កាលពីរសៀលថ្ងៃទី ១៣ ខែ វិច្ឆិកា ឆ្នាំ២០២០ លោក ពិន ប្រាកដ អភិបាលរងខេត្តសៀមរាប បានទទួលអំណោយសប្បុរសធម៌ជាស្បៀងអាហារ និងថវិកា ពីសាលាអន្តរជាតិ ស្មាធឃីដ ខេត្តសៀមរាប នៅសាលាខេត្តសៀមរាប ជួយដល់ប្រជាពលរដ្ឋរងផលប៉ះពាល់ដោយទឹកជំនន់ នាពេលកន្លងមកនេះ ។
មានប្រសាសន៍នោះ លោក អភិបាលរងខេត្ត បង្ហាញថា អំឡុងពេលជួបគ្រោះទឹកជំនន់ និងក្រោយគ្រោះធម្មជាតិនេះ អាជ្ញាធរខេត្ត បានរៀបចំជាស្បៀងអាហារ និងដាក់នូវវិធានការមួយចំនួនដល់រដ្ឋបាលគ្រប់ស្រុក ដើមី្បត្រៀមបង្ការ ក្នុងការសង្រ្គោះប្រជាពលរដ្ឋ និង សត្វពាហនៈរបស់ប្រជាពលរដ្ឋទៅកាន់ទីទួលសុវត្ថិភាព ព្រមទាំងឲ្យយកចិត្តទុកដាក់ខ្ពស់លើបញ្ហាសុខភាពបងប្អូន ដោយមិនទុកឲ្យប្រជាពលរដ្ឋណាម្នាក់ស្លាប់ឡើយ។
លោក អភិបាលរងខេត្ត បានសម្ដែងនូវការអរគុណចំពោះ ទឹកចិត្តដ៏សប្បុរសធម៌ របស់សាលាអន្តរជាតិ ស្មាធឃីដក្នុងការចូលរួមជាមួយរាជរដ្ឋាភិបាល ក្នុងការជួយប្រជាពលរដ្ឋដែលមានកំពុងជាការលំបាក។ ក្នុងនោះ លោក ក៏បាន សំណូមពរដល់សប្បុរជននានា បន្តវប្បធម៌នៃការចែករំលែកបន្តទៀត ដើម្បីជួយប្រជាពលរដ្ឋរងគ្រោះ និង ងាយរងគ្រោះក្នុងខេត្តសៀមរាប។
សូមជម្រាបថា អំណោយដែលរដ្ឋបាលខេត្តទទួលបាននាពេលនេះ រួមមាន អង្ករចំនួន ១តោន និង ថវិកាចំនួន៥០០ដុល្លារអាមេរិច។
អត្ថបទ និង រូបថត ៖ លោក ម៉ី សុខារិទ្ថ
កែសម្រួលអត្ថបទ ៖ លោក សេង ផល្លី
