នៅថ្ងៃទី២៨ ខែមករា ឆ្នាំ២០២១ ក្រុមការងារអន្តរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ (ក.គ.អ.អ.) បានរៀបចំដំណើរទស្សនកិច្ច ជូនមន្ត្រីរាជការ ប្រតិបត្តិករទេសចរណ៍ ប្រជាសហគមន៍ និងស្ថាប័នពាក់ព័ន្ធជិត៣០០នាក់ ទៅកាន់បណ្ដាសហគមន៍ទេសចរណ៍ចំនួន៦ ក្នុងខេត្តសៀមរាប ដើម្បី ចែករំលែកនិងដកស្រង់បទពិសោធ និងជំរុញដល់ការអភិវឌ្ឍនៅតាមគោលដៅសហគមន៍តាមខេត្តស្រុករៀងៗខ្លួន។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បង្ហាញថា ក្រៅពីប្រាសាទ ខេត្តសៀមរាប មានសហគមន៍ទេសចរណ៍ និងអេកូទេសចរណ៍ ជាច្រើនកន្លែង ទាំងលើគោក និងលើទឹក។
លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ នៃក្រសួងទេសចរណ៍ បានឱ្យដឹងថា គោលបំណងនៃការរៀបចំដំណើរទស្សនកិច្ចទៅកាន់សហគមន៍ទាំងនេះ គឺដើម្បឆ្លុះបញ្ចាំងអំពីអ្វី ដែលគណៈប្រតិភូបានពិភាក្សាគ្នា នៅក្នុងវេទិកាកាលពីថ្ងៃទី២៧ម្សិលមិញ និងពាក់ព័ន្ធទៅលើការគ្រប់គ្រងសហគមន៍ ក៏ដូចជាបញ្ហាប្រឈមនានា ដែលកើតមាននៅក្នុងសហគមន៍ទាំងនោះ។
ព័ត៌មានជាតិ ថ្មីៗ
លោក ជុក ជំនោរ បន្ថថា បន្ទាប់ពីទទួលបាននូវព័ត៌មាន ឬរកឃើញនូវបញ្ហាណាមួយ នៅពេលត្រលប់មកវិញ ក្រុមការងារនឹងយកបញ្ហាទាំងនោះ លើកឡើងដោយផ្ទាល់នៅក្នុងពិធីបិទវេទិកាជាតិអេកូទេសចរណ៍លើកទី២ ដើម្បី ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ដែលដឹកនាំកិច្ចពិភាក្សាក្នុងពេលបិទវេទិកានេះ មានដំណោះស្រាយភ្លាមៗ ប៉ុន្តែប្រសិនបើមានបញ្ហាណា ដែលមិនអាចដោះស្រាយភ្លាមៗបានទេ ក្រសួង-ស្ថាប័នពាក់ព័ន្ធនឹងពិគ្រោះគ្នាដោះស្រាយនៅពេលក្រោយបន្តទៀត។សូមជម្រាបថា វេទិកាជាតិអេកូទេសចរណ៍លើកទី២ បាននិងកំពុងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៧-២៨ ខែមករា ឆ្នាំ២០២១ នៅសណ្ឋាគារសុខាអង្គរ ខេត្តសៀមរាប។
គួររំលឹកថា វេទិកាជាតិអេកូទេសចរណ៍លើកទី១ ត្រូវរៀបចំឡើងកាលពីថ្ងៃទី១៩ ខែវិច្ឆិកា ឆ្នាំ២០១៩ នៅរាជធានីភ្នំពេញ អមជាមួយពិធីប្រកាសដាក់ឲ្យប្រើប្រាស់គោលនយោបាយជាតិអេកូទេសចរណ៍ ២០១៩-២០៣០ផងដែរ។
អត្ថបទ និង រូបថត ៖ លោក យូ វង្ស និងលោក បូ សាវី
កែសម្រួលអត្ថបទ ៖ លោក សេង ផល្លី
