នៅថ្ងៃទី២០ ខែមករា ឆ្នាំ២០២១ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អមដំណើរដោយ លោកស្រី យូ សុភា អភិបាលរងខេត្តសៀមរាប រួមជាមួយថ្នាក់ដឹកនាំអគ្គរងនៃលេខាធិការដ្ឋាន គណៈកម្មាធិការជាតិ ប្រយុទ្ធប្រឆាំងអំពើជួញដូរមនុស្ស និងលោកលោកស្រីជាតំណាងអ្គការជាដៃគូរ បានចុះតាមដាន ត្រួតពិនិត្យការអនុវត្តគម្រោងរួមគ្នា រវាងរាជរដ្ឋាភិបាលកម្ពុជា ជាមួយអង្គការសហប្រជាជាតិ សម្រាប់គាំទ្រ និងលើកកម្ពស់ជីវភាព និងសុខភាព សម្រាប់ប្រជាពលតដ្ឋទេសន្តរប្រវេសន៍ ក្នុងដំណាក់កាលជំងឺកូវីដ-១៩ នៅឃុំចាន់ស និងឃុំខ្នារពោធិ៍ ស្រុកសូទ្រនិគម ខេត្តសៀមរាប។
ក្នុងឱកាសនោះដែរក្រុមការងារ ក៏បានជួបសំណេះសំណាលជាមួយ គ្រួសារពលករ ថ្នាក់ដឹកនាំរដ្ឋបាលស្រុក ឃុំ មន្រ្តីអនុវត្តគម្រោង និងក្រុមគោលដៅដែលទទួលផលពីគម្រោង ដើម្បីសិក្សាស្វែងយល់ ពីលទ្ធផល នៃការអនុវត្តផែនការ និងបញ្ហាប្រឈមនានា ដែលអាជ្ញាធរមូលដ្ឋាន និងប្រជាពលរដ្ឋដែលជាទេសន្តរប្រវេសន៍ ជួបប្រទះ ព្រមទាំងទទួលយកនៅសំណូមពរ ដែលមន្រ្តីអ្នកអនុវត្ត និងប្រជាពលរដ្ឋលើកឡើងផងដែរ។
លោកជំទាវ ជូ ប៊ុនអេង ក៏បានធ្វើការក្រើនរំលឹក ឲ្យអាជ្ញាធរដែនដីត្រូវតាមដាននិងយកចិត្តទុកដាក់ពីបញ្ហាសំណូមពរនានា ដែលប្រជាពលរដ្ឋបានស្នើ និងបានលើកទឹកចិត្តឲ្យប្រជាពលករទាំងអស់គ្នា ត្រូវបង្កើនការផលិតផ្នែកកសិកម្ម ចិញ្ចឹមសត្វអាជីវកម្មផ្សេងៗ ដើម្បីដោះស្រាយបញ្ហាជីវភាព ពិសេសនៅក្នុងដំណាក់កាលដែលប្រទេសកម្ពុជា កំពុងតែកើតមានជំងឺកូវីដ១៩។ ជាមួយគ្នានោះដែរ រាជរដ្ឋាភិបាល បានយកចិត្តទុកដាក់លើបញ្ហាសុខភាព និងមុខរបរចិញ្ចឹមជីវិតរបស់បងប្អូនប្រជាពលករ ប្រជាពលរដ្ឋទូទៅ និងបានធ្វើការស្វះស្វែងគៀងគររកជំនួយឧបត្ថម្ភបន្ថែមទៀត សម្រាប់ទ្រទ្រង់ដល់ផែនការអភិវឌ្ឍការងារ និងជំនាញបច្ចេកទេសផ្សេងៗ ទៅដល់បងប្អូនប្រជាពលរដ្ឋ ដែលជាផ្នែកដ៏សំខាន់ និងជាតម្រូវការចាំបាច់ចំពោះមុខ ក្នុងការទប់ស្កាត់ការវិលត្រឡប់ទៅស្វែងរកការងារធ្វើនៅក្រៅប្រទេសដោយខុសច្បាប់ និងនៅក្នុងដំណាក់ជំងឺកូវីដ១៩នេះ។
លោកជំទាវ ក៏បានជំរុញឱ្យប្រជាពលរដ្ឋ ពិសេសប្រជាពលរដ្ឋចំណូលស្រុក ដែលទើបត្រឡប់មកវិញ ទៅចុះឈ្មោះរកការងារធ្វើនៅមន្ទីរការងារ និងបណ្តុះបណ្តាលវិជ្ជាជីវៈខេត្ត ដែលជាយន្តការរបស់រាជរដ្ឋភិបាលកម្ពុជា ក្នុងការដោះស្រាយបញ្ហាចំពោះមុខរបស់ប្រជាពលរដ្ឋ ដែលមានតម្រូវការការងារ សម្រាប់ផ្គត់ផ្គងជីវៈភាពគ្រួសារប្រចាំថ្ងៃ៕
អត្តបទនិងរូបភាព៖រដ្ឋបាលខេត្តសៀមរាប
