ការអភិវឌ្ឍវិស័យអេកូទេសចរណ៍ និងសហគមន៍ទេសចរណ៍ គឺជាគន្លឹះដ៏សំខាន់មួយក្នុងការលើកស្ទួយវិស័យទេសចរណ៍ជាតិ និងជំរុញការអភិវឌ្ឍនៅមូលដ្ឋាន ទន្ទឹមនោះ រាជរដ្ឋាភិបាលកម្ពុជា បានជំរុញដល់ក្រសួងទេសចរណ៍ ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ព្រមទាំងរដ្ឋបាលថ្នាក់ជាតិ ថ្នាក់ក្រោមជាតិ និងស្ថាប័នពាក់ព័ន្ធដទៃ ត្រូវរួមគ្នាជួយទ្រទ្រង់វិស័យទេសចរណ៍ប្រភេទនេះ ទោះបីវិបត្តិជំងឺកូវីដ១៩ មិនទាន់ត្រូវបានបញ្ចប់ក្តី។
ខ្លឹមសារនេះត្រូវបានលើកឡើង ក្នុងពិធិបិទវេទិកាជាតិអេកូទេសចរណ៍លើកទី២ នាល្ងាចថ្ងៃទី២៨ ខែមករា ឆ្នាំ២០២១ នៅសាលសន្និសីទសុខា ក្រុងសៀមរាប រៀបចំដោក្រុមការងារអន្តរក្រសួងគ្រប់គ្រង និងអភិវឌ្ឍន៍សហគមន៍ទេសចរណ៍ និងអេកូទេសចរណ៍ ហៅកាត់ថា ក.គ.អ.អ។ ពិធីនេះ ធ្វើឡើងក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធាន ក.គ.អ.អ. ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឯកឧត្តមរដ្ឋមន្រ្តី វេង សាខុន លោក ពៅ ពិសិដ្ឋ អភិបាលរងខេត្តសៀមរាប តំណាងឯកឧត្តម ទៀ សីហា អភិបាលខេត្តសៀមរាប។
លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ និងជាប្រធានលេខាធិការដ្ឋាន ក.គ.អ.អ បានលើកយកនូវលទ្ធផលនៃការពិភាក្សា ក្នុងវេទិកាលើកទី២នេះថា ការថយចុះបរិមាណផ្ទៃដី នៃតំបន់ការពារធម្មជាតិមួយចំនួន អាចនឹងធ្វើឲ្យប៉ះពាល់ទៅដល់ទេសភាពតំបន់អេកូទេសចរណ៍ ជាមួយនោះការរៀបចំកញ្ចប់ទស្សនកិច្ចទៅកាន់សហគមន៍មួយផ្នែក ពុំមានការទំនាក់ទំនង និងប្រើប្រាស់សេវារបស់សហគមន៍ឲ្យបានច្រើនឡើយ ដូចជាករណីនៅតំបន់ខ្នងផ្សារ សហគមន៍ជីផាត និងអារ៉ែងជាដើម។
លោកបន្ដថា អង្គវេទិកានេះ ក៏បានលើកឡើងអំពីលទ្ធភាពក្នុងការដាក់បញ្ចូលតំបន់អភិរក្ស និងតំបន់ព្រៃឈើមួយចំនួន ទៅក្នុងបញ្ជីអង្គការ UNESCO និងក្នុងបញ្ជីបត្រៀម ដែលមានស្រាប់ របស់ក្រសួងទេសចរណ៍ផងដែរ។ ទន្ទឹមនោះ ការអភិវឌ្ឍហេដ្ឋារចនាសម្ព័ន្ធទៅកាន់សហគមន៍ទេសចរណ៍ ពិសេសបណ្តាញផ្លូវតភ្ជាប់ ដើម្បីទាញចំណាប់អារម្មណ៍ ភ្ញៀវទេសចរ ទៅកាន់សហគមន៍ទាំងនោះ ត្រូវគិតពីគុណភាពជាជាងបរិមាណ និងទាមទារឲ្យភ្ញៀវទេសចរទៅតំបន់នោះ ប្រកបដោយការទទួលខុសត្រូវ សម្រាកបានយូរ និងចំណាយច្រើន។
ឯកឧត្តមរដ្ឋមន្ត្រី ក្រសួងទេសចរណ៍ បានអំពាវនាវដល់ សហគមន៍ទេសចរណ៍ទាំងអស់ ត្រូវខិតខំពង្រឹងសាមគ្គីផ្ទៃក្នុង និងគ្រប់គ្រងតំបន់ទេសចរណ៍ ទាំងនោះប្រកបដោយប្រសិទ្ធភាពខ្ពស់។ ក្នុងកាលៈទេសៈនៃវិបិត្តកូវីដ-១៩នេះ ការបំផុសចលនាទេសចរណ៍ផ្ទៃក្នុង ជាការចាំបាច់បំផុត ហើយការងារនេះ គឺជាការជំរុញឲ្យមានការចរាចរណ៍សាច់ប្រាក់ចូលដល់សហគមន៍ តាមរយៈការដើរកម្សាន្តរបស់អ្នកទេសចរជាតិ។
អត្ថបទ និង រូបថត ៖ លោក ជា ស្រស់ និងលោក បូ សាវី
កែសម្រួលអត្ថបទ ៖ លោក សេង ផល្លី
