អ្នកតម្បាញសូត្រ និងហូលពិតានខ្មែរ និងបុគ្គលិកខ្មែរជាង១០០នាក់ របស់វិទ្យាស្ថានវាយនភណ្ឌប្រពៃណីខ្មែរ ស្ថិតក្នុងឃុំពាក់ស្នែង ស្រុកអង្គរធំ ខេត្ដសៀមរាប កំពុងជួបបញ្ហាសេដ្ឋកិច្ច ខណៈការគាំទ្រផលិតផលសូត្រធម្មជាតិខ្មែរមានការធ្លាក់ចុះខ្លាំង ដោយសាររងផលប៉ះពាល់ដោយវិបត្តិជំងឺកូវីដ-១៩ នេះបើតាមការលើកឡើងរបស់ អ្នកនាង រិទ្ធ រដ្ឋា តំណាងវិទ្យាស្ថានវាយនភណ្ឌប្រពៃណីខ្មែរ ហៅកាត់ថា IKTT នៅថ្ងៃទី២០ ខែមករា ឆ្នាំ២០២១។
អ្នកតំណាងវិទ្យាស្ថានរូបនេះ បញ្ជាក់ថា ផលិតផលសូត្រធម្មជាតិខ្មែរក្នុងស្រុកអង្គរធំនេះ មានទីផ្សារធំនៅបរទេស ជាពិសេសប្រទេសជប៉ុនប្រហែល ៨៥ភាគរយ ក្រៅពីនេះជាទីផ្សារក្នុងស្រុក។ ដោយសារតែវិបត្តិកូវីដ-១៩ ពេញមួយឆ្នាំ២០២០ ផលិតផលសូត្រនៅទីនេះ ពុំមានការបញ្ជាទិញឡើយ។
អ្នកតំណាងវិទ្យាស្ថាន ក៏បានលើកឡើងផងដែរថា អ្នកបម្រើការនៅក្នុងវិទ្យាស្ថាននេះរួមមាន ជនពិការ ស្ដ្រីមានផ្ទៃពោះ ស្ដ្រីមានកូនក្នុងបន្ទុក ក្រៅពីផ្ដល់ការងារដល់ពួកគេ វិទ្យាស្ថាននេះ ក៏បានផ្ដល់ជា កន្លែងស្នាក់នៅ និងសាលារៀន ពីថ្នាក់ទី១ដល់ថ្នាក់ទី៣ ដើម្បីកាត់បន្ថយការបារម្ភ និងបញ្ចៀសហានិភ័យនានា ចំពោះកុមារតូចៗទៅសិក្សានៅឆ្ងាយពីផ្ទះ។
ព័ត៌មានជាតិ ថ្មីៗ
គួរជម្រាបថា ផលិតផលសូត្រខ្មែរ ផលិតនៅក្នុងវិទ្យាស្ថានវាយនភណ្ឌប្រពៃណីខ្មែរនេះ មានការគាំទ្រពីក្រសួងវប្បធម៌និងវិចិត្រសិល្បៈ និងនាំយកទៅធ្វើពិព័រណ៌សូត្រខ្មែរ បង្ហាញដល់ភ្ញៀវជាតិ និងអន្ដរជាតិជារៀងរាល់ឆ្នាំ។ ទន្ទឹមនោះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ កាលពីខែសីហាកន្លងទៅ បង្ហាញថា ក្រសួងនឹងរៀបចំអត្ថបទសិក្សាអំពីតម្បាញហូលពិតានខ្មែរ ដោយសារតម្បាញប្រភេទនេះមិនសូវមានអ្នកចេះធ្វើ រីឯអ្នកតម្បាញវិញ ត្រូវបានចាត់ទុកជាធនធានមនុស្សដ៏មានតម្លៃ សម្រាប់ប្រទេសជាតិ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
