ចាប់តាំងពីមានការអនុវត្តគម្រោងស្ថាបនាផ្លូវទាំង៣៨ខ្សែ ក្នុងក្រុងសៀមរាប គេពិនិត្យឃើញថា វិស័យទូរគមនាគមន៍ក្នុងក្រុងទេសចរណ៍នេះ មានបញ្ហារអាក់រអួល ដែលបញ្ហានេះត្រូវឲ្យភាគីពាក់ព័ន្ធចូលរួមដោះស្រាយជាបន្ទាន់។
យោងតាមរបាយការណ៍ស្តីពីបច្ចុប្បន្នភាពផលប៉ះពាល់ និង ការខូចខាតបណ្ដាញកាប្លិ៍ទូរគមនាគមន៍ ពាក់ព័ន្ធនឹង ការដំណើរការគម្រោងសាងសង់ផ្លូវចំនួន ៣៨ខ្សែ ជាមួយក្រុមហ៊ុនប្រតិបត្តិករបម្រើសេវាទូរគមនាគមន៍ ក្នុងក្រុង/ខេត្តសៀមរាប របស់លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប បង្ហាញថា បន្ទាប់ពីមានការចុះសម្របសម្រួល និងពិនិត្យការដ្ឋានសាងសង់ផ្លូវ៣៨ខ្សែដោយផ្ទាល់ និង ទទួលរបាយការណ៍ពីបណ្តាប្រតិបត្តិករ គិតត្រឹមថ្ងែទី១៨ ខែមករា ឆ្នាំ២០២១វិស័យទូរគមនាគមន៍មានបញ្ហាប្រឈមច្រើន ដូចជា បណ្តាញមានស្រាប់ក្រោមដីដាច់ច្រើនជារៀងរាល់ថ្ងៃ មានខ្សែបណ្តាញមេ បំពង់ផ្លូវកាប្លិ៍ ខ្សែកាប្លិ៍អាកាស ។ល។ ការមិនទាន់បានកំណត់ទីតាំងសម្រាប់បណ្តាញទូរគមនាគមន៍ក្រោមដី។ ខ្សែកាប្លិ៍អាកាសភាគច្រើនបំពាក់លើបង្គោលអគ្គិសនី ។ បង្គោលខ្សែកាប្លិ៍ភាគច្រើនប៉ះពាល់ក្នុងការស្ថាបនាផ្លូវដោយត្រូវធ្វើការដក ឬ កាច់ចេញ។
លោកបញ្ជាក់ទៀតថា ការប្រឈមទាំងនេះ ក៏បណ្តាលមកពីប្រតិបត្តិករ និងក្រុមការងារសាងសង់មិនទាន់សហការគ្នាបានល្អប្រសើរ ។ ប្រតិបត្តិករពុំមានកម្លាំងគ្រប់គ្រាន់សម្រាប់ប្រចាំការតាមការដ្ឋាននិមួយៗ។ ក្រុមការងារសាងសង់ផ្លូវមិនបានផ្តល់ព័ត៌មានស្តីពីទីតាំងស្ថាបនាប្រចាំថ្ងៃក្នុងក្រុមតេឡេក្រាមដែលបានឯកភាព និង សម្រេចដោយក្រុមការងារក្នុងកិច្ចប្រជុំរួមនៅសាលាខេត្តសៀមរាប។ ការកាយរបស់ក្រុមការងារស្ថាបនាផ្លូវខ្លះ មិនគិតដល់ផលប៉ះពាល់បណ្តាញទូរគមនាគមន៍។ ដាច់ខ្សែបណ្តាញអតិថិជនជាមធ្យមជាង ១០០អតិថិជន ក្នុងមួយថ្ងៃ ដែលធ្វើឲ្យប៉ះពាល់ជាខ្លាំងដល់ការប្រើប្រាស់សេវាទូរគមនាគមន៍ របស់វិស័យឯកជន ប្រតិបត្តិការវិស័យហិរញ្ញវត្ថុរបស់អង្គភាពស្ថាប័នរដ្ឋ ប្រតិបត្តិការវិស័យធនាគារ ទូATM និង ជាពិសេសការសិក្សារបស់សិស្សានុសិស្សកំពុងសិក្សាតាមកម្មវិធីសិក្សាពីចម្ងាយ (Online)។ ផ្លូវខ្លះពុំមានបង្គោលអគ្គិសនីដែលមិនអាចអូសខ្សែកាប្លិ៍បណ្តាះអាសន្នសម្រាប់សង្គ្រោះសេវាទូរគមនាគមន៍បាន។ ផ្លូវភាគច្រើនខ្សែកាប្លិ៍ក្រោមដីនៅលើដីនិងមានការខូចខាតពីកាយដាច់ និង ការកិនជាន់ដោយសាររថយន្តគ្រប់ប្រភេទ ។ទីតាំងចាស់ភាគច្រើនរបស់បំពង់ផ្លូវកាប្លិ៍និងបណ្តាញកាប្លិ៍ស្ថិតនៅចំផ្ទៃផ្លូវ ដែលមិនអាចសង្គ្រោះបាន។ កាកសំណល់នៃការខូចខាតបណ្តាញទូរគមនាគមន៍ទាំងលើអាកាសនិងក្រោមដីពុំមានការប្រមូលចោល។ មានការលួចខ្សែកាប្លិ៍អុបទិកស្ពាន់ និង ឧបករណ៍ផ្សេងៗជាដើម។
លោកប្រធានមន្ទីរបន្ថែមថា ដើម្បីដោះស្រាយបញ្ហាប្រឈមទាំងអស់នេះ នៅព្រឹកថ្ងៃទី១៩ ខែមករា ឆ្នាំ២០២១នេះ មន្ទីរប្រៃសណីយ៍ និងទូរគមនាគមន៍ ខេត្តសៀមរាប ក៏បានធ្វើការប្រជុំជាមួយភាគីពាក់ព័ន្ធ ដូចជាភាគីក្រុមសាងសង់ផ្លូវ ក្រុមប្រតិបត្តិករទូរគមនាគមន៍ រដ្ឋករទឹក និងអគ្គីសនីសៀមរាប ជាដើម។ បញ្ហាដែលជួបប្រទះនាពេលកន្លងមក គឺកើតចេញពីការមិនសហការគ្នា។ ដូច្នេះលោកសង្ឃឹមថា បន្ទាប់ពីបញ្ចប់កិច្ចប្រជុំនេះ គ្រប់ភាគីពាក់ព័ន្ធនឹងបង្កើនកិច្ចសហការគ្នាឲ្យបានល្អ ដើម្បីឲ្យការស្ថាបនាផ្លូវទាំង៣៨ខ្សែនេះមានភាពរលូន តាមការគ្រោងទុក៕
អត្ថបទ៖ ជា ស្រស់, រូបភាព ៖ ខេង ឧត្តម
