នៅព្រឹកថ្ងៃទី២០ ខែមករា ឆ្នាំ២០២១ លោកជំទាវ ឆៃ ច័ន្ទរិទ្ធីសូលីដា រដ្ឋលេខាធិការ និងជាអនុប្រធានកិត្តិយស សមាគមតន្ត្រីសំនៀងជនពិការ តំណាង ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានចូលរួមប្រគល់វិញ្ញាបនបត្រវគ្គវិក្រឹត្យការជំនាញម៉ាស្សា សុខុមាលភាពបែបជប៉ុន ដល់ជនមានពិការភាពភ្នែក ចំនួន១៩នាក់ នៃសមាគមតន្ត្រីសំនៀងជនពិការ ស្ថិតនៅភូមិស្រែជំរៅ សង្កាត់គោករកា ខណ្ឌព្រែកព្នៅ រាជធានីភ្នំពេញ។
ថ្លែងក្នុងឱកាសនោះ លោកជំទាវ ញ៉ែម មរកត អនុរដ្ឋលេខាធិការ ក្រសួងកិច្ចការ នារី និងជាប្រធានកិត្តិយស សមាគមសំនៀងជនពិការ លើកឡើងថា វគ្គបណ្ដុះបណ្ដាលរយៈពេល៥ថ្ងៃនេះ ជាការពង្រឹងសមត្ថភាពបន្ថែមដល់ជនមានពិការភាព ឲ្យមានជំនាញច្បាស់លាស់ ដើម្បីរកប្រាក់ចំណូលលើកកម្ពស់ជីវភាពប្រចាំថ្ងៃ។
លោកជំទាវប្រធាន រំពឹងថា បងប្អូនជនពិការ នឹងទទួលបានការជួយដោះស្រាយជីវភាព ក៏ដូចជាការលំបាករបស់សមាគមសំនៀងជនពិការ បន្ទាប់ពីមជ្ឈមណ្ឌល បណ្តុះបណ្តាលវិជ្ជាជីវៈ ជនពិការនេះ ត្រូវបានសម្ពោធនាពេលខាងមុខ ក្រោមវត្តមានដ៏ខ្ពង់ខ្ពស់របស់ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន។
មានប្រសាសន៍នាពេលនោះដែរ លោកជំទាវ ឆៃ ច័ន្ទរិទ្ធីសូលីដា ក្នុងនាម ឯកឧត្តមរដ្ឋមន្ត្រីក្រសួងព័ត៌មាន ដែលជាប្រធានកិត្តិយស ក្រុមកាងារសកម្មភាពជនពិការ នៃក្រសួងព័ត៌មាន នឹងបន្តធ្វើការផ្សព្វផ្សាយ ពីមជ្ឈមណ្ឌល បណ្តុះបណ្តាលវិជ្ជាជីវៈជនពិការ នៃសមាគមតន្ត្រី សំនៀងជនពិការ ឲ្យបានទូលំទូលាយ ទៅដល់សាធារណជន ដើម្បីចូលរួមគាំទ្រ ជួយដល់បងប្អូនជនពិការបន្ថែមទៀត ។
លោកជំទាវ ឆៃ ច័ន្ទរិទ្ធីសូលីដា ក៏បាននាំយកនូវថវិកា ចំនួន ១ លានរៀល របស់ ឯកឧត្តម រដ្ឋមន្រ្តី ខៀវ កាញារីទ្ធ ជូនដល់សមាគម រួមនិង ថវិកចំនួន ១ លានរៀល របស់លោកឧកញ៉ា តាំង សុធី និងលោកជំទាវ, ក្រុមហ៊ុន ថែរក្សាសម្ផស្ស និង សំអាងការ ចំនួន ៥០០ ដុល្លា, លោកជំទាវ ដាណា ហ៊ុន គឹមជាតិ ឧបត្ថម្ភកំព្យូទ័រ ១៥ គ្រឿង និង ផ្តល់ ជាថវិកា ចំនួន ២ លានរៀល ជារៀងរាល់ខែ ដល់សមាគមសំនៀងជនពិការ សម្រាប់ដោះស្រាយប្រចាំថ្ងៃ។
គួររំលឹកថា នាពេលកន្លងមក សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិ ព្រឹទ្ឋបណ្ឌិត ប៊ុន រ៉ាន ហ៊ុន សែន ប្រធានកាកបាទក្រហមកម្ពុជា បានផ្ដល់ជាថវិកា សម្រាប់ទិញដី ជួយសង់អគារ ១ខ្នង ផ្លូវបេតុង ១ខ្សែ រថយន្តក្រុង ១គ្រឿង ឧបករណ៍ភ្លេង ១ឈុត និងសម្ភារៈឧបភោគបរិភោគជាច្រើន។ កាលពីពេលថ្មីៗនេះ ឯកឧត្តម ឃួង ស្រេង អភិបាលរាជធានីភ្នំពេញ និងជា ប្រធានគណៈកម្មាធិការសាខាកបាទ ក្រហមរាជធានីភ្នំពេញ បានប្រគល់អង្ករចំនួន ៥តោន ជាអំណោយមនុស្ស ធម៌ របស់សម្តេចកិត្តិព្រឹទ្ឋបណ្ឌិត ប៊ុន រ៉ាន ហ៊ុន សែន ប្រធានកាកបាទក្រហមកម្ពុជា ជូនដល់សមាគមសំនៀងតន្រ្តីជនពិការផងដែរ។
អត្ថបទ និងរូបភាព៖ ក្រសួងព័ត៌មាន
