គិតត្រឹមថ្ងៃទី២២ ខែមករា ឆ្នាំ២០២១នេះ ក្រុមការងារនៃអាជ្ញាធរជាតិអប្សរា បានបន្តបោះបង្គោលព្រំការពារ នៅប្រាសាទបន្ទាយអំពិល បានប្រមាណ៨០ភាគរយហើយ ដែលទីតាំងបុរាណដ្ឋាននេះ ស្ថិតនៅក្នុងភូមិសំរោង ឃុំខ្នារពោធិ៍ ស្រុកសូទ្រនិគម ខេត្តសៀមរាប នៅខាងកើតប្រាសាទចៅស្រីវិបុល១០គីឡូម៉ែត្រ។
តាមរយៈការផ្សព្វផ្សាយ របស់អាជ្ញាធរជាតិអប្សរា ការបោះបង្គោលព្រំការពារក្នុងតំបន់ការពារប្រាសាទបន្ទាយអំពិលនេះ បានចាប់ផ្ដើមអនុវត្តន៍កាលពីថ្ងៃទី១៩ ខែមករា ឆ្នាំ២០២១ ដែលមានការសហការជាមួយអាជ្ញាធរមូលដ្ឋាន និងនគរបាលបេតិកភណ្ឌ។
តាមការចុះផ្សាយដដែលនេះ ពុំបានបង្ហាញពីទំហំផ្ទៃដីជាក់លាក់នៅឡើយទេ ដោយរង់ចាំការបោះបង្គោលព្រំរួចរាល់ជាមុនសិន។ គោលបំណង នៃការកំណត់បង្គោលព្រំការពារបុរាណដ្ឋាននេះ គឺដើម្បីការពារការរំលោភបំពានដីធ្លី ការបំផ្លាញលើទីតាំងបុរាណដ្ឋាន ព្រមទាំងផ្តល់ភាពងាយស្រួលដល់ប្រជាជន ក្នុងតំបន់បានយល់ដឹងពីតំបន់ការពារ និងចូលរួមការពារតំបន់បុរាណដ្ឋាន ក្នុងមូលដ្ឋានរបស់ពួកគាត់៕
អត្ថបទ និងរូបភាព៖ អាជ្ញាធរជាតិអប្សរា
សម្រួលអត្ថបទ៖ លោក សេង ផល្លី
