នៅព្រឹកថ្ងៃទី ២១ ខែ មករា ឆ្នាំ២០២១ នៅទីស្នាក់ការសាខាកាកបាទក្រហមកម្ពុជាខេត្តសៀមរាប ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត រួមទាំងឯកឧត្តម លោកជំទាវ អស់លោក លោកស្រីជាសមាជិកសមាជិកា គណៈកម្មាធិការសាខាខេត្ត ព្រមទាំងក្រុមប្រតិបត្តិសាខា បានអញ្ជើញចូលរួមកិច្ចប្រជុំតាម ប្រព័ន្ធវីដេអូ ក្រោមការដឹកនាំរបស់លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និង ក្រុមការងារទីស្នាក់ ការកណ្តាលកាកបាទក្រហមកម្ពុជា ។
មានប្រសាសន៍បើកកិច្ចប្រជុំ លោកជំទាវ ពុំ ចន្ទីនី បានលើកនូវរបៀបវារៈនៃកិច្ចប្រជុំ ដោយបានធ្វើការផ្សព្វផ្សាយពីលទ្ធផលនៃកិច្ចប្រជុំរបស់គណៈកម្មាធិការកណ្តាល ជូនដល់បណ្តាសាខាកាកបាទក្រហមកម្ពុជា ទាំង២៥រាជធានី ខេត្ត និង ពីការងារឥស្សរជនឆ្នើមថ្នាក់ជាតិ និង ការអភិវឌ្ឍន៍ស្ថាប័ន យុទ្ធសាស្ត្រ ២០២១-២០៣០ និង ការអភិវឌ្ឍន៍ សាខា ។
ឆ្លងតាមសេចក្តីរាយការណ៍ពីសកម្មភាព លទ្ធផល របស់គណៈកម្មាធិការសាខាទាំង២៥រាជធានី ខេត្ត ក្នុងនោះ ដែរឯកឧត្តម ទៀ សីហា ប្រធានគណៈកម្មាធិការសាខាខេត្ត បានលើកពីសកម្មភាព និង លទ្ធផលដែលសាខាខេត្ត សៀមរាបអនុវត្តបាននៅឆ្នាំ២០២០ ក្នុងបរិបទនៃជម្ងឺកូវិដ១៩ បានបង្កបញ្ហារាំងស្ទះដល់ការងារមនុស្សធម៌ក្នុងខេត្ត ។
ឯកឧត្តម បានបញ្ជាក់ថា ក្នុងបរិបទកូវិដ១៩នេះ ការគៀរគរប្រមូលមូលនិធិមនុស្សធម៌ មានការធ្លាក់ ចុះជាងឆ្នាំ២០១៩ ។ តែទោះជាយ៉ាងណាក៏ដោយ សកម្មភាពមនុស្សធម៌របស់សាខាកាកបាទក្រហមកម្ពុជា ខេត្តសៀមរាប នៅតែបន្តធ្វើការដោះស្រាយជូនបងប្អូននៅតាមអនុសាខាក្រុង-ស្រុកទាំង១២ ព្រមទាំងមានការ ចូលរួមទ្រទ្រង់សកម្មភាពពីបងប្អូនសប្បុរសជនក្នុងស្រុក សំខាន់កញ្ចប់អំណោយរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ផ្តល់ជូនសាខាខេត្ត ត្រូវបានធ្វើការចែកជូនដល់ដៃបងប្អូនរងគ្រោះ ក្នុងពេល ជួបនូវវិបត្តិជម្ងឺកូវិដ១៩នេះ។
ឯកឧត្តមប្រធានគណៈកម្មាធិការសាខាខេត្ត ក៏បានបញ្ជាក់ដែរថា ក្រៅពីការងារផ្តល់ស្បៀងអាហារ សាខាក៏បានធ្វើការផ្សព្វផ្សាយ ពីវិធានការ ក្នុងការប្រយុទ្ធប្រឆាំងបង្កា ទប់ស្កាត់កុំឲ្យមានការឆ្លងជាសហគមន៍ ដោយមានកិច្ចសហការជាមួយអាជ្ញាធរ កងកម្លាំងគ្រប់ជាន់ថា្នក់ សំខាន់ជាមួយសហភាពសហព័ន្ធយុវជនកម្ពុជា និង ក្មួយៗយុវជនកាកបាទក្រហមនៅតាមគ្រឹះ ស្ថានសិក្សា ពិសេសលើការគ្រប់គ្រងប្រជាពលករវិលត្រឡប់មកពីក្រៅប្រទេស គឺត្រូវចូលខ្លួនធ្វើចត្តាឡីស័ក ក្នុងរយៈពេល១៤ ។ ឯកឧត្តមប្រធាន ក៏បានបញ្ជាក់ជូនកិច្ចប្រជុំ អំពីគោលការណ៍ ក្នុងការរៀបចំចងក្រង ការងារឥស្សរជនឆ្នើមថ្នាក់ជាតិ និង ការអភិវឌ្ឍន៍ស្ថាប័ន (យុទ្ធសាស្ត្រ ២០២១.២០៣០) និង ការអភិវឌ្ឍន៍សាខា ផងដែរ ។
មានប្រសាសន៍បន្ថែមក្នុងឱកាសនោះ លោកជំទាវ ពុំ ចន្ទីនី បានធ្វើការកោតសរសើរ ពីកិច្ចខិតខំប្រឹងប្រែងរបស់សាខាទាំង ២៥រាជធានី ខេត្ត ក្នុងសកម្មភាពមនុស្សធម៌ ដោយបានលះបង់គ្រប់បែបយ៉ាង ដើមី្បបុព្វហេតុជាតិមាតុភូមិរបស់ខ្លួន ក្នុងពេលដែលនៅលើ ពិភពលោកយើងនេះ បានកំពុងជួបនូវវិបត្តិកូវិដ១៩ និយាយដោយឡែកនៅព្រះរាជាណាចក្រកម្ពុជា ក្រោមកិច្ចដឹកនាំប្រកបដោយ កត្តិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី បានយកចិត្តទុកដាក់ខ្ពស់ចំពោះសភាពការណ៍កូវីដ១៩នេះ ទប់ស្កាត់ការឆ្លងជាសហគមន៍ និងមានការកោតសរសើរពីអន្តរជាតិទៀតផង។ ទោះបីនៅកម្ពុជាមានកើតឡើងព្រឹត្តិការណ៍ ថ្ងៃ០៣វិច្ឆិកា និង ២៨វិច្ឆិកា នាពេលកន្លងមកក្ដី ក៏ប្រទេសកម្ពុជាយើង នៅតែគ្រប់គ្រងស្ថានការណ៍បានល្អផងដែរ ។ ក្នុងនោះដែរលោកជំទាវក៏បាន ធ្វើការណែនាំ និង ផ្តល់អនុសាសន៍ល្អៗមួយចំនួន ដើមី្បជាមូលដ្ឋានគ្រឹះ សម្រាប់យកទៅអនុវត្តនៅតាមបណ្តាសាខារាជធានី ខេត្ត ទាំង២៥ ឲ្យបានចំគោលដៅគ្រឹះទាំង០៧ របស់កាកបាទក្រហមកម្ពុជា តាមពាក្យស្លោក កាកបាទក្រហមនៅជាមួយបងប្អូនជានិច្ច មិនទុកឲ្យប្រជាពលរដ្ឋណាម្នាក់ស្លាប់ដោយឥតអាហារនោះឡើយ ៕
អត្ថបទ និង រូបភាព៖ លោក ម៉ី សុខារិទ្ធ
