អាជ្ញាធរជាតិអប្សរា នឹងបង្កើតអង្គភាពថ្មីមួយទៀត ដែលមានឈ្មោះថា ”អង្គភាពថែទាំប្រាសាទ” ដែលនឹងចំណុះឲ្យនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ក្នុងគោលបំណងគាំពារដល់កិច្ចការអភិរក្សប្រាសាទបុរាណ។
នេះបើតាមការឲ្យដឹងពី រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា លោកជំទាវ ភឿង សកុណា បន្ទាប់ពី បញ្ចប់កិច្ចប្រជុំបច្ចេកទេសលើកទី៣៤ និងកិច្ចប្រជុំពេញអង្គលើកទី២៧ គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ ហៅកាត់ អាយស៊ីស៊ី-អង្គរ ( ICC-Angkor ) នៅខេត្តសៀមរាប កាលពីល្ងាចថ្ងៃទី២៧ ខែមករា ឆ្នាំ២០២១។
លោកជំទាវ បញ្ជាក់ថា នាពេលកន្លងមក នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ មានតួនាទី ជាអ្នកប្រតិបត្តិលើគម្រោងអភិរក្សធំៗ។ ហើយការអនុវត្តគម្រោងធំៗទាំងនោះ ទាមទារឲ្យមានការលើកឡើងជាសំណើ មកគណៈកម្មាធិការអាយស៊ីស៊ី-អង្គរ ដើម្បីត្រួតពិនិត្យ និងអនុម័តសម្រេច។ ប៉ុន្តែសម្រាប់អង្គភាពថ្មី ដែលបង្កើតឡើងនេះ គឺអាចប្រតិបត្តិ ការងារថែទាំ អភិរក្សប្រាសាទបានលឿន បានរហ័ស ដោយមិនចាំបាច់ឆ្លងកាត់ការសម្រេចពីអ្នកជំនាញរបស់គណៈកម្មាការអាយស៊ីស៊ី-អង្គរឡើយ។
គួរជម្រាបថា ដើម្បីប្រយុទ្ទប្រឆាំងនឹងជំងឺកូវីដ-១៩ កិច្ចប្រជុំបច្ចេកទេសលើកទី៣៤ និងកិច្ចប្រជុំពេញអង្គលើកទី២៧ គណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ ហៅកាត់ អាយស៊ីស៊ី-អង្គរ ( ICC-Angkor ) ត្រូវបានរៀបចំឡើងតាមរយៈ Video Conference បានធ្វើឡើងក្នុងរយៈពេល២ថ្ងៃ ចាប់ពីថ្ងៃ២៦ ដល់២៧ ខែមករា ឆ្នាំ២០២១ នៅក្នុងក្រុងសៀមរាប ក្រោមអធិបតីភាព លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកជំទាវ Eva Nguyên-Binh ឯកអគ្គរដ្ឋទូតបារាំងប្រចាំនៅកម្ពុជា និងឯកឧត្តម Mikami Masahiro ឯកអគ្គរដ្ឋទូតជប៉ុនប្រចាំនៅកម្ពុជា ក្នុងនាមសហប្រធាន នៃកិច្ចប្រជុំពេញអង្គ។ ក្នុងនោះ អ្នកជំនាញការអន្តរជាតិ ភ្ញៀវជាតិ និងក្រុមអ្នកជំនាញពាក់ព័ន្ធមួយចំនួនទៀត នឹងចូលរួមកិច្ចប្រជុំទាំងពីរ តាមរយៈ Video Conference ពីទីតាំងជាក់ស្តែងផ្សេងៗ រួមមាន លេខាធិការវិទ្យាសាស្ត្រអចិន្រ្តៃយ៍ មកពីប្រទេស ទុយនីស៊ី អ្នកជំនាញអាដហុកសម្រាប់ការងារអភិរក្ស មកពីប្រទេសបារាំង អ៊ីតាលី និងជប៉ុន និងអ្នកជំនាញ សម្រាប់ការអភិវឌ្ឍប្រកបដោយចីរភាព ចំនួន៣រូបទៀត មកពីប្រទេសបារាំង និងជប៉ុន។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
