នៅព្រឹកថ្ងៃទី១២ ខែវិច្ឆិកា ឆ្នាំ២០២០ លោកស្រី ម៉ននី រង្សី អភិបាលស្រុក និងជាប្រធានគណៈកម្មា ធិការគ្រប់គ្រោះមហន្តរាយស្រុកក្រឡាញ់ លោក ឃុត សំអាត ប្រធានក្រុមប្រឹក្សាស្រុក រួមជាមួយអាជ្ញាធរគ្រប់លំដាប់ថ្នាក់ បាននាំយកអំណោយរបស់អង្គការទស្សន:ពិភពលោកប្រចាំប្រទេសកម្ពុជា និងអង្គការសហព័ន្ធសន្តិភាពសាកល-កម្ពុជា ( UPF-Cambodia) ចែកជូនដល់គ្រួសាររងគ្រោះដោយទឹកជំនន់ចំនួន៤៧គ្រួសារ ក្នុងនោះឃុំចន្លាស់ដៃមានចំនួន ២២គ្រួសារ និងឃុំសែនសុខចំនួន២៥គ្រួសារ ដោយអំណោយទាំងនោះក្នុង១គ្រួសារ ទទួលបាន អង្ករ ២៥kg, មី១កេះ, ទឹកស៊ីអ៊ីវ ១យួរ, សាប៊ូ ១កញ្ចប់, ត្រីខ ១យួរ, ប្រេងឆា៥លីត្រ និងថវិកា ៥ម៉ឺនរៀល។
មានប្រសាសន៍សំណេះសំណាលនោះលោកស្រី ម៉ន នីរងី្ស ក៏បានពាំនាំនូវការសួរសុខទុក្ខរបស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប និងឯកឧត្តមបណ្ឌិតអ្នកឧកញ៉ា សៀង ណាំ សមាជិករដ្ឋសភា តំណាងរាស្រ្តមណ្ឌលសៀមរាប និងជាប្រធានក្រុមការងារចុះជួយស្រុកក្រឡាញ់ ព្រមទាំងបានណែនាំដល់បងប្អូនប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះកូនៗរបស់ខ្លួន ដោយកុមារតូចៗនេះហើយងាយរងនូវហានីភ័យផ្សេងៗ ។ ជាមួយគ្នានោះក្នុងនាមតំណាងប្រជាពលរដ្ឋក្នុងស្រុកក្រឡាញ់ សម្តែងពីទឹកចិត្តដ៏សប្បុរសធម៌របស់អង្គការអង្គការទស្សន:ពិភព លោក ប្រចាំប្រទេសកម្ពុជា និងអង្គការសហព័ន្ធសន្តិភាពសាកល-កម្ពុជា ( UPF-Cambodia) ដែលបានយកចិត្តទុកដាក់ ក្នុងការចូលរួមជាមួយរាជរដ្ឋាភិបាល ក្នុងពេលដែលប្រជាពលរដ្ឋកម្ពុជាយើង បានកំពុងជួប នូវទុក្ខលំបាកដោយគ្រោះធម្មជាតិ និង អំពីទុក្ខលំបាករបស់បងប្អូន សំខាន់ចំពោះកុមារតូចៗ ។
លោកស្រីអភិបាលស្រុក ក៏បានធ្វើការណែនាំ និង ក្រើនរំលឹកលោកយាយ លោតា បងប្អូន ប្រជាពលរដ្ឋទាំងអស់ សូមកុំភ្លេចកូវិដ ១៩ ពីព្រោះថា កូវិដ១៩មិនភ្លេចយើងទេ មានតែយើងទេអាចភ្លេចកូវិដ ដូច្នេះយើងត្រូវអនុវត្តឲ្យបានជាប្រចាំតាមការណែនាំរបស់ក្រសួងសុខាភិបាល។ ម៉្យាងទៀតនៅពេលទឹកស្រក សូមបងប្អូនត្រូវធ្វើអនាម័យជុំវិញលំនៅដ្ឋាន និង លប់បំបាត់នូវទីជម្រកសត្វមូសខ្លា ដែលជាភ្នាក់ងារចម្លងជម្ងឺគ្រុនឈាម និង គ្រុនឈិក ដែលកើតលើមនុស្សគ្រប់វ័យ និង សូមឲ្យបងប្អូនត្រូវយកចិត្តធ្វើការស្តារឡើងវិញនូវជីវភាពក្រុមគ្រួសារ ត្រូវធ្វើការដាំដុះដំណាំរួមផ្សំ ព្រមទាំងធ្វើការប្រមូលភោគផលស្រូវ ដែលនៅសេសសល់ពីទឹកជំនន់នេះ និងចិញ្ចឹមសត្វជាលក្ខណៈគ្រួសារ៕
អត្តបទនិងរូបភាព៖រដ្ឋបាលស្រុកក្រឡាញ់
