ក្នុងអង្គសិក្ខាសាលា ស្តីពីការលើកកម្ពស់ ការអនុវត្តគោលនយោបាយជាតិ ស្តីពីប្រព័ន្ធកិច្ចការរពារកុមារ ធ្វើឡើងនៅសាលាខេត្តសៀមរាប កាលពីថ្ងៃទី២៧ ខែមករា ឆ្នាំ២០២១ លោកជំទាវ ស៊ិន ណម សមាជិកាក្រុមប្រឹក្សាខេត្ត និងជាប្រធានគណៈកម្មការពិគ្រោះយោបល់កិច្ចការស្រ្តី និងកុមារខេត្តសៀមរាប បង្ហាញថា អំពើហិង្សា, ការរំលោភបំពានផ្លូវភេទ, ការកេងប្រវ័ញ្ចកម្លាំងពលកម្ម, ការបំពានសារធាតុញៀន, ជំងឺអេដស៍ និងការធ្វើចំណាកស្រុកដោយភាពប្រថុយប្រថានជាមួយឱពុកម្តាយ នៅតែជាបញ្ហាប្រឈម និងបន្តកើតមាន។
លោកជំទាវ ស៊ិន ណម បន្តថា៖ ការលើកកម្ពស់សិទ្ធិ និងសុខុមាលភាពកុមារ មកដល់ពេលនេះនៅតែស្ថិតក្នុងក្តីកង្វល់។ ដើម្បីកាត់បន្ថយ និងឈានទៅលុបបំបាត់បញ្ហារបស់កុមារខាងលើ ទាមទារឲ្យក្រុមការងារជំនាញមានការកែលម្អ ចំណុចខ្សោយមួយចំនួនដូចជា ភាពយឺតយ៉ាវក្នុងការក្តាប់សភាពការណ៍ ការប្រមូលទិន្នន័យ និងផ្តល់របាយការណ៍ បង្កើនកិច្ចសហការជាមួយអង្គការដៃគូ និងស្ថាប័នមានសមត្ថកិច្ច និងបង្កើនធនធានមនុស្ស សម្រាប់អនុវត្តការងារទាំងនេះ។
ថ្លែងក្នុងឱកាសនោះ លោកជំទាវ ញ៉េប សុភាព អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិ ដើម្បីកុមារ គូសបញ្ជាក់ថា៖ ហេតុផលខាងលើ ជាកម្មវត្ថុ នៃអង្គសិក្ខាសាលានេះ ដើម្បីលើកកម្ពស់ការយល់ដឹង និងការប្រើប្រាស់បទដ្ឋានគតិយុត្តជាតិ និងអន្តរជាតិដែលមានស្រាប់ សំដៅធ្វើយ៉ាងណា ការពារកុមារពីការរំលោភបំពាន និងកេងប្រវ័ញ្ចផ្លូវភេទ។ ការរៀបចំឲ្យមានប្រព័ន្ធការការពារកុមារមួយគ្រប់ជ្រុងជ្រោយ វាមិនមែនជាកិច្ចការរបស់ក្រសួង ស្ថាប័ន ឬរបស់អង្គការដៃគូណាមួយឡើយ ក៏ប៉ុន្តែវាជាកិច្ចការរបស់យើងទាំងអស់គ្នា ដែលក្នុងនោះរួមមាន ក្រសួងស្ថាប័ន អង្គការដៃគូពាក់ព័ន្ធ អាជ្ញាធរគ្រប់លំដាប់ថ្នាក់ សហគមន៍ មតាបិតា អ្នកអាណាព្យាបាល និងកុមារខ្លួនឯងផ្ទាល់ផងដែរ ដែលកិច្ចការនិងតួនាទីរបស់អ្នកទាំងអស់គ្នាខាងលើនេះ ត្រូវបានដាក់បញ្ចូល នៅក្នុងឯកសារគោលនយោបាយជាតិស្តីពីប្រព័ន្ធកិច្ចការពារកុមារ។
គួរជម្រាបថា សិក្ខាសាលា ស្ដីពីការលើកកម្ពស់ ការអនុវត្តគោលនយោបាយជាតិ ស្តីពីប្រព័ន្ធកិច្ចការរពារកុមារ រៀបចំនិងសម្របសម្រួលដោយអ្នកជំនាញនៃអគ្គលេខាធិការដ្ឋាន ក្រុមប្រឹក្សាជាតិកម្ពុជាដើម្បីកុមារ និងឧបត្ថម្ភដោយអង្គការផ្លែនអន្តរជាតិកម្ពុជា និង អង្គការ Hagar ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
