កសិករមួយគ្រួសារ នៅឃុំត្បែងស្រុកបន្ទាយស្រី ខេត្ដសៀមរាប បានប្រាក់ចំណូលប្រចាំគ្រួសារជាងមួយលានរៀល ក្នុងមួយថ្ងៃៗ ពីទិន្នផលដំណាំហូបផ្លែតាង៉ែន ដែលធ្វើអោយកសិកររូបនោះ មានគម្រោងដាំដំណាំហូបផ្លែជាច្រើប្រភេទទៀត។
អ្នកស្រី ឌួង សំណាង ជាម្ចាស់ចំការតាង៉ែន នៅជើងភ្នំគូលែន បានអោយដឹងនៅថ្ងៃទី២១ ខែមករានេះថា ដើមតាង៉ែននេះ អ្នកស្រីបានដាំឡើងក្នុងរយ:ពេល៧ឆ្នាំ ហើយក៏បានទទួលផលរយ:ពេល៣ឆ្នាំមកហើយដែរ ដោយគ្រាន់តែទិន្នផលលើកទី១ បានចំណូល៥ពាន់ដុល្លាក្នុងមួយឆ្នាំ លើក២បានចំណូលថវិកាជាង១ម៉ឺនដុល្លារ ប៉ុន្ដែសម្រាប់ឆ្នាំនេះអាចផ្ដល់ចំណូលជាង ២៥០ដុល្លាក្នុងមួយថ្ងៃៗ ដែលស្មើរនឹង១លានរៀល។ អ្នកស្រីបន្ថែមថា ពូជផ្លែតាង៉ែននេះបានយកមកពីប្រទេសថៃ ហើយមានរស់ជាតិផ្អែមដូចផ្លែមៀន។ អ្នកស្រីបានសម្ដែងការសប្បាយចិត្ដក្រោយពេលចំណូលថវិកាប្រចាំថ្ងៃ បើទោះបីបញ្ហាជំងឺកូវីដ-១៩ក៏ដោយ។ អ្នកស្រីបន្ថែមថា ការទទួលបានទិន្នផលតាង៉ែននេះ មានរយៈពេល១ខែ ដែលជាផ្នែកមួយបានជួយដល់ជីវភាពគ្រួសារបស់គាត់ផងដែរ។
អ្នកស្រី ឌួង សំណា បានលើកឡើងទៀតថា អ្នកស្រីបានដាំដើមតាង៉ែន៤៥០ដើមនៅលើផ្ទៃដី៣ហិកតា ដែលមកដល់នេះបាននឹងកំពុងទទួលផលគួរអោយគាប់ចិត្ដ ស្របពេលពិភពលោកកំពុងជួបវិបត្ដិសេដ្ឋកិច្ចគ្រួសារ ដោយសារបញ្ហាជំងឺកូវីដ-១៩។ អ្នកស្រីបន្ថែមថា មូលហេតុដែលធ្វើអោយអ្នកស្រីសម្រេចចិត្ដដាំដើមតាង៉ែន នៅជើងភ្នំគូលេននេះ ដោយសារដីតំបន់នោះមានជីវជាតិ និងគុណភាពដីល្អ ងាយស្រួលដាំដំណាំហូបផ្លែ ហើយទទួលបានផលល្អផងដែរ។ អ្នកស្រីគ្រោងដាំដំណាំហូបផ្លែជាច្រើនមុខទៀត រួមមាន ដើមធូរែន ដើមខ្នុរ ជាពិសេសដើមគូលែន ដើម្បីស្របតាមអត្ដសញ្ញាណភ្នំគូលែនផងដែរ៕
សូមជម្រាបថាកាលពីពេលថ្មីៗនេះ លោក ឃឹម ហ្វីណង់ អភិបាលស្រុកបន្ទាយស្រី បន្ទាប់ពីបានធ្វើដំណើរទៅកាន់ចម្ការតាង៉ែន របស់អ្នកស្រី ឌួង សុភាព បានសរសេរនៅក្នុងបណ្តាញសង្គមហ្វេសប៊ុក ផ្ទាល់ខ្លួនរបស់លោកថា “ខ្ញុំពិតជាចង់ឃើញបងប្អូនប្រជាកសិករនៅក្នុងស្រុកបន្ទាយស្រី និងអ្នកវិនិយោគ នាំគ្នាដាំដំណាំហូបផ្លែឱ្យបានច្រើន ជាពិសេសប្រភេទដែលលក់បានថ្លៃ មានភាពទាក់ទាញ និងមានទីផ្សារទូលំទូលាយសម្រាប់វិស័យទេសចរណ៍ ហើយរៀបចំចម្ការនិងកសិដ្ឋានរបស់ខ្លួនឱ្យទៅជារមណីយដ្ឋានសម្រាប់មកលេងកម្សាន្តផង។ បើធ្វើបែបនេះបាន ខ្ញុំជឿថាយើងនឹងអាចជម្រុញឱ្យអ្នកទេសចរមកលេងស្រុករបស់យើងកាន់តែច្រើន ព្រមទាំងអាច”នាំចេញនៅនឹងកន្លែង” នូវកសិផលទាំងនេះទៅផ្គត់ផ្គង់ដល់ក្នុងក្រុងសៀមរាបទៀតផង។ រដ្ឋបាលស្រុកត្រៀមខ្លួនរួចជាស្រេចក្នុងការជម្រុញទីផ្សារ និងផ្តល់ការគាំទ្រគ្រប់រូបភាព ធ្វើយ៉ាងណាដើម្បីឱ្យបន្ទាយស្រី សម្រេចបាននូវចក្ខុវិស័យជា«ដែនដីកសិទេសចរណ៍» ដ៏គួរឱ្យទាក់ទាញមួយនៅក្នុងពេលអនាគត”៕
អត្ថបទ និងរូបភាព: លោក ឈិត សាវី ,ជា ស្រស់
កែសម្រួល៖ លីវ សុខុន
