នៅថ្ងៃពុធម្សិលមិញនេះ ក្រសួងសន្តិសុខមាតុភូមិអាមេរិក (ពេលវេលានៅវ៉ាស៊ីនតោន) បានប្រកាសអាសន្នពាក់ព័ន្ធនឹង អំពើភេរវកម្មនៅទូទាំងប្រទេស ដោយលើកឡើងពីការគំរាមកំហែងដ៏មានសក្តានុពល ពីសំណាក់ក្រុមជ្រុលនិយមប្រឆាំងនឹង រដ្ឋាភិបាលរបស់ប្រធានាធិបតីអាមេរិក លោក ចូ បៃដិន (Joe Biden)។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃព្រហស្បតិ៍ នេះ។
ការប្រកាសអាសន្ននេះគឺជាការដាស់តឿនថា ក្រុមជ្រុលនិយមអាចធ្វើការវាយប្រហារ ទៅលើមន្រ្តីជាប់ឆ្នោត និងអគាររដ្ឋាភិបាលបានគ្រប់ពេល ដូចទៅនឹងការវាយប្រហារ ដែលបានកើតឡើងកាលពីថ្ងៃទី០៦ ខែមករាកន្លងទៅនេះ ទៅលើវិមានសភាដោយក្រុមអ្នកគាំទ្រ អតីតប្រធានាធិបតីអាមេរិក លោក ដូណាល់ ត្រាំ។
ការប្រកាសអាសន្នខាងលើនេះបានកើតឡើង ខណៈអាជ្ញាធររដ្ឋកាលីហ្វ័រញ៉ាបានចោទប្រកាន់ក្រុមអ្នកគាំទ្រលោក ដូណាល់ ត្រាំ និងក្រុមអ្នកដើរតាមកងជីវពលស្តាំនិយម ដែលមានកាន់កាប់គ្រាប់បែកចំនួន ០៥គ្រាប់នោះថា មានបំណងវាយប្រហារក្រុមអ្នកប្រជាធិបតេយ្យ។
គួរបញ្ជាក់ថា បើតាមអាជ្ញាធរប្រយុទ្ធប្រឆាំង នឹងអំពើភេរវកម្មថ្នាក់ជាតិ ការគំរាមកំហែង និងការវាយប្រហារអាចបន្តកើតមាន ជាច្រើនសប្តាហ៍ទៅមុខទៀត បន្ទាប់ពីការស្បថចូលកាន់តំណែងរបស់លោក ចូ បៃដិន កាលពីថ្ងៃទី២០ ខែមករាកន្លងទៅនេះ និងកំឡុងពេលដែលលោក ដូណាល់ ត្រាំ កំពុងប្រឈមនឹងការចោទប្រកាន់នៅក្នុងព្រឹទ្ធសភា ពីបទញុះញង់ឲ្យមានការវាយវាយប្រហារដ៏ហិង្សា ទៅលើវិមានសភាកាលពីថ្ងៃទី០៦ ខែមករា ឆ្នាំ២០២១៕
