោ ហ៊ុន សែន ផ្ដល់ជូនអំណោយម៉ាស់ និងបរិក្ខារពេទ្យ ដល់ប្រទេសឡាវ សម្រាប់ចូលរួមការទប់ស្កាត់ជំងឺកូវីដ-១៩នៅក្នុងតំបន់
ការនាំយក អំណោយម៉ាស់ និងបរិក្ខារពេទ្យរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ជូនដល់មិត្តឡាវ នៅព្រឹកថ្ងៃទី១៦ ខែវិច្ឆិកា ឆ្នាំ២០២០នេះ គឺជាការជួយគ្នាទៅវិញទៅមក ក្នុងការចូលរួមប្រយុទ្ធប្រឆាំងនឹងជំងឺកូវីដ-១៩ ខណៈប្រទេសកម្ពុជា បានត្រៀមម៉ាស់ និងបរិក្ខារពេទ្យបន្ថែមទៀត ទប់ស្កាត់ការរាតត្បាតនៃជំងឺកូវីដ-១៩ ។
សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បញ្ជាក់ថា អំណោយ សម្រាប់ប្រគល់ជូនមិត្តឡាវទាំងនេះ គឺជាការផ្តល់ភាពកក់ក្តៅ ក្នុងការទប់ស្កាត់ជំងឺកូវីដ-១៩ ដែលជាការផ្សារភ្ជាប់ទំនាក់ទំនង រួមគ្នាប្រឆាំងឱ្យកាន់តែមានប្រសិទ្ធភាព ចំពោះជំងឺដ៏កាចសាហាវមួយនេះ ។ នេះជាទឹកចិត្ត ប្តូរផ្តាច់បំផុតរបស់សម្តេចតេជោ ហ៊ុន សែន តាំងពីចំណុចចាប់ផ្តើមរាតត្បាតនៃជំងឺកូវីដ-១៩ ទាំងនៅក្នុងប្រទេស ក៏ដូចជារួមចំណែកនៅក្នុងតំបន់ផងដែរ ។
សម្តេចពិជ័យសេនា ទៀ បាញ់ បង្ហាញផងដែរថា ក្រៅពីជំនួយដែលបានប្រគល់ជូនមិត្តឡាវ រាជរដ្ឋាភិបាលកម្ពុជា មានម៉ាស់បម្រុងទុក ក្នុងឃ្លាំងយុទ្ធសាស្រ្ត ចំនួន១៣លានម៉ាស់ នៅក្នុងឃ្លាំងសុខាភិបាលចោមចៅ ចំនួនជាង៥លានម៉ាស់ និងសម្លៀកបំពាក់វេជ្ជសាស្ត្រគ្រប់គ្រាន់ សម្រាប់បន្តប្រយុទ្ធប្រឆំាងជំងឺកូវីត-១៩ នៅកម្ពុជាដោយពុំមានការខ្វះខាតឡើយ។
សូមបញ្ជាក់ថា សម្ភារ និងបរិក្ខារពេទ្យ ដែលត្រូវប្រគល់ជូនមិត្តឡាវនៅពេលនេះ រួមមាន ម៉ាស់ចំនួន២លាន ម៉ាស់ក្រណាត់ចំនួន១០ម៉ឺន ម៉ាស់N95ចំនួន២ម៉ឺន វ៉ែនតាសុវត្ថិភាពចំនួន២ម៉ឺន សម្លៀកបំពាក់សុវត្ថិភាព សម្រាប់មន្រ្តីសុខាភិបាលចំនួន២ម៉ឺនឈុត ទែរម៉ូម៉ែត្រអ៊ិនហ្រ្វា(ម៉ាស៊ីនវាស់កម្តៅ)ចំនួន ៥០០គ្រឿង របាំងមុខចំនួន២ម៉ឺន ឧបករណ៍ ជំនួយដល់ការដកដង្ហើម សម្រាប់ប្រពោធនកម្ម (ICU)ចំនួន២០គ្រឿង ទូរទស្សន៍តាមដានសុខភាពអ្នកជំងឺ និងសម្ភារបន្ទាប់បន្សំម៉ូដែល Vista 120 ចំនួន២០ ម្សៅថ្នាំក្លរ៉ាមីនប្រភេទB (២៥គីឡូក្រាមមួយកេស )៥០០ធុង ស្បែកជើងកវែងសុវត្ថិភាព ១ពាន់គូ និងសាប៊ូលាងដៃ ២ពាន់ដុំ៕
អត្ថបទ និងរូបភាព៖ ក្រសួងព័ត៌មាន
