កាលពីថ្ងៃទី២០ ខែមករា ឆ្នាំ២០២១ ប្រជាពលរដ្ឋមានជីវភាពខ្វះខាតចំនួន ៤០គ្រួសារ រស់នៅក្នុងភូមិចំនួន៨ នៃសង្កាត់គោកចក ក្រុងសៀមរាប បានទទួលអំណោយជាស្បៀងអាហារ ពីមូលនិធិឃុំ-សង្កាត់ ដើម្បីសម្រួលដល់ជីវភាពប្រចាំថ្ងៃ អំឡុងពេលនៃវិបត្តិជំងឺកូវីដ-១៩។
លោក ទិត្យ ឌីរ៉ា ចៅសង្កាត់គោកចក បង្ហាញថា អំណោយចែកជូននាពេលនេះ គឺជាការយកចិត្តទុកដាក់របស់រាជរដ្ឋាភិបាល ក៏ដូចអាជ្ញាធរខេត្ត តាមរយៈមូលនិធិឃុំ-សង្កាត់។ ទោះជាយ៉ាងណាក៏ដោយ ដើម្បីដោះស្រាយការខ្វះខាតនាពេលខាងមុខ ប្រជាពលរដ្ឋទាំងអស់ ត្រូវបន្តប្រកបការងាររួមផ្សំរបស់ខ្លួន ក្នុងការដាំដុះដំណាំរួមផ្សំ ចិញ្ចឹមសត្វ សម្រាប់ផ្គត់ផ្គង់ជីវភាពក្រុមគ្រួសាររបស់ខ្លួន។
លោកចៅសង្កាត់ ក៏បានរំលឹកដែរថា ដោយសារវិបត្តិជំងឺកូវីដ-១៩ ខេត្តសៀមរាប បានរងផលប៉ះពាល់យ៉ាងធ្ងន់ធ្ងរ វិស័យទេសចរណ៍ ក្នុងនោះប្រជាពលរដ្ឋក្នុងសង្កាត់គោកចកជាច្រើនគ្រួសារបានបាត់បង់ការងារ និងប្រាក់ចំណូល។
ទន្ទឹមនោះ លោកចៅសង្កាត់ បានណែនាំដល់ប្រជាពលរដ្ឋក្នុងសង្កាត់ទាំងអស់ ត្រូវបន្តប្រុងប្រយ័ត្នខ្ពស់ ក្នុងការការពារជំងឺឆ្លងនៃជំងឺកូវីដ-១៩នេះ ត្រូវយកចិត្តទុកដាក់ខ្ពស់ក្នុងការធ្វើអនាម័យ ឱ្យបានជាប្រចាំ ដោយលាងសម្អាតដៃនឹងទឹកសាប៊ូ អាល់កុល ឬ ជែល ព្រមទាំងពាក់ម៉ាសឱ្យបានត្រឹមត្រូវ។
សូមជម្រាបថា អំណោយដែលបានចែកជូនប្រជាពលរដ្ឋក្រីក្រទាំង ៤០គ្រួសារនាពេលនោះ ក្នុងគ្រួសារទទួលបាន អង្ករ ២៥គីឡូក្រាម, មី១កេស, ទឹកត្រី១យួរ, ទឹកស៊ីអ៊ីវ១យួរ, ប្រេងឆា១ដប, និងសាប៊ូដុំមួយចំនួន៕
អត្ថបទ និង រូបភាព៖ ក្រសួងព័ត៌មាន
