នៅរសៀលថ្ងៃទី០២ ខែធ្នូ ឆ្នាំ២០២០ អាជ្ញាធរខេត្តសៀមរាប ដឹកនាំដោយ លោក ពិន ប្រាកដ និងលោក នាក់ ណេរ៉ុន អភិបាលរងខេត្តសៀមរាប បាននាំយកម៉ាស១,៨០០០ម៉ាស ចែកជូនដល់អាជីករនៅក្នុងផ្សារលើធំថ្មី និងផ្សារចាស់ ព្រមទាំងប្រជាពលរដ្ឋនៅតាមដងផ្លូវក្នុងក្រុងសៀមរាប ដើម្បីបំផុសការពាក់ម៉ាស ក្នុងទប់ស្កាត់ការរីករាលដាលជំងឺកូវីដ-១៩ ជាពិសេសចូលរួមបញ្ចប់ ព្រឹត្តិការណ៍សហគមន៍២៨វិច្ឆិកា។
ជារួមក្នុងយុទ្ធនាការផ្សព្វផ្សាយ និងចែកម៉ាសនោះ លោកអភិបាលរងខេត្តទាំងពីរ បានណែនាំដល់អាជីវករ និងប្រជាពលរដ្ឋទាំងអស់ចូលរួមពាក់ម៉ាស និងលាងដៃដោយសាប៊ូ អាកុល ជែល ព្រមទាំងចៀសវាងការជួបជុំ ដែលស្របតាមការជូនដំណឹងតាមបទបញ្ជារបស់រាជរដ្ឋាភិបាល ក៏ដូចសេចក្ដីជូនដំណឹងជាបន្តបន្ទាប់របស់រដ្ឋបាលខេត្តសៀមរាប។
តាមរយៈយុទ្ធនាការនេះ ប្រជាពលរដ្ឋ ក៏ដូចជាអាជីវករក្នុងផ្សារខាងលើ បានបង្ហាញពីការយល់ដឹង ពីព្រឹត្តិការណ៍សហគមន៍២៨វិច្ឆិកា ព្រមទាំងបង្ហាញពីការចូលរួមជាមួយអាជ្ញាធរគ្រប់លំដាប់ថ្នាក់ក្នុងទប់ស្កាត់ការីករាលដាលជំងឺកូវីដ-១៩ ។
ក្នុងថ្ងៃដដែលនោះ រដ្ឋបាលខេត្តសៀមរាប ក៏បានធ្វើការចែកម៉ាស ចំនួន៣០ម៉ឹនម៉ាស ជែលលាងដៃចំនួន ១៥០កេស និងមុងជ្រលក់ថ្នាំ ៣ពាន់មុង ដល់រដ្ឋបាលក្រុងស្រុកទាំង១២ របស់ខេត្ត ដើម្បីចែកជូនប្រជាពលរដ្ឋ និងគោលដៅសំខាន់ៗ ដើម្បីទប់ស្កាត់ការឆ្លងរីករាលនៃជំងឺកូវីដ-១៩ នៅក្នុងមូលដ្ឋានរបស់ខ្លួន។
គួរជម្រាបថា ការប្រមូលសំណាក មនុស្សដែលបានប៉ះពាល់ដោយផ្ទាល់ និងប្រយោល ក្នុងព្រឹត្តិការណ៌សហគមន៍២៨វិច្ឆិកា ក្នុងខេត្តសៀមរាប គិតត្រឹមថ្ងៃទី០១ ខែធ្នូ ឆ្នា២០២០ មានចំនួនសរុប ៤៤៦សំណាក និងលទ្ធផលធ្វើតេស្តចាប់ពីថ្ងៃទី២៩ ដល់ ៣០ ខែវិច្ឆិកា ឆ្នាំ២០២០ ក្នុងខេត្តសៀមរាប សរុប ៣៦៦សំណាក សុទ្ធតែអវិជ្ជមានទាំងអស់។
អត្ថបទ៖ សេង ផល្លី