នៅព្រឹកថ្ងៃទី២២ ខែមករា ឆ្នាំ២០២១ នៅសណ្ឋាគារ អ៊ីមព្រេស ក្រុងសៀមរាប មានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីការផ្គត់ផ្គង់ និងបញ្ជាទិញ ផលិតផលកសិ-ពាណិជ្ជកម្មបន្លែ រវាងក្រុមហ៊ុន លី លី ហ៊្វូដ អ៊ុនដាសទ្រីខូ អិលធីឌី (LYLY) និងក្រុមហ៊ុនផ្សារកសិផល និងចំណីអាហារ (FAAM) ដើម្បីលើកកម្ពស់វិស័យកសិកម្មក្នុងខេត្តសៀមរាប ក៏ដូចជាជីវភាពកសិករឲ្យកាន់តែមានភាពល្អប្រសើរ។
អញ្ជើញជាអធិបតីក្នុងពិធីនោះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លើកឡើងថា៖ កន្លងមកទីផ្សារបន្លែក្នុងស្រុកមានតម្រូវការខ្ពស់ ក៏ប៉ុន្តែការផ្គត់ផ្គង់ ដែលមានភាពជាក់លាក់ ទាំងបរិមាណ និងគុណភាពនៅមានកម្រិត ក្នុងនោះ កសិករ ក៏ពុំទទួលបាន តម្លៃលក់កសិផល ដែលផលិតបាន ប្រាកដប្រជាណាមួយឡើយ។ កត្តាទាំងនេះ ក្រសួងពាណិជ្ជកម្ម បានចាប់ផ្តើមធ្វើកិច្ចការដោយផ្ទាល់ ទាក់ទងជាមួយការធ្វើឱ្យប្រសើរឡើង នូវការតភ្ជាប់រវាងការផលិត ជាមួយនិងទីផ្សារ តាមរយៈគម្រោងជំរុញទីផ្សារសំរាប់ កសិកម្មខ្នាតតូច ហៅកាត់ថា អេម(AIMS) ដែលជាគម្រោងរួមគ្នារវាងរាជរដ្ឋាភិបាលកម្ពុជា និងអង្គការមូលនិធិអន្តរជាតិសម្រាប់ ការអភិវឌ្ឍន៍កសិកម្ម (IFAD)។
ឯកឧត្តមរដ្ឋមន្ត្រី បញ្ជាក់ថា៖ ក្នុងនាមជាស្ថាប័នអនុវត្តគម្រោង ក្រសួងបានផ្តោតលើផលិតផល សំខាន់ៗ ចំនួន០៥ប្រភេទ រួមមាន ស្រូវក្រអូប ដំឡូងមី មាន់ស្រែ បន្លែ និងសូត្រឆៅ។ ក្នុងនោះខេត្តគោលដៅ ដែលបាននិងកំពុងអនុវត្តន៍គម្រោងនេះ មានចំនួន១៨ ចែកចេញជាបី គឺ មណ្ឌលភូមិភាគនិរតី មណ្ឌលភូមិភាគបូព៌ា និងឦសាន និងមណ្ឌលភូមិភាគពាយ័ព្យ ដែលរួមមានខេត្តសៀមរាបផងដែរ។
ឯកឧត្តម បញ្ជាក់បន្ថែមថា៖ យោងតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ការជំរុញផលិតផលកសិ-ពាណិជ្ជកម្ម គឺដើម្បីផ្គត់ផ្គង់ដល់ទីផ្សារក្នុងស្រុក បង្កើនប្រាក់ចំណូលដល់កសិករ កាត់បន្ថយការនាំចូល។ ទន្ទឹមនេះ ប្រទេសកម្ពុជាក៏មានសក្តានុពល ក្នុងការនាំចេញផលិតផល ទៅកាន់ទីផ្សារអន្តរជាតិ ពិសេស ទីផ្សារអឺរ៉ុប អាមេរិក និងអាស៊ី។ ក្នុងនោះការកែច្នៃ ផលិតផលកសិ-ពាណិជ្ជកម្មបន្លែ គឺជាផលិតផលដ៏មានសក្តានុពល នៃគម្រោងអេម និងជាការពង្រីកបន្ថែមទៅលើបណ្តាមុខទំនិញជាច្រើនទៀត ក្រៅពី អង្ករ ម្រេច សំលៀកបំពាក់ ស្បែកជើង កាបូប និងកង់ជាដើម ទៅបរទេស។
អត្ថបទ និងរូបភាព៖ លោក យូ វង្ស និងលោក ងិន គឹមឡេង
សម្រួលអត្ថបទ៖ លោក សេង ផល្លី
