នៅព្រឹកថ្ងៃទី១៧ ខែវិច្ឆិកា ឆ្នាំ២០២០ នាទីស្ដីការក្រសួងព័ត៌មាន ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញបើកកិច្ចប្រជុំបូកសរុបលទ្ធផលការងាររយៈពេល ៦ខែ និងទិសដៅការងារបន្ត របស់គណៈ កម្មាធិការសម្របសម្រួលពង្រឹង និងពង្រីកកិច្ចសហប្រតិបត្តិការអន្តរជាតិ នៃក្រសួងព័ត៌មាន។
ឯកឧត្តម ហាស់ សំអាត អនុរដ្ឋលេខាធិការ និងជាអនុប្រធានអចិន្ត្រៃយ៍ គណៈកម្មាធិការសម្របសម្រួលពង្រឹង និងពង្រីក កិច្ចសហប្រតិបត្តិការ អន្តរជាតិ នៃក្រសួងព័ត៌មាន បង្ហាញថា រយៈពេល ៦ ខែមកនេះ អគ្គនាយកដ្ឋានទាំង៥ និងសមាជិកទាំងអស់ បានរៀបចំសេចក្តីព្រាងផែនការសម្មភាព សម្រាប់ដៃគូយុទ្ធសាស្រ្តគ្រប់ជ្រុងជ្រោយ និងយូរអង្វែង កម្ពុជា-ឡាវ ២០២០-២០២៤ ការបង្កើតក្រុមការងារចូលរួម ប្រយុទ្ធប្រឆាំង ព័ត៌មានក្លែងក្លាយ ការផ្តាស់ប្តូរភាពយន្តឯកសារ កម្ពុជា ចិន កិច្ចសហការ មេគង្គឡានឆាង សម្រាប់ឆ្នាំ២០២១ កិច្ចសហការរៀបចំវេទិកា កម្ពុជា-ចិន ស្តីពីកិច្ចសហប្រតិបត្តិការខ្សែក្រវ៉ាត់ និងផ្លូវ ព្រមទាំងកិច្ចការងារជាច្រើនទៀតជាមួយ ប្រទេសចិន ក៏ដូចជាបណ្តាប្រទេស ជាដៃ គូជាមួយក្រសួង ព័ត៌មាន រួមមានប្រទេស វៀតណាម ឡាវ ថៃ សាធារណរដ្ឋកូរ៉េ សាធារណរដ្ឋប្រជាមានិតប្រជាធិបតេយ្យកូរ៉េ មីយ៉ាន់ម៉ា ទីម័រឡេសតេ រុស្ស៊ី សហភាពអឺរ៉ុប និងកិច្ចការងារ ក្នុងក្របខណ្ឌអាស៊ាន ព្រមទាំងកិច្ចសហប្រតិបត្តិការជាមួយ វិទ្យាស្ថានអាស៊ីប៉ាស៊ីហ្វិក ដើម្បីអភិវឌ្ឍន៍ការផ្សព្វផ្សាយ ។
ឯកឧត្តម សុខ ប្រសិទ្ធ រដ្ឋលេខាធិការ និងជាប្រធាន គណៈកម្មាធិការសម្របសម្រួល ពង្រឹង និងពង្រីកកិច្ចសហប្រតិបត្តិការអន្តរជាតិ នៃក្រសួងព័ត៌មាន បានលើកឡើងថា ជាទិសដៅការងារ សម្រាប់អនុវត្តន៍បន្ត របស់គណ:កម្មាធិការ គឺការបន្តចូលរួមជាមួយប្រជាជន នៃសហគមន៍ អាស៊ាន និងសហភាពអឺរ៉ុប លើប្រធានបទពង្រឹង និងពង្រីកចំណងមិត្តភាពសេរីភាព សារព័ត៌មាន និងធុរកិច្ច ព្រមទាំងគម្រោងអនុវត្តន៍ការងារនៅគ្រប់កិច្ចសហការជាមួយដៃគូ ពាក់ព័ន្ធទាំងអស់ និងការអនុវត្តន៍អនុស្សរណ:នៃការយោគយល់គ្នា ជាមួយភាគីដៃគូ លើកអំពី គុណតម្លៃរបស់ថ្នាក់ដឹកនាំ ចំពោះគណ:កម្មាធិការ បើទោះបីមានវិបត្តិជំងឺកូវីដ-១៩ក៏ដោយ តែបានបន្តកិច្ចសហការ របស់ខ្លួនតាមរយៈការប្រជុំតាមប្រព័ន្ធអនឡាញ ។
ថ្លែងក្នុងឱកាសនោះ ឯកឧត្តមរដ្ឋមន្រ្តី លើកឡើងថា ការបូកសរុបលទ្ធផលការងារ និង បន្តពង្រឹងរាល់កិច្ចការងារ របស់គណ:កម្មាធិការសម្របសម្រួលពង្រឹង និងពង្រីក កិច្ចសហ ប្រតិបត្តិការអន្តរជាតិ នៃក្រសួងព័ត៌មាន រយៈពេល៦ខែនេះ មានសារសំខាន់ណាស់ ទាក់ទងទៅនឹងដំណើរការល្អ របស់ក្រសួងព័ត៌មាន ជាមួយដៃគូ និងស្ថាប័នផ្សេងៗ ។ ទន្ទឹមនេះ វាបានបង្ហាញនូវចំណុច ត្រូវបន្តពង្រឹង ដូចជាពិធីការ គម្រោងកិច្ចសហប្រតិបត្តិការ ជាមួយដៃគូ ជាពិសេសការពង្រឹង ការងារបណ្តុះបណ្តាល ធនធានមនុស្ស ដែលជាមន្រ្តីក្រសួងព័ត៌មាន ធ្វើការសិក្សាទាំងក្នុងនិងក្រៅប្រទេស ឲ្យ មានជំនាញ និងសមត្ថភាព កាន់តែរឹងមាំបន្ថែមទៀត។
អត្ថបទ និង រូបភាព៖ ក្រសួងព័ត៌មាន
